Putinin keçmiş kürəkəninin əmlakına həbs qoyulub
Tarix: 26-05-2023 00:44 | Bölmə: Xəbərlər
Putinin keçmiş kürəkəninin əmlakına həbs qoyulub

Hollandiya prokurorluğu Rusiya prezidenti Vladimir Putinin qızı Mariya Vorontsovanın keçmiş əri, iş adamı Jorrit Faassenin torpağını müsadirə edib.

Reyting.az
xəbər verir ki, bu məsələ xarici KİV-lərin araşdırması zamanı üzə çıxıb.

Məlumata görə, Amsterdamın cənub-şərqində, Duivendrehti rayonunda Faassenin 1432 kvadratmetr torpaq sahəsi var. 2021-ci ildə iş adamı bir ev və altı kiçik ofis binasının tikintisi üçün müraciət etsə də, 2022-ci ilin mart ayında Amsterdam bələdiyyəsi Faassenin Putinlə əlaqəsinə əsaslanaraq icazə prosesini dayandırıb.

Hollandiyanın torpaq reyestrindəki qeyddən məlum olur ki, həmin ərazi mayın 12-də milli prokurorluq tərəfindən cinayət istintaqı çərçivəsində maliyyə, iqtisadi və ekoloji qanun pozuntularına görə ələ keçirilib.

Bu, hazırda Moskavada yaşayan Faassenin cinayət təhqiqatına cəlb olunduğunu da göstərə bilər, lakin Hollandiya prokurorluğu həbsin səbəbi və Putinin keçmiş kürəkəninin istintaq altında olub-olmaması ilə bağlı şərh vermir.

Bildirilir ki, Faassen bu yaxınlarda Hollandiyaya gələrkən “sanksiyadan yayınma” şübhəsi ilə Şiphol hava limanında hüquq-mühafizə orqanları tərəfindən dindirilib. Hətta onun noutbukunun və mobil telefonunun müsadirə olunduğu bildirilir. İddia olunur ki, bundan sonra o, Moskvaya qayıtmaq məcburiyyətində qalıb.

Xatırladaq ki, Jorrit Faassen 2008-ci ildə Putinin qızı Mariya Vorontsova ilə evlənib, lakin sonradan cütlük boşanıb. Rusiya mətbuatının yazdığına görə, onların 10 yaşlı oğlu var.

Onu da qeyd edək ki, Rusiyanın Ukraynaya genişmiqyaslı müdaxiləsindən sonra Putinin iki qızı - Mariya Vorontsova və Yekaterina Tixonova 2022-ci ilin aprelində Avropa İttifaqı və ABŞ-ın sanksiya siyahısına salınıb. Amma Faassenə sanksiya tətbiq edilməyib.

E. KAMAL




Bölməyə aid digər xəbərlər
{sape_links}{sape_article}