Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Habil Qurbanovun (adı, soyadı şərtidir) cinayət işi üzrə məhkəmə istintaqı yekunlaşıb.

Reyting.az Pravda.az-a istinadla xəbər verr ki, hakim Firuzə Kərimovanın sədrliyi ilə keçirilən prosesdə hökm oxunub.

Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci bəndi tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib. Habil Qurbanov barəsində seçilmiş başqa yerə getməmək haqqında iltizam qətimkan tədbiri ləğv olunub.

İttiham aktına əsasən, hadisə 26 iyul 2025-ci il tarixdə Abşeron rayonu, Saray qəsəbəsində qeydə alınıb.

Belə ki, Habil Qurbanov həmin gün arvadı S.S,-in (adı, soyadı şərtidir) “WhatsApp”ında iş yoldaşı olan zərərçəkmiş Fərəc Vəliyevlə (adı, soyadı şərtidir) mehribancasına yazışdığını və Abşeron rayonu, Saray qəsəbəsində, DYP postunun yaxınlığında yerləşən “Araz” supermarketin qarşısında görüş təyin etdiyini öyrənib. Bundan sonra təqsirləndirilən şəxs saat 13:00 radələrində qeyd edilən supermarketin qarşısına gəlib.

Hadisə zamanı o, arvadının idarə etdiyi avtomobildə Fərəclə birlikdə olmasını görüb və qısqanclıq zəminində maşının ön qapısını açaraq sürücünün yanında əyləşmiş zərərçəkmiş şəxsin sifət və baş nahiyəsinə qəsdən bir neçə dəfə yumruqla zərbə endirib. Daha sonra Habil Fərəci avtomobildən düşürərək “Araz” supermarketin qarşısında yenidən onun sifət nahiyəsinə qəsdən bir neçə dəfə yumruqla vurub. Nəticədə zərərçəkmiş şəxs sol qaş nahiyəsinin əzilmiş-cırılmış yarası, sol alt göz qapağının qançırı, sağ kürək nahiyəsinin qançırları, eləcə də sağ baldırın sıyrığı şəklində xəsarətlər alıb. Məhkəmə-tibbi ekspertizasının rəyinə əsasən, bu xəsarətlər sağlamlığın qısa müddətə pozulmasına səbəb olan yüngül dərəcəli bədən xəsarətləri kimi qiymətləndirilib.

Məhkəmə iclasında zərərçəkmiş Fərəc Vəliyev ifadəsində bildirib ki, o, “Bravo” mağazasının filiallarının birində müdir müavini vəzifəsində çalışır. O, təqsirləndirilən şəxsin həyat yoldaşı ilə aralarında heç bir münasibətin olmadığını deyib və hazırda Habillə barışdığını, ona dəymiş ziyan ödənildiyini, şikayət və tələbi yoxdur.