Zərdüşt Əlizadə: “ABŞ Azərbaycana problem yarada bilməz”
Tarix: 19-09-2022 17:49 | Bölmə: Slayd
Zərdüşt Əlizadə: “ABŞ Azərbaycana problem yarada bilməz”
Zərdüşt Əlizadə

“ABŞ Konqresinin Nümayəndələr Palatasının sədri Nensi Polesinin Ermənistana səfərinin bəlli məqsədləri var. Amerika Ermənistanı Rusiyadan qoparmağa çalışır. İstəyirlər ki, Ermənistan Rusiyanın təsirindən Amerikanın təsir dairəsinə keçsin. Buna görə də, maliyyə, xoş söz, heç bir ümid olmasa da, Qarabağ məsələsində status kimi elementləri qabartmaqla, Polesi kimi fiqurların səfərləri ilə çalışırlar ki, Ermənistanı öz tərəflərinə çəksinlər. Ermənistan da ömür boyu alət, təsir altında olan dövlətdir. Hazırda Ermənistan Rusiyadan gözlədiyini ala bilmədiyi üçün özünə yeni hami axtarır. Belə düşünürlər ki, yeni hami Amerika ola bilər. Odur ki, böyük həvəslə Amerikanın aləti olmağa çalışırlar”.

Bunu Reyting.az-a politoloq Zərdüşt Əlizadə deyib.

Z. Əlizadə diqqətə çatdırıb ki, N. Polesi və digərləri başda olmaqla, ABŞ Azərbaycana problem yarada bilməz: “Əslində problemi biz özümüz özümüzə yaradırıq. Müəyyən ədalətsizliklər, problemlər varsa, onlar həllini tapmalıdır”.

Z. Əlizadə ABŞ Konqresində Azərbaycana qarşı hansısa qətnamənin hazırlanması məsələsinə də ciddi yanaşmır: “Buyurub, hazırlasınlar. Bu qətnamə ilə nə edəcəklər, hara qoyacaqlar? Mənim üçün çox maraqlıdır. Əslində Azərbaycan dünyaya daha çox neft və qaz satır. Üstəlik, Rusiyaya pomidor, xiyar və digər kənd məhsulları göndərir. Odur ki, mən belə sanksiyaların olacağını gözləmirəm”.

Politoloq bildirib ki, ən pis halda Azərbaycanı “təcavüzdə” ittiham edə bilərlər: “Məsələn, tutaq ki, dedilər “Azərbaycan təcavüzkardır”. Sonra nə olacaq? Ermənistanı 27 ildən çox təcavüzkar adlandırırdılar. Bəyəm Ermənistanın üzüyünün qaşı düşürdü?”.

Z. Əlizadə hesab edir ki, ABŞ-ın Azərbaycanı ittiham etməsinin o qədər də perspektivi yoxdur. Amma belə fikirlər şənimizə, imicimizə müəyyən təsir göstərə bilər.

Reyting.az





Bölməyə aid digər xəbərlər
21-09-2022, 15:10 Putinə təzyiqlər artır

{sape_links}{sape_article}