Üç gün sonra dünya ermənilərin növbəti yalanına şahidlik edəcək
Tarix: 21-04-2021 15:11 | Bölmə: Slayd
Üç gün sonra dünya ermənilərin növbəti yalanına şahidlik edəcək

1915-ci il aprelin 24-ü erməni terror təşkilatları - "Qnçaq”, "Daşnak” və "Ramqavar” rəhbərlərinin həbs olunduğu gündür. Erməni millətçiləri isə tarixi faktları saxtalaşdıraraq, bu təşkilatlar tərəfindən törədilən terror və soyqırımı aktlarını türklərin üzərinə atır, ermənilərin soyqırımına məruz qaldığını iddia edirlər. Amma həqiqət budur ki, soyqırımı aktı, bolşeviklərin dəstəyi ilə erməni terror təşkilatları tərəfindən Azərbaycan əhalisinə və türklərə qarşı törədilib.

Hər il olduğu kimi, bu il də erməni şovinistləri və erməni lobbi təşkilatları dünya ictimaiyyətinə öz yalanlarını sırımağa çalışacaq, müxtəlif vasitələrlə yalanlarının ayrı-ayrı dövlətlər tərəfindən tanınmasına cəhdlər göstərəcəklər. Erməni şovinizminin əsas diqqəti yenə də ABŞ prezidentinə, onun “erməni soyqırımı” ifadəsini işlətməsinə yönələcək.

Məsələ ilə bağlı Reyting.az-a açıqlama verən Türkiyədə yaşayan azərbaycanlı professor Toğrul İsmayıl deyib ki, aprelin 24-də ermənilərin saxta iddiaları əsasında ABŞ prezidenti Con Bayden hətta “erməni soyqırımı” ifadəsini işlətsə belə bu, heç nəyi dəyişməyəcək:

“Tutaq ki, ABŞ bir dəfə “soyqırımı” ifadəsini işlətdi. Nə olacaq?

Birincisi, bu, beynəlxalq hüquqa ziddir. Beynəlxalq hüquqda 1948-ci ildə qəbul edilən razılaşmaya görə, soyqrımlar dövlətləri mühakimə etmir.

İkincisi, müxtəlif dövlətlərin parlamentlərinin verdiyi qərarlar da həmin dövlətlərin mövqeyidir, bunun Türkiyəyə aidiyyəti yoxdur və siyasi mövqedir.

Üçüncüsü, soyqrım iddiası dövlətlər deyil, fərdlər üzərində ola bilər. Buyurub versinlər məhkəməyə”.


T. İsmayıl

Toğrul İsmayıl xatırladıb ki, Rusiya Dövlət Dumasının aşağı palatası saxta soyqırımı qəbul edib: “Eləcə də, səhv etmirəmsə, Argentina 23 dəfə “soyqırım” məsələsini qəbul edib. Nə olsun? ABŞ lideri “soyqırımı” ifadəsini işlətsə, nə olacaq? Dünya Türkiyəyə sanksiya qəbul edəcəkmi? Yox! Dediyim kimi, bunun BMT-yə aidiyyəti yoxdur. Avropa İnsan Haqları Məhkəməsinə müraciət edildi və məhkəmə də bəyan etdi ki, bu tarixi fakt deyil”.

Professor diqqətə çatdırıb ki, əslində soyqırımı iddiaları iki formada təsdiq olunur: “Bunu tarixçilər və beynəlxalq məhkəmələr sübut edə bilər. Bunun üçün xüsusi məhkəmələrin qurulması lazımdır. 1915-ci ildə yaşanan hadisə ilə bağlı bu gün beynəlxalq məhkəmənin qurulması qədər absurd hadisə olmazdı. Bu zaman ABŞ-a da məhkəmə quracaqsan ki, bu qitəyə gələrkən yerli xalqları soyqırımına məruz qoymusunuz. Həm də beynəlxalq məhkəmə qurulsa belə, əldə hər hansı bir sənəd və fakt yoxdur ki, Osmanlı dövlətinin soyqrım etdiyi sübuta yetirilsin.

Ermənilərin ortaya atdığı bütün faktlar saxtadır. Əgər saxta olmasaydı Türkiyənin təklif etdiyi birgə komissiyanı yaradıb arxivləri açar və məsələni birgə araşdırardılar”.

T. İsmayıl əlavə edib ki, soyqırımı iddiaları qlobal güclərin əlində Türkiyəyə qarşı təzyiq vasitəsidir: “Həm də nəsə qoparmaq üçün. Birinci Dünya müharibəsi zamanı bundan ingilislər istifadə etməyə cəhd göstərdi, amma uğur əldə edə bilmədilər və bu işdən vaz keçdilər. Sonradan 1964-cü ildə SSRİ bu məsələni ortaya atdı. Bu o zaman idi ki, Türkiyə NATO-ya üzvü olmuşdu. Yəni təzyiq vasitəsi olaraq bu amilə müraciət etdilər. Sonrakı dönəmdə Qərb ölkələri saxta soyqırımı iddialarından istifadə etməyə çalışdılar”.

T. İsmayıl hesab edir ki, ABŞ prezidenti C. Bayden soyqırımı ifadəsini işlətmək kimi risqə getməyəcək: “Xüsusilə, belə bir zamanda. ABŞ və Rusiya arasında gərginlik var. Türkiyənin əhəmiyyəti artır. Yaxın Şərqdə problemlər movcuddur. Üstəlik, ABŞ və Türkiyə arasında problemlər var. Bütün bunlara saxta soyqrımı ifadəsinin də əlavə edilməsi münasibətlərin ciddi zərbə almasına səbəb olacaq. Yəni saxta soyqırımı məsələsi Türkiyəyə təsir etmək baxımından mənasız bir addımdır”.

Reyting.az




Bölməyə aid digər xəbərlər
bütün xəbərlər
{sape_links}{sape_article}