Əliyevin Moskvaya gözlənilən səfəri - Putinlə nələri müzakirə edəcəklər?
Tarix: 20-07-2021 13:28 | Bölmə: Slayd
Əliyevin Moskvaya gözlənilən səfəri - Putinlə nələri müzakirə edəcəklər?

“Azərbaycan və Rusiya arasında siyasi dialoq kəsilmir. Bu ilin əvvəlində Azərbaycanın Baş naziri Moskvada olub. Daha sonra Milli Məclisin sədri Moskvada müzakirələr aparıb. Eləcədə Milli Məclisin Rusiya Dövlət Duması ilə müştərək komissiyası var. Müştərək komissiyanın iclası da Moskvada keçirilib və vitse-spiker Əli Hüseynlinin rəhbərliyi ilə nümayəndə heyəti orada olub. Hərbi nazirlər, xarici işlər nazirləri də mütəmadi görüşürlər. Bu, normal haldır. Rusiya böyük dövətlər arasında bizim qonşumuz olan yeganə dövlətdir. Bizim Rusiya ilə sıx əlaqələrimiz var. Prezident İlham Əliyevin də Moskva səfəri çox normal və əhəmiyyətlidir. Diqqət etsək görərik ki, Azərbaycan və Rusiya prezidentləri ildə iki-üç dəfə görüşürlər. Eyni zamanda dövlət başçıları arasında tez-tez telefon danışıqları olur. Odur ki, prezident Əliyevin Moskva səfərində fövqəladə nələrsə axtarmağa dəyməz”.

Bunu Reyting.az-a Milli Məclisin deputatı, politoloq Rasim Musabəyov Azərbaycan prezidenti İlham Əliyevin Moskvaya gözlənilən səfərini şərh edərkən deyib.

Rasim Musabəyov xatırladıb ki, Azərbaycan və Rusiya prezidentləri uzun müddətdir görüşməyiblər: “Əlbəttə, pandemiya kimi hallar var ki, görüşlərin tez keçirilməsinə imkan vermir. Amma nəzərə alsaq ki, 2021-ci ilin 11 yanvarında verilən üçtərəfli bəyannamənin üzərindən xeyli zaman keçib və orada müəyyən problemlər də aşkarlanıb. Fərz edirəm ki, Əliyev-Putin görüşündə ikitərəfli münasibətlər müzakirə edilə, eləcədə regional və beynəlxalq gündəlik də ola bilər. Amma əsasən bu görüşün mahiyyəti üçtərəfli bəyannamənin icrasıdır. Həm də Ermənistanın yaramaz hərəkətləri müzakirəyə çıxarıla bilər. Düşünürəm ki, Qarabağdakı sülhməramlıların hərəkəti Azərbaycanı tam şəkildə qane etmir. Fikrimcə, bu məsələlər Moskvada müzakirə ediləcək”.

Deputat əlavə edib ki, Azərbaycan-Ermənistan sərhədlərinin delimitasiyası, mümkün sülh müqaviləsi və digər vacib məsələlərin müzakirəsi də gözləniləndir: “Aydındır ki, Rusiya real olaraq Azərbaycan və Ermənistan arasında vasitəçi dövlətdir. Ona görə də sərhəd, nəqliyyat dəhlizlərinin açılması, Qarabağ ərazisində qalan bir neçə minlik Ermənistan hərbçiləri, eləcədə yerli ermənilərin silahlı birləşmələri məsələləri müzakirə oluna bilər. Çünki Ermənistan ordusunun Qarabağdakı qalıqları çıxarılmalı, yerli erməni silahlı dəstələri isə tərkisilah olunmalı idi. Amma bunlar Şuşa yaxınlığında atəş açırlar. Bunun məsuliyyətini kim daşıyır? Rusiya orada şəraiti elə təmin etməli idi ki, atəş açılmasın. Əgər orada əllərdə silah qalıbsa və onlar gicləməyə cəhdlər edəcəksə, bu halda məsuliyyəti kim daşıyacaq? Düşünürəm ki, bütün bu məsələlər müzakirə ediləcək”.

Bir müddət əvvəl Ermənistanın Baş naziri səlahiyyətlərini icra edən Nikol Paşinyanın da Rusiyaya səfər etdiyini xatırladan Rasim Musabəyov deyib ki, Paşinyan da bir sıra məsələləri müzakirə edib: “Əlbəttə, həmin səfərdə daha çox Paşinyan hökumətində kimlərin Rusiya tərəfindən qəbuledilməz olduğu kimi məsələlər də müzakirə olunub. Amma aydındır ki, Ermənistan-Azərbaycan münasibətləri məsələsi Moskvada ciddi nəzərdən keçirilib”.

Reyting.az




Bölməyə aid digər xəbərlər
bütün xəbərlər
{sape_links}{sape_article}