Generalların hərbi çevriliş planı üzə çıxıb
Tarix: 01-05-2021 12:56 | Bölmə: Slayd
Generalların hərbi çevriliş planı üzə çıxıb

Fransada təqaüddə olan generalların bəyanatından sonra Almaniyada da təqaüdçü generalların hərbi çevriliş planı hazırladıqları üzə çıxıb.

Reyting.az
xatırladır ki, bir müddət əvvəl Fransada ehtiyatda olan hərbçilərin imzaladığı və prezident Emmanuel Makrona vətəndaş müharibəsi təhlükəsi barədə xəbərdarlıq etmələri ölkədə vəziyyəti gərginləşdirmişdi. Hazırda Fransa hökuməti müraciəti imzalayan hərbçilərlə bağlı araşdırma aparır və onlara qarşı sanksiya tətbiq olunacağını açıqlayıb.

Məlumata görə, Almaniyada da ehtiyatda olan minlərlə hərbçi “Telegram” adlı mobil mesajlaşma sistemi üzərindən bir araya gələrək, Berlində qarşıdurma və çevriliş planı hazırlayıblar.

Əvvəl Berlində dərc olunan “Der Tagesspiegel” qəzetində çıxan, ardınca təhlükəsizlik qüvvələrinin təsdiqlədiyi xəbərdə bildirilir ki, “Təqaüdçü və keçmiş Hərbçilər Qrupu” adı altında bir araya gələn 13 minə yaxın keçmiş əsgər və hərbçilər koronavirus pandemiyası çərçivəsində Merkel hökumətinin elan etdiyi qarantin şərtlərini tənqid edib, Berlində keçiriləcək mitinqlərdə dövlət qurumlarına hücumlar həyata keçirmək üçün yaxın təmaslar qurublar.



Təhlükəsizlik mənbələri bu qrupa “Reichburger” üzvlərinin və 1937-ci ildə Almaniyanın sərhədlərini bərpa etməyi hədəfləyən monarxist-sağçı qrupun üzvlərinin daxil olduğunu təsdiqləyib.

Təqaüddə olan alman ordusunun əsgərləri ilə yanaşı 1990-cı ildə ləğv edilən keçmiş Şərqi Alman Ordusunda xidmət etmiş çox sayda şəxsin də qrupda fəal olduğu müəyyənləşib.

Qrupda olan, aralarında general və polkovniklərin də yer aldığı təqaüdçü hərbçilərin fəal olduqları dövrü, xidmət etdikləri birlikləri, əldə etdikləri rütbələri və aldıqları medalların fotolarını yayımlamaları xüsusilə diqqət çəkib.

Qrupdaxili yazışmaları qiymətləndirən mütəxəssislərin fikrincə, üzvlər Hollandiyadakı bənzər bir quruluşu özlərinə nümunə seçiblər.

Qeyd edək ki, ötən ilin yanvarında pandemiya tədbirlərinə qarşı Amsterdamda, eləcədə Lahey və Rotterdamda keçirilən aksiyalarda qarətlər baş verib, aksiyaçı-polis qarşıdurması olub. Həmin vaxt Hollandiya hökuməti sosial media üzərindən bildirmişdi ki, etirazçıların polis tərəfindən həbsinə mane olmaq üçün aksiyaya təqaüdçü hərbçilər də cəlb olunub.

Almaniyadakı qrupu quran, adı gizli saxlanan ehtiyatda olan hərbçinin qrup üzvlərinə “Hərbçi olaraq alman xalqını qoruyacağımıza and içdik. Xalqımızın indi bizə ehtiyacı var. Bu hökuməti devirməyimiz lazımdır”,- mesajını göndərib. Qrupun digər bir üzvü buna “Müharibəyə getmirik, savaşın tam ortasındayıq”,- cavabını yazıb. Adını yazaraq fikir bildirən başqa bir qrup üzvü isə II Dünya savaşında Stalinqrad müharibəsini misal gətirərək “Paytaxtı mühasirəyə alaraq sona qədər savaşmalıyıq”,- mesajını yollayıb. Bu şəxsin aşırı sağçı Almaniya üçün Alternativ Partiyasının (AfD) Brandenburq əyalət parlamentinin deputatı Daniel Freiher von Lüzov olduğu müəyyən edilib. Lüzov 1990-cı illərdə Kosovada xidmət edən alman birliklərində təmsil olunub.

Almaniya Ordusunun Veteranlar Brliyi isə yazılı açıqlama ilə çıxış edib.

“Keçmiş əsgərlər və veteranların hovuzu olaraq bir araya gələn qrup Alman dövlətinin hər birimizin ortaq şəkildə təmsil etdiyi dəyərlərinə qarşı mövqe tuturlar. Federal ordunun keçmiş hərbçiləri olaraq bütün üzvlərimizə konstitusiyamıza bağlı olmağın vacibliyini xatırladırıq”, - açıqlamada bildirilib.

Məlumat üçün qeyd edək ki, son illər aşırı sağ qalmaqallarla gündəmdən düşməyən alman ordusu ilə bağlı iddialar ölkədə ciddi müzakirələrə səbəb olub.

Ötən il bir zabitin kompüterindən Almaniyanın nazir və siyasətçilərinin adı, telefon və şəxsi ünvanlarının olduğu, sui-qəsd məqsədilə hazırlanmış siyahı ələ keçirilmişdi.

2017-ci ildə həbs edilən baş leytenant Franko A-nın üzərindən dövrün prezidenti J. Guak başda olmaqla çoxlu sayda siyasətçinin adının olduğu bənzər siyahı tapılmışdı. Frankonun böyük hücum planı hazırlayaraq bunu miqrantların etməsi kimi göstərməyi hədəf seçdiyi ortaya çıxmışdı.

2018-ci ildə isə “Hannibalın Kölgə Ordusu” adı verilən qrupa qarşı əməliyyat keçirilmişdi. Hərbçilərdən ibarət olan və aralarında bir polkovnikin də olduğu (“X Günü”) qrup üzvlərinin, ölkə siyasətçilərinə qarşı sui-qəsd həyata keçirərək, vətəndaş müharibəsinə başlamaq, bunun ardınca dövlət çevrilişi etmək planı üzə çıxmışdı. Bu hadisədən sonra çoxlu sayda hərbçi ordudan qovulmuşdu.

Reyting.az




Bölməyə aid digər xəbərlər
bütün xəbərlər
{sape_links}{sape_article}