NASA-nın kosmik peyklərinin lentə aldığı yeni fotolar növbəti araşdırma mövzusuna çevrilə bilər. Təqdim edilən peyk görüntüləri Səudiyyə Ərəbistanındakı Vadi əl-Batin adlanan qədim qurumuş çay yatağını göstərib ki, tədqiqatçılar da bunu xristianların müqəddəs kitabı Bibliya mətnlərində barəsində bəhs olunan Pişon çayı ilə əlaqələndiriblər.

Reyting.az xəbər verir ki, Vadi əl-Batin Mədinə şəhəri yaxınlığındakı Hicaz yüksəkliklərindən Şimal-Şərqə, eləcə də Küveyt ərazisinə birləşən körfəzə doğru uzanır. Alimlərin ilkin ehtimallarına əsasən, bu bölgədə qədim dövrlərdə çay deltasına bənzər müxtəlif sulu sahələr mövcud olub.

Lakin amerikalı, həmçinin avropalı alimlərin mövzu ilə bağlı fikirləri üst-üstə düşmür və tədqiqatçıların əksəriyyəti ilkin mərhələdə məhz bu ehtimal üzərində elmi müzakirələr aparmağı düzgün hesab edirlər.

Bu mövzuya tamamilə fərqli aspektlərdən yanaşan bəzi alimlər bildiriblər ki, ümumiyyətlə, Bibliya mətnləri gerçək tarixi, o cümlədən ruhani təsvirləri çox qarışıq şəkildə təqdim etdiyindən, böyük şübhələr yaranır. Buna diqqət çəkən elm adamlarının fikrincə, əsrlər boyu baş verən coğrafi dəyişiklikləri nəzərə almaq şərti ilə, peyk vasitəsilə əldə edilən bu görüntülərdəki qurumuş yatağın qədim Pişon çayı olduğunu söyləmək hələ tezdir.

Tədqiqatçılar bununla bağlı araşdırmaların davam etdiyini bildiriblər.

Oqtay QORÇU