00:11 / 14-06-2024
Bu gün "Son zəng"dir
Bir kişi istəsə... Və ya “Parkda” nə baş verir? - Fotolar
Tarix: 16-05-2024 15:03 | Bölmə: Xəbərlər
Bir kişi istəsə... Və ya “Parkda” nə baş verir?

Etibar CƏBRAYILOĞLU

İstedadlı ssenarist və rejissor Səidə Haqverdiyevanın yaratdığı “Oyun” inklüziv teatr-studiyası çox xeyirxah işlə məşğuldur. Studiya peşəkar aktyorlarla fiziki əngəlli gəncləri bir araya gətirir. Əlilliyi olan insanlara öz bacarıqlarını səhnədə nümayiş etdirmək, ürəklərindəki sənətlə bağlı arzuları reallaşdırmaq, cəmiyyətə inteqrasiya olunmaq üçün unikal imkan yaradır.

“Oyun” yeni layihəsini Azərbaycan Dövlət Kukla Teatrının binasında tamaşaçılara təqdim etdi. “Parkda” adlı səhnə əsərinin müəllifi və quruluşçu rejissoru “Oyun” inklüziv teatr-studiyasının rəhbəri Səidə Haqverdiyevadır.

“Parkda” tamaşasında bütün hadisələr parkda baş verir. Adi, hər gün keçdiyimiz parkların birində. Murad, Aynur, Selena, Diana, Bibixanım, Ofisiant qız, fiziki əngəlli Naməlum və Şar satan oğlan da parkda dəfələrlə üzbəüz gəldiyimiz insanların prototipləridir. Hamı kimi onların da öz taleləri, həyata baxışları, problemləri var.



Murad (Türkay Cəfərli) və Aynur (Zülfiyyə Qurbanova) gənc ailədirlər, lakin qısqanclıq, sevgisizlik, qarşılıqlı inamsızlıq, şiddət və şübhələr üzündən bu cütlük ayrılmaq ərəfəsindədir. Müəllif belə bir həssas vaxtda Muradı Selena (Ülviyə Əliyeva), Diana (Zümrüd Qasımova), Bibixanım (Gülçöhrə Abdullayeva), Ofisiant qızla (Səbinə Məmmədova) parkda rastlaşdırır. Onlarla qısa tanışlıq və ünsiyyətdən sonra Murad anlayır ki, bir kişi istəsə öz ailəsini qoruya və möhkəmləndirə bilər. Ailədaxili münasibətləri qorumaq üçün pul yox, sevgi, diqqət, qarşılıqlı inam daha vacibdir. Və əsərin sonunda doğru, həm də səhnədə baş verənləri həyəcanla izləyən tamaşaçıların ürəyində olan bir addım atır...

“Parkda” tamaşası niyə maraqlıdır? Çünki səhnə əsərində hadisələr gündəlik reallığı əks etdirir, dialoqlar sadə və təbii qurulub. Cəmiyyətə bu gün üçün vacib saydığımız mesajları ötürür - bütün çətinliklərə baxmayaraq milli-mənəvi dəyərlərimizə söykənən ailə institutumuzu qorumalıyıq. Qadınlara qarşı şiddət, erkən nikahlar, əksər hallarda pulun hər şeyə qadir kimi görülməsi, sosial şəbəkələrdən asılılıq gələcəyimiz üçün ciddi təhlükədir və.s...



“Parkda” tamaşası həm də gözəl, təbii aktyor oyununa görə maraqla baxılır. Səidə Haqverdiyeva müxtəlif teatrları, fərqli yaradıcılıq üslublarını təmsil edən aktyor və aktrisaları tamaşada bir araya gətirməklə rejissor istedadını növbəti dəfə ortaya qoyub. Türkay Cəfərli, Zülfiyyə Qurbanova, Zümrüd Qasımova, Ülviyə Əliyeva, Gülçöhrə Abdullayeva, Səbinə Məmmədova bu tamaşadakı təbii və inandırıcı ifalarına görə tamaşaçı alqışlarına layiqdirlər. Fiziki əngəlli Babək İsmayılov və Xaqani Əliyev “Parkda” təkcə öz istedadlarını yox, həm də həyatsevərliklərini, əzmkarlığını, cəmiyyət üçün yararlı olduqlarını göstərə bilirlər.

“Parkda” tamaşası əsərin balaca ifaçıları – Aylin Nəcəfli, Selcan Xatun, Hökumə Ağayeva, İbrahim Laçın, İlkin Həsənli və Kamilə Xəlilova üçün də səhnəyə çıxmaq, peşəkar aktyor və aktrisalardan öyrənmək fürsəti qazandırdı.

Tamaşadan bəhs edərkən istedadlı rəssam İqbal Əliyevin verdiyi uğurlu səhnə tərtibatını da unutmaq olmaz.

Əziz teatrsevərlər, “Parkda” baş verənləri izləməyə dəyər...








Bölməyə aid digər xəbərlər
{sape_links}{sape_article}