Ərdoğan Putinlə Qarabağ məsələsini müzakirə edib
Tarix: 03-12-2021 21:13 | Bölmə: Slayd
Ərdoğan Putinlə Qarabağ məsələsini müzakirə edib

Türkiyə prezidenti Rəcəb Tayyib Ərdoğanla Rusiyanın dövlət başçısı Vladimir Putin arasında telefon danışığı olub.

Reyting.az
Türkiyə KİV-lərinə istinadla xəbər verir ki, prezidentlər Türkiyə-Rusiya əlaqələrini, Azərbaycan-Ermənistan münasibətlərini, Suriya, Liviya və Ukraynadakı vəziyyəti müzakirə ediblər.

Kremlin mətbuat xidmətinin məlumatında isə bildirilir ki, Türkiyə tərəfinin təşəbbüsü ilə baş tutan telefon danışığı zamanı V. Putin türkiyəli həmkarına Rusiya, Azərbaycan və Ermənistan liderlərinin noyabrın 26-da Soçidə Dağlıq Qarabağla bağlı 9 noyabr 2020-ci il Bəyanatının imzalanmasının ildönümünə həsr olunmuş üçtərəfli görüşünün əsas nəticələri barədə məlumat verib.

Qeyd olunur ki, danışıqların gedişatında Bakı və İrəvanın regionda sabitliyin təmin edilməsi kontekstində əməkdaşlığa, eləcə də iki dövlət arasında sərhədlərin delimitasiya və demarkasiyası mexanizmlərinin yaradılmasına hazırlığının təsdiqlənməsi vacib idi: “Bundan əlavə, ticarət-iqtisadi və nəqliyyat əlaqələrinin bərpası ilə bağlı praktiki məsələlərin həlli istiqamətində də fikir mübadiləsi aparılıb”.

Kreml bildirir ki, Ərdoğan Rusiya Federasiyasının vasitəçilik rolunun vacibliyini qeyd edərək, səylərin gələcək koordinasiyasının, o cümlədən atəşkəs rejiminə və münaqişə zonasında bütün hərbi əməliyyatlara nəzarət etmək üçün Rusiya-Türkiyə mərkəzinin imkanlarından istifadəyə tərəfdar olduğunu diqqətə çatdırıb.

Rusiya və Türkiyə liderləri Suriyada vəziyyətin sabitləşdirilməsi və sülh prosesinin bərqərar olması üçün əməkdaşlığın səviyyəsindən qarşılıqlı məmnunluq ifadə ediblər. İki ölkə hərbçilərinin bundan sonra İdlib deeskalasiya zonasında birgə fəaliyyətini davam etdirəcəyi bildirilib.

Liviyadakı vəziyyətə gəlincə, BMT-nin vasitəçiliyi ilə siyasi və diplomatik nizamlanmaya alternativlərin olmaması vurğulanıb. Liviya dövlətçiliyinin və ərazi bütövlüyünün bərpasına yardım etməli olan 2021-ci il dekabrın 24-nə təyin edilmiş ümummilli seçkilərin uğurla keçiriləcəyinə ümid ifadə olunub.

Putin və Ərdoğan Ukrayna münaqişəsini müzakirə edərkən 2015-ci il Minsk kompleks tədbirlərinə və digər razılaşmalara, o cümlədən “Normand formatı”na tam riayət olunmasının vacibliyini diqqətə çatdırıblar.

Rusiya prezidenti Kiyevin Minsk razılaşmalarını pozmağa yönəlmiş destruktiv xəttini davam etdirdiyini bildirib. Bunu Ukrayna silahlı qüvvələrinin münaqişə zonasında təxribatçı fəaliyyəti, o cümlədən “Bayraktar” pilotsuz uçuş aparatlarından istifadə olunması sübut edir. Kiyevin Donbasa güc tətbiqi cəhdlərindən əl çəkməsinin vacibliyi vurğulanıb.

Sonda gələcək şəxsi təmaslar barədə razılıq əldə olunub.




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}