Sabiq nazir: “Xalqımız torpaq verən yox, torpaq alan dövlət başçısı görmək arzusuna çatdı”
Tarix: 18-10-2020 00:52 | Bölmə: Slayd
Sabiq nazir: “Xalqımız torpaq verən yox, torpaq alan dövlət başçısı görmək arzusuna çatdı”

Azərbaycan Ordusu Qarabağın işğaldan azad edilməsi üçün uğurlu əməliyyatlar aparır. Əks-hücum nəticəsində Füzuli və Cəbrayıl şəhərləri də daxil olmaqla, Hadrut qəsəbəsi, çoxsaylı kənd və strateji baxımdan əhəmiyyətli yüksəkliklər işğalçılardan təmizlənib.

Dağlıq Qarabağ və ətraf bölgələri 27 ildir işğal altında saxlayan erməni terrorçularına qarşı aparılan uğurlu əməliyyatlardan danışan Azərbaycanın sabiq Təhsil naziri, professor Firudin Cəlilov Reyting.az-a deyib ki, ermənilərin mülki şəxsləri raket atəşinə tutmaqda iki məkrli planı var:

“Ordumuz erməni terrorçuları ilə savaşır. Ermənilər dünyada yeganə millətdir ki, son yüz ildə onlarla terror təşkilatı yaradıblar. “Böyük Hayastan” mifi uydurub, uşaqdan tutmuş qarı-qocalara qədər hamının beynini təbliğatla zəhərləyiblər.

Saytların birində gördüm, yaşlı bir erməni qarı deyir ki, niyə gedək, qan töküb bu torpaqları tutmuşuq? Onlarda artıq belə bir inam yaranıb ki, işğal etdikləri torpaqları geri almaq istəyən olsa, terrorçu qardaşlarına köməyə gələn Kardaşyan kimi, bütün dünya dövlətləri onların müdafiəsinə qalxacaq”.

Professorun sözlərinə görə, itkilərin sayı Hayastanda (Ermənistanı nəzərdə tutur-red.) bilinməsin deyə, gerçək durumu öz xalqından gizlədən işğalçı ölkənin hərbi-siyasi rəhbərliyi savaşda ölənlərin meyitlərini də aparmaq istəmir: “Bütün hallarda humanist davranan, dinc əhaliyə güllə atmayan Azərbaycan Ordusundan fərqli olaraq, ermənilər Qarabağdan kənarda olan şəhər və kəndlərimizə Ermənistandan da raketlərlə atəş açır, evlər dağılır, çoxlu yaralanan və həyatını itirənlər olur. Düşmən bununla iki məkri planını reallaşdırmaq istəyir. Birinci məqsəd ölkə içində çaxnaşma yaratmaqdırsa, ikinci məqsəd Azərbaycan Ordusunun adekvat cavab verəcəyi təqdirdə hərbi ittifaqda olduqları ölkələri rus ordusunun öndərliyilə Azərbaycana qarşı savaşa qoşmaq istəyidir. Bu gözləntilərin ikisi də fiaskoya uğradı, nə evi dağılan azərbaycanlı kəndindən qaçır, nə də müttəfiqlərinin ordusu köməyə gəlir. Hətta gələrsə belə, bu zaman Türk Ordusu seyrçi qalmayacaq”.

Erməniləri ruhi xəstəliyi olan millət sayan istiqlalçı deputat F. Cəlilovun fikrincə, bu xəstəliyin bir diaqnozu və bir müalicə yöntəmi var:

“Mağara təfəkkürü ilə yaratdıqları “Böyük Hayastan” mifi və bu mifologiyanı körükləyən baş keşişdən tutmuş, Xocalıda törətdiyi vəhşiliyi ilə fəxr edən, lakin savaş meydanından qaçmasın deyə, öz əsgərinin əl-ayağını qandallayan zabitlərəcən bu xəstəliyin daşıyıcılarıdır. Bir neçə nəsildən bir, bu xəstəlik kütləvi “qanvermə ilə müalicə olunur”, qanları töküləndə çox qorxsalar da, bir az rahatlaşırlar”.

Ermənistandakı daxili qarşıdurmalara da diqqət çəkən professor qeyd edib ki, hakimiyyət davası İrəvanda əsasən Qarabağ klanı ilə yerli haylar arasında gedir: “Qarabağ klanına qarşı savaşla hakimiyyətə gələn Paşinyan Qarabağda savaşın başlanması üçün əlindən gəldiyi qədər “xidmət” göstərdi, «Qarabağ Hayastandır» deyib, bizim heysiyyatımıza toxundu. O yanda da rusu küsdürdü”.

F. Cəlilov da Qarabağ uğrunda aparılan savaşın Vətən müharibəsi olduğunu deyir:

“Son 30 ildə müstəqil dövlətin vətəndaşı kimi yetişən nəsil əvvəlki ümidsiz azərbaycanlı mentalitetindən arınıb, azadlığın dadlı ovqatına yetişdi. Xalqımız torpaq verən yox, torpaq alan dövlət başçısı görmək arzusuna çatdı. Azərbaycan xalqı etnik kimliyindən, dilindən, dinindən, siyasi baxışından asılı olmayaraq, birləşib dövlətin arxasında durur, Şanlı Ordunun başladığı Vətən müharibəsinə dəstək verir!

Bu ordunun hər gün kəsərli və mahir diplomatik danışığı ilə müxtəlif xarici jurnalistlərə intervü verən, həm də onların dilində mövcud durumu dünyaya çatdıran bir Baş Komutanı var. Artıq düşmənə «İti qovan kimi qovarıq»,- deyən Komutanın əsgəri ilə, generalı ilə səngərdə qəhrəmancasına döyüşüb, tarix yazan Şanlı Ordusu var!”

Sabiq nazirin fikrincə, bu savaşın davamında və ya sonunda bir neçə variant ola bilər:

“Ordumuzun təpəri qarşısında tıncıxan Sorosçu Paşinyanı Rusiya devirib, yenə Qarabağ klanını hakimiyyətə gətirə bilər. Qarşı tərəf masada ağ bayraqla oturub, məğlub olduğunu etiraf etsə, barış danışıqları başlayar. İndiki durumda isə «sülh danışığı» barış deyil, haylara fürsət verməkdir. BMT-nin bəlli qərarlarını vecinə almayan bir dövlətə etibar edilməz.

Başqa bir variant isə savaşın böyüməsi və qonşu dövlətlərin bu savaşa müdaxilə ehtimalıdır. Amma bu, ən az ehtimal olunanıdır. Türkiyə bu savaşa qoşulmasın deyə, hələlik Rusiya qaçaq yolla silah göndərsə də, üzdə “qarışmır”, diplomatik yöndə danışmağı üstün tutur”.

Böyük oğlunun da cərrah kimi cəbhədə yaralı əsgərlərimizin yanında olduğunu bildirən professor sonda diqqətə çatdırıb ki, bugün Azərbaycan üçün çox əlverişli bir şərait yaranıb, arxa cəbhə ön cəbhə ilə birlikdə çalışır:

“Türk qardaşlarımızın dəstəyi, savaşöncəsi birgə təlimlər bu Vətən müharibəsində çox önəmli oldu.

Dünyanın gözü önündə XXI əsrin savaş meydanında düşmənə «master klass» verərək Vətən uğrunda savaşan igid əsgərlərimizi Tanrı qorusun!”

Reyting.az




Bölməyə aid digər xəbərlər
bütün xəbərlər
{sape_links}{sape_article}