Ermənistanda vəziyyət nəzarətdən çıxa bilər
Tarix: 21-11-2020 13:47 | Bölmə: Slayd
Ermənistanda vəziyyət nəzarətdən çıxa bilər

“Noyabrın 10-da müharibənin dayandırılmasına dair üçtərəfli bəyanat imzalandıqdan sonra Rusiya hərbçiləri sülhməramlı missiya kimi Dağlıq Qarabağa yerləşdirilib. Bu ərazilərdə onlar yalnız sülhməramlı missiya həyata keçirməli, konkret olaraq təmas xəttində yerləşməlidirlər. Həmçinin buna paralel olaraq atəşkəs rejiminə nəzarət mərkəzi yaranır. Həmin mərkəzdə Rusiya hərbçiləri ilə yanaşı Türkiyə hərbçiləri də yer alacaq. Aydındır ki, bölgəyə sülhməramlı göndərən Rusiyanın üzərinə böyük vəzifə və məsuliyyət düşür”.

Bu fikirləri Reyting.az-da siyasi analitik Oqtay Qasımov əldə olunan atəşkəs, Ermənistanda baş verən hadisələr və bu gün Rusiyadan Yerevana gələn yüksək çinli nümayəndə heyətinin məqsədləri barədə danışarkən deyib.

O. Qasımov qeyd edib ki, bölgədə yerləşdirilən rus sülhməramlılarının bəzən missiyadan kənar fəaliyyətlərinə də rast gəlinir:

“Sülhməramlıların missiyası bölgədə qarşı-qarşıya duran tərəflərin ortasında yerləşmək, qanunsuz silahlı dəstələri ərazidən çıxarıb, tərki-silah prosesini həyata keçirməkdir. Amma biz görürük ki, missiyanın komandanı general Rüstəmov başda olmaqla bəzi yüksək çinli zabitlər Qarabağdakı terrorçu rejimin rəhbəri, hərbi cinayətkar Arayik Harutyunyanla sıx-sıx təmasda olur, döyüş bölgəsində mövqeləri gəzirlər. Separatçı da bu zaman çəkilən fotoları sosial şəbəkələrdə paylaşaraq bir növ legitim olduğunu göstərməyə cəhd edir”.


O. Qasımov

Siyasi analitik bildirib ki, Rusiya prezidenti münaqişə bölgəsində humanitar reaksiya mərkəzi adlı qurum yaradıb. Onun vəzifəsi həm erməni qaçqınlarının geri qaytarılmasına yardım etmək, həm də infrastrukturun bərpası və digər tədbirlərin görülməsinə kömək etməkdir. Halbuki bu, sülhməramlı missiyanın fəaliyyətinə daxil olan məsələ deyil.

O. Qasımov əlavə edib ki, Dağlıq Qarabağ ərazisində tarixi və dini abidlər var: “Bu abidələr hələ sovet dövründə Azərbaycan dövləti və xalqı tərəfindən həssaslıqla qorunub. İndi bu məsələlər də süni olaraq gündəmə gətirilir. Məsələn, elə götürək Kəlbəcərin Vəng kəndindəki alban kilsəsini. Hansı ki, buna erməni “Dadivank” adı qoyublar, guya qədim erməni kilsəsidir. Amma bunun erməni abidələrinə aidiyyəti yoxdur. Həmin məbəd isə hər zaman qorunub. Məbədin Vəng kəndində yaşayan mühafizəçisinin övladları indi də həyatdadır. Həmin kilsənin yanında ermənilərin yandırdıqları ev isə uzun illər məbədə baxan Yusif kişinin evidir”.

O. Qasımov qeyd edib ki, Rusiyanın son günlər Ermənistanla bağlı vəziyyətə həssas yanaşmasının müxtəlif səbəbləri ola bilər:

“Diqqət etdikdə görürük ki, Rusiya xarici işlər, müdafiə, səhiyyə nazirləri, habelə Baş nazirin müavini Yerevana səfər edir. Ola bilsin ki, Rusiya Ermənistanda son hərbi məğlubiyyətdən sonra hərbi-siyasi gərginliklə bağlı vəziyyətin nəzarətdən çıxmasından ehtiyat edir. Noyabrın 10-dan sonra Ermənistanda insanlar Paşinyan başda olmaqla hakim komandanın istefasını tələb edir. Eyni zamanda 10 noyabr anlaşmasına qarşı çıxır, bu razılaşmanı qəbul etmədiklərini bildirirlər. Siyasi baxımdan Ermənistanda vəziyyət gərgindir, hər an nəzarətdən çıxa bilər.

Ötən gün Rusiya prezidenti Putinin yanında münaqişə bölgəsindəki durum müzakirə edildi. Orada Lavrov üstüörtülü şəkildə bildirdi ki, üçtərəfli anlaşmanın pozulma təhlükəsi var. Və bundan dərhal sonra yüksək çinli rus rəsmiləri Ermənistana getdilər. Aydındır ki, münaqişə bölgəsində bəzi silahlı qüvvələr sülhməramlılara müqavimət göstərmişdi, nəticədə ölüm halları baş vermişdi. Üstəlik, bir neçə gün əvvəl Rusiya xarici kəşfiyyat xidmətinin rəhbəri Narişkin elan etdi ki, onlarda millətçi qrupların vasitəsilə münaqişə bölgəsində vəziyyəti yenidən alovlandırmaq niyyətlərinin olduğuna dair informasiya var. Görünür, Rusiyada narahatlıq var ki, Ermənistanda dövlət çevrilişi ola və bu anlaşmanın həyata keçirilmə prosesinin qarşısı alına bilər. Məncə, indiki məqamda Rusiya nazirlərinin Yerevana səfəri həm də Paşinyana dəstək məqsədi güdür. Paşinyan devirilsə və onun yerini faşist zehniyyətli şəxslər tutsa, bu zaman Rusiyanın da maraqlarına təhdid yarana bilər. Məncə, Ermənistanda proseslərin nəzarətdən çıxmaması üçün belə bir heyət göndərilib. Bununla həm də mesaj verilir ki, Moskva Ermənistandakı indiki hakimiyyətlə işləməkdə maraqlıdır. Görünən odur ki, Rusiya sevmədiyi Paşinyanla bu prosesi daha irəli aparacağını düşünür”.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}