Dünyanın diqqəti yenidən Bakıya yönəlir
Tarix: 10-06-2021 18:21 | Bölmə: Slayd
Dünyanın diqqəti yenidən Bakıya yönəlir

Dünyanın ən böyük idman tədbirlərindən biri - AVRO-2020 başlayır. Sayca 16-cı qitə çempionatı Avropanın 11 şəhərində, o cümlədən Azərbaycanın paytaxtında keçiriləcək.

Reyting.az
xəbər verir ki, 31 gün davam edəcək turnirdə qitənin 24 ən güclü komandası çıxış edəcək. Final oyunu iyulun 11-də baş tutacaq yarışda ümumilikdə 51 qarşılaşma olacaq.

Xatırladaq ki, dünyanın maraqla izlədiyi AVRO-2020-yə Avropanın müxtəlif ölkələri ilə yanaşı Azərbaycan da ev sahibliyi edir.

Bir neçə gün öncə daha bir yarışa - "Formula 2" üzrə Azərbaycan Qran-prisinə ev sahibliyi edən Bakı istər beynəlxalq musiqi, istərsə də idman yarışlarını uğurlu və təhlükəsiz təşkil edən şəhərlər sırasındadır.

Təbii ki, belə yarışların Azərbaycanın paytaxtında keçirilməsinə razılığın verilməsi, ölkəmizin həm də müasir idman infrastrukturuna malik olması ilə bağlıdır. Çünki istər Bakıda, istərsə də Azərbaycanın digər şəhərlərində bir çox beynəlxalq səviyyəli idman yarışlarının keçirilməsi üçün müasir şərait var. Eyni zamanda, beynəlxalq əhəmiyyətli yarışların təşkilində Azərbaycan dünya və region ölkələri ilə müqayisədə kifayət qədər böyük təcrübəyə malikdir.

Sözsüz ki, beynəlxalq səviyyəli yarışların Azərbaycanda keçirilməsini təkcə müasir infrastruktur və təşkilatçılıqla əlaqələndirmək olmaz. Bu məsələdə Azərbaycan rəhbərinin nüfuzu, ölkəmizin regionun aparıcı ölkələrindən biri olması ilə yanaşı, ölkə olaraq belə yarışlara təhlükəsizlik baxımından da tam hazırlıqlı olmamızla bağlıdır. Eyni zamanda, Azərbaycana turist marağının yüksək olması da bu məsələdə əhəmiyyətli rol oynayır. Təbii ki, beynəlxalq əhəmiyyətli yarışlara ev sahibliyi etmək üçün bunlar da kifayət deyil. Xüsusi vurğulamaq gərəkdir ki, Azərbaycanın işğalçılarla müharibədən cəmi 6 ay sonra dünya əhəmiyyətli yarışa ev sahibliyi etməsində ölkəmizin gücü, qüdrəti, çevik toparlanma qabiliyyəti də önəm kəsb edir.

Bəs, bu yarışlar Azərbaycana nə qazandırır?

Təbii ki, ilk növbədə Azərbaycanı dünyanın diqqət mərkəzinə gətirir, onun böyük potensiala malik sülhsevər və dünya ictimaiyyətinə açıq ölkə olduğunu göstərir. Eyni zamanda, bu cür yarışlar Azərbaycan Respublikası Prezidentinin qeyri-neft sektorunun inkişafı ilə bağlı əsas hədəflərindən birinə - turizmin inkişafına təkan verir, ölkəmizə yeni turistlərin cəlbində önəmli rol oynayır. Turizmin inkişafı isə ölkəmizin iqtisadi qüdrətinin artmasına əlavə stimuldur.

Bəs, Bakı Futbol üzrə Avropa çempionatına necə hazırlaşıb?

Azərbaycanın istər ölkəmizə gələcək idmançıların, istərsə də çoxsaylı əcnəbi azarkeşlərin yerləşdirilməsi və təhlükəsizliklərinin təşkilində hər hansı problemi yoxdur. Hətta ölkəmizə gələcək fanatlara karantin də tətbiq edilməyəcək. Əcnəbi azarkeşlərin viza ala bilməsi üçün COVID-19-a dair PCR testinin neqativ olması kifayətdir. Bundan əlavə, Nazirlər Kabineti Prezidentin sərəncamından irəli gələrək, azarkeşlərin ölkəmizə rahat gəlişi üçün bir sıra sadələləşdirilmış qaydaların həyata keçirilməsi üçün qərar imzalayıb.

Bu yerdə onu da xatırladaq ki, AFFA-nın icraçı vitse-prezidenti Elxan Məmmədov "The İndependent" nəşrinə açıqlamasında “Əminik ki, tərəfdarlar üçün təhlükəsizlik yüksək səviyyədə olacaq. Hətta yoluxma riskini minimuma endirmək üçün "Fan-zonalar" təşkil etmədik. Futbol Avropa çempionatına ev sahibliyi edəcək 11 şəhərin normal həyat tərzinə qayıdacağına ümid verir",- deyib.

Reyting.az




Bölməyə aid digər xəbərlər
bütün xəbərlər
{sape_links}{sape_article}