İrəvandakı partlayışla Sumqayıtdakı hadisə arasında paralellik var
Tarix: 17-08-2022 15:56 | Bölmə: Slayd
İrəvandakı partlayışla Sumqayıtdakı hadisə arasında paralellik var

İrəvan şəhərindəki “Sürməli” ticarət mərkəzində baş verən partlayışdan sonra Ermənistanda Rusiya əleyhdarları fəallaşıb. Xüsusilə sosial şəbəkələrdə Rusiya əleyhinə çağırış edənlər baş verən hadisəyə görə bu ölkəni ittiham edirlər.

Ermənistanın fövqəladə hallar naziri Armen Pambuxçyan baş verənlərin terror aktı olmadığını bildirsə də, qəzəbli insanlar hadisənin Kremlin sifarişi ilə törədildiyini deyirlər.

Sifarişçi Kremldir?

Partlayış anının videosuna baxsaq, bunun terror aktı olmadığı görünür. Lakin hadisənin məqsədli və planlı şəkildə təşkil edilməsi də reallıqdır. “Sürməli” ticarət mərkəzində baş verən partlayışın Rusiyanın təlimatı ilə reallaşdığını düşünmürəm.

Əvvəla, ona görə ki, indiki məqamda Kremlin Ermənistanla münasibətləri korlamasına səbəb yoxdur. Rusiya yaxşı başa düşür ki, Ermənistanla münasibətlərin pozulması rəsmi Moskvanın Cənubi Qafqaza təsirini zəiflədəcək. Bu isə hər şeydən əvvəl Paşinyan və onu hakimiyyətə gətirən Qərbin maraqlarına uyğundur.

Təsadüfi deyil ki, artıq Kreml sosial şəbəkələrin erməni seqmentində “Sürməli” ticarət mərkəzində baş vermiş partlayışlarla bağlı Rusiyanın ittiham olunmasından ciddi narahatdır.

Hətta Rusiya Ermənistan Xarici İşlər Nazirliyinə nota da göndərib. "Biz bunu Rusiya-Ermənistan müttəfiqlik münasibətlərinə xələl gətirmək məqsədi daşıyan bu cür eyhamların arxasında duran siyasi qüvvələrin birbaşa təxribatı kimi qiymətləndiririk. Biz Ermənistan hakimiyyətindən bu cür qeyri-dost təzahürlərin qarşısını almağa yönəlmiş addımlar gözləyirik”, - bəyanatda bildirilib.

Notanın məğzindən də göründüyü kimi, Kreml baş verən hadisəyə görə hədəf olaraq göstərilməsindən narahatdır. Yəni bu hadisəni Rusiya etsəydi, Kreml proses sonrası hadisələrə nəzarət edər və ya özü moderatorluq edərdi.

Sifarişçi Qərb, icraçı Ermənistandır!

Qəribə səslənsə də “Sürməli”dəki hadisənin Paşinyan administrasiyası tərəfindən Qərbin sifarişi əsasında gerçəkləşdiyini düşünürəm. Məsələ ondadır ki, Qərb uzun müddətdir Ermənistanı Rusiyanın episentrindən çıxarmağa çalışır. Bu istiqamətdə ən real addım Sorosun dəstəklədiyi inqilab yolu ilə Nikol Paşinyanı hakimiyyətə gətirmək oldu. Lakin bunun xaricində Qərb istəklərinə tam nail ola bilməyib. “Sürməli”dəki hadisəni isə bu günə qədər atılan ən radikal addım hesab edirəm. Məqsəd bəllidir. Qərb yaxşı başa düşür ki, 44 gülük müharibə və digər hadisələr sonrası Ermənistanda ciddi bir anti-Rusiya düşüncəsi hakimdir. İndi bu düşüncəni daha da qabartmaq lazımdır. “Sürməli”dəki hadisənin əsas məqsədi məhz budur.

Hadisədən sonra sosial şəbəkələrdə qəzəbli kütlənin anti-Rusiya paylaşımları etməsi və Kremlin buna görə Ermənistana nota verməsi də prosesin istənildiyi kimi getdiyindən xəbər verir.

Prinsip etibarilə, ənənəvi erməni siyasəti üçün öz xalqına silah çəkmək, ya da canına qəsd etmək ilk hal deyil. 19-cu əsrdən etibarən “Daşnaksütun”, “Xınçak” kimi ultramilliyyətçi erməni təşkilatları sözdə erməni maraqları naminə yeri gəldikdə öz soydaşlarına qarşı da terror aktı törətməkdən çəkinməyiblər. Yaxın tarixə nəzər saldıqda məlum Sumqayıt hadisələri də məhz bu ssenari ilə təşkil edilmişdi. Həmin adisənin də pərdəarxasında məhz ermənilər dayanmışdı və öz soydaşlarına qarşı hücumlar təşkil edib müqəssir kimi azərbaycanlıları göstərmiş, beləcə, Ermənistanda millətçiliyi, Qarabağda seperatçılığı aktivləşdirmişdilər.

Bu mənada Sumqayıt hadisələri və “Sürməli”dəki hadisə arasında paralellik aparmaq olar. "Sürməli"dəki hadisənin də icraçısı məhz Ermənistan iqtidarıdır və məqsəd şübhəsiz, ölkə daxilində anti-Rusiya görüşlərini artırmaq mümkün dərəcə radikallaşdırmaqdır!

Turan RZAYEV





Bölməyə aid digər xəbərlər
21-09-2022, 15:10 Putinə təzyiqlər artır

{sape_links}{sape_article}