08:23 / 21-10-2021
Azad Zəngilan - Fotolar
Xankəndi, Xocalı, Ağdərə və Xocavənddə Azərbaycan bayrağı qaldırılacaq - Deputat
Tarix: 27-09-2021 17:02 | Bölmə: Slayd
Xankəndi, Xocalı, Ağdərə və Xocavənddə Azərbaycan bayrağı qaldırılacaq

“Yalana, saxta tarixə əsaslanan “Böyük Ermənistan” ideyası darmadağın edildi, tarixin zibilliyinə atıldı. Ermənistan bir dövlət kimi mövcudluğunu qorumaq istəyirsə, Azərbaycan və Türkiyə ilə münasibətlərinə yenidən baxmalıdır. Cənab Prezidentin dediyi kimi, Qarabağda hər hansı statusdan söhbət gedə bilməz. Çünki cənab Prezidentin imzaladığı sərəncamla artıq Qarabağ iqtisadi rayonu yaradılıb. Yəni Azərbaycan dövləti öz sözünü deyib, Ali Baş Komandanın mesajları açıq və qətidir”.

Bunu Reyting.az-a Milli Məclisin deputatı Vahid Əhmədov Azərbaycan Respublikasının Prezidenti İlham Əliyevin bu gün müharibənin birinci ilinin tamam olması münasibəti ilə Azərbaycan xalqına müraciətini şərh edərkən deyib.

Deputat bildirib ki, himayədarlarının Ermənistana verdiyi vədlər boş xəyallardan başqa bir şey deyil. Onun sözlərinə görə, Azərbaycanın Türkiyə, İsrail, Pakistan kimi ciddi müttəfiqləri var: “44 günlük müharibə zamanı dünya Azərbaycanın müttəfiqlərini gördü. Yəni Ermənistanın çirkin siyasəti puç oldu. Ona görə də 44 günlük müharibədən dərs götürsünlər. Ermənistanı müharibəni yenidən başlamaq üçün qızışdırmaq, ona kömək söz vermək, Minsk Qrupunu fəallaşdırmağa çalışmaq da mənasızdır”.


V. Əhmədov

V. Əhmədovun fikrincə, Ermənistanda müəyyən ruspərəst qüvvələr var və onlar qarmaqarışıqlıq yaratmaqda, müharibədə maraqlıdırlar: “Həmin qüvvələr çalışırlar ki, Paşinyanı devirib hakimiyyətə gəlsinlər. Amma Paşinyanın apardığı siyasət də səhvdir. O, Baş nazir seçiləndən sonra başqa cür danışmağa cəhd edir. Anlamalıdır ki, Azərbaycan 30 il əvvəlki deyil, bizim güclü dövlətimiz, ordumuz və başçımız var. Dövlət başçısı da müstəqil siyasət aparır, ölkənin maraqlarını ən yüksək səviyyədə müdafiə edir. Eyni zamanda dünya arenasında dövlət başçısının xüsusi yeri var. Hesab edirəm ki, bu gün Prezidentin verdiyi mesajlar İrəvanda dəqiq oxunmalı, ciddi analiz olunmalıdır”.

V. Əhmədov əlavə edib ki, cənab Prezident həm ölkə, həmdə xarici mediaya Azərbaycan ideologiyası və siyasəti haqqında konkret fikirlər deyib:

“Qafqazda da dünya düzəni tamamilə dəyişib. Bunu anlamaq, başa düşmək lazımdır. Erməni dövləti bunu anlamalı, yeni çağırışlara uyğunlaşmalıdır. Əgər Azərbaycana yenidən hücum etməyi düşünürlərsə, çox böyük səhvə yol verirlər.

Cənab Prezident açıq mesaj verdi ki, Azərbaycanın süverenliyinə və maraqlarına qarşı istənilən təhlükəyə dərhal kəskin reaksiya veriləcək. Bu halda dövlət başçısının dəmir yumruğu işə düşəcək. Odur ki, Ermənistan rəhbərliyi ciddi düşünməlidir. Mən əminəm ki, Xankəndi, Xocalı, Ağdərə və Xocavənddə də Azərbaycan bayrağı qaldırılacaq, milli valyutamız işləyəcək.

Ermənistan isə bir dövlət kimi mövcudluğunu davam etdirmək istəyirsə Azərbaycan və Türkiyə ilə münasibətlərinə yenidən baxmalıdır. Əks təqdirdə 5-10 il ərzində xəritədən silinmək təhlükəsi ilə üz-üzə qalacaq”.

V. Əhmədovun sözlərinə görə, kimlərsə Ermənistan rəhbərliyinə deyə bilər ki, olmayan “Dağlıq Qarabağ”a status verilməsinə çalışacaqlar: “Azərbaycan Respublikasının Prezidenti də buna cavab olaraq haqlı deyir ki, qoy, həmin dövlətlər ermənilərə öz ərazilərində belə belə bir status versinlər, erməni cəmiyyəti qursunlar.

Prezident son mesajlarında açıq bildirdi ki, Azərbaycanla heç kim təzyiq dilində danışa və buna cəhd belə edə bilməz. İndi bir çox məsələlərdə gündəmi Azərbaycan tərəfi müəyyənləşdirir”.

Reyting.az




Bölməyə aid digər xəbərlər
{sape_links}{sape_article}