Belarus müxalifətinin liderlərindən biri olan Vladimir Niklyayev hüquq-mühafizə orqanları tərəfindən saxlanılıb. Rusiya mətbuatı xəbər verir ki, V.Niklyayev martın 25-də keçirilməsi nəzərdə tutulan icazəsiz etiraz aksiyasının təşkilatçılarından biridir.

Qeyd edək ki, martın 17-də keçirilən etiraz aksiyasından sonra V.Niklyayevə qarşı kütləvi aksiyaların təşkili və keçirilməsi qaydalarının pozulmasına dair inzibati proses başladılıb. Martın 24-də Minsk şəhər Məhkəməsi həmin proseslə bağlı iclas keçirməli idi.

Bir müddət əvvəl Belarus Dövlət Təhlükəsizlik Komitəsi Minskdə martın 25-də baş tutacaq kütləvi iğtişaşların qarşısının alındığı və 26 nəfərə qarşı cinayət işinin açıldığı barədə məlumat yayıb. Aparılan axtarış əməliyyatı nəticəsində saxlanılan şəxslərin yaşadığı yerlərdən çoxlu sayda odlu silah, qumbara, dəyənək, bıçaq, balta, partlayıcı qurğuların hazırlanması üçün istifadə olunan maddələr, dəbilqə, zirehli gödəkcələr, şəhər şəraitində döyüş aparılmasına dair dərsliklər və NATO qüvvələrinə aid tibbi çantalar aşkar edilib.(APA)