“Zəngəzurla bağlı ortaya iddia qoyula bilər” - Partiya sədri
Tarix: 23-07-2021 17:24 | Bölmə: Slayd
“Zəngəzurla bağlı ortaya iddia qoyula bilər”

“Azərbaycan dövlətinin post-münaqişə dövrü üçün siyasəti yetərlidir. Rəsmi Bakı maksimum formada çevik siyasət aparır. Amma hesab edirəm ki, bu istiqamətdə müəyyən çatışmazlıqlar var. Bunun da səbəbi odur ki, Azərbaycan ərazisinin bir hissəsi hazırda Rusiya sülhməramlı qüvvələrinin nəzarəti altındadır və onlar da bəzən özbaşınalıq edirlər. Hesab edirəm ki, aparılan siyasət bu özfəaliyyətin qarşısını almaq gücündə olmalıdır”.

Bu fikirləri Reyting.az-a Aydınlar Partiyasının sədri Qulamhüseyn Əlibəyli “Post-münaqişə dövrü üçün Azərbaycanın apardığı siyasəti necə qiymətləndirirsiniz? Bu siyasəti çevik və post-münaqişə dövrü üçün yetərli saymaq olarmı?” sualına cavabında deyib.

Partiya sədri xatırladıb ki, bir sıra böyük ölkələrin Azərbaycanda maraqları var: “Bu maraqlar əslində siyasi maraqlardan daha çox iqtisadi maraqlara söykənir. Azərbaycan eyni zamanda özünün iqtisadi maraqlarını təmin etməyə çalışır. Və bunu da hamıya elan edib”.

Q. Əlibəylinin sözlərinə görə, Azərbaycan istəyir ki, region dinc, sabit olsun, burada ancaq iqtisadi, mədəni inkişaf müşahidə olunsun: “Əlbəttə, bu, ümumi siyasətdir. Əslində bu, normal və təqdirəlayiqdir. Lakin qeyd etdiyim kimi, bəzi problemlər var. Bunun qarşısını almaq və aradan qaldırmaq üçün çeviklik vacibdir”.

Q. Əlibəylinin fikrincə, post-münaqişə dövründə bir sıra nəhəng ölkələrin bəyanatları göstərir ki, onlar prosesdə iştirak etməkdə qərarlıdırlar:

“Bakı maksimum müstəqil xarici siysət aparır, öz maraqları ilə ona uyğun gələn digər maraqları uzlaşdırmağa çalışır. Məsələn, bir sıra ölkələr əslində ilk gündən münaqişədən kənarda qaldılar, daha çox Azərbaycan və Türkiyə söz sahibinə çevrildi. İndi həmin ölkələrin fəaliyyəti daha çox öz maraqlarını təmin etməyə yönəlib.

Azərbaycan xarici siyasəti çevikdir. Ola bilsin ki, belə siyasətə qarşı qoyulan digər siyasət var, sadəcə, biz bunu görmürük. İndi mübarizə daha çox diplomatiya səhnəsində gedir. Məsələn, Fransa, ABŞ və ya Rusiyanın hansısa ziddiyyətli bəyanatı olanda Azərbaycanın müvafiq qurumları reaksiya verir, mövqeyimizi ifadə edirlər.

Ümumən maraqlarımızı başlı-başına buraxmamışıq. Dövləti maraqlarımızı təmin etməyə yönəlmiş siyasətimiz var. Ancaq ayrı-ayrı məsələlərə münasibətdə də çevik olmağımız vacibdir. Hesab edirəm ki, indiki çətinliklər və mübarizə daha çox diplomatiyanın problemidir”.

Partiya sədri əlavə edib ki, Azərbaycan tədricən iddialarını ortaya qoyur: “Məsələn, Zəngəzurla bağlı ortaya iddia qoyula bilər. Eləcədə digər tarixi ərazilərimizin məsələsi gündəmə gətirilməlidir. Həmçinin işğal dövründə Ermənistanın bizə vurduğu ziyan rəsmi şəkildə ortaya qoyula, beynəlxalq məhkəməyə müraciət etmək, Ermənistanı müharibə cinayətlərinə görə ittiham etmək olar. Məncə, bu da diplomatiyamızın bir istiqaməti olmalıdır. Beynəlxalq hüququn verdiyi imkanlar vasitəsilə bu addımlar atılmalıdır. Ümumən post-münaqişə dövrü üçün siyasətimiz normaldır”.

Reyting.az




Bölməyə aid digər xəbərlər
{sape_links}{sape_article}