ASC-nin vəzifəli şəxsinin adı korrupsiyada hallanır - Video
Tarix: 29-11-2022 23:43 | Bölmə: Slayd
ASC-nin vəzifəli şəxsinin adı korrupsiyada hallanır

Azərbaycan Respublikasının Prezidenti İlham Əliyev məmurların fəaliyyətindəki çatışmazlıqlardan dəfələrlə söz açaraq onlara xəbərdarlıq etsə də, deyəsən, bəzi vəzifəli şəxslər bundan nəticə çıxarmaq istəmir. Prezident belə bir xəbərdarlığı hələ neçə il bundan əvvəl Ucar şəhərinin su təchizatı sisteminin yenidən qurulması layihəsinin başa çatdırılması münasibətilə təşkil olunan mərasimdə də edib. Amma buna baxmayaraq, bu rayonda da məmurların yarıtmaz fəaliyyətindən və süründürməçiliyindən əziyyət çəkən xeyli sayda sakin var.

Yerli məmurlardan narazı olanlardan biri də Ucar rayonunun Yuxarı Şilyan kənd sakini Beyput Abbas oğlu Əhmədovdur.

B. Əhmədov Reyting.az-a göndərdiyi şikayət məktubunda Ucar rayon icra hakimiyyətinin başçısı Mənsur Məmmədovun qardaşı Müşfiq Məmmədovu səlahiyyət həddini aşmaqda və korrupsiyada ittiham edir.

Şikayətçi yazır ki, icra başçısının Ucar suvarma sistemləri idarəsinin müdiri vəzifəsində çalışan qardaşı M. Məmmədov kəndlilərə süni problemlər yaradır, onun yarıtmaz fəaliyyəti səbəbindən əkin sahələri məhv olur.

Rayonun Yuxarı Şilyan kəndində bələdiyyəyə məxsus 18 hektar sahəni uzunmüddətli müqavilə əsasında icarəyə götürdüyünü qeyd edən B. Əhmədov hər il orada taxıl əkir. Amma bu dəfə taxıl əkinindən sonra ciddi problemlə üzləşib:

“Bu il əkin işlərindən əvvəl Ucar suvarma sistemləri idarəsinin müdiri Müşfiq Məmmədovun qəbuluna gedib, əkindən sonra su ilə təmin oluna biləcəyimi soruşdum. Müşfiq Məmmədov mənə bildirdi ki, suvarma suyu ilə bağlı problem yoxdur, get, əkin işlərini apar. Mən də 3000 manatdan çox pul xərcləyib 18 hektar torpaq sahəmi şumlatdırıraq taxıl əkdim. Amma suvarma vaxtı gələndə Müşfiq Məmmədovun tələb etdiyi artıq vəsaiti verə bilmədim. Bu səbəbdən M. Məmmədov mənə bildirdi ki, əkin suyu ilə təmin olunmaq üçün səninlə müqavilə bağlanmalıdır. Buna görə sənədlərimi hazırlayıb M. Məmmədova təqdim etdim. Amma o, mənimlə müqavilə bağlamaqdan imtina etdi. Bu qanunsuz əməlinə haqq qazandırmaq üçün dedi ki, həmin əraziyə su gəlmir, ona görə müqavilə bağlaya bilmərik”.

B. Əhmədov M. Məmmədovun dedikləri ilə razılaşmır: “Bu, yalan və qanunsuzluqdur. Sadəcə, Ucar suvarma sistemləri idarəsinin müdiri Müşfiq Məmmədovun mənim əkin sahəmə su verməməsi üçün bəhanədir. Əvəzində qonşuluqdakı əkin sahələrinə su kifayət qədər verilir. Hətta bunun çəkilişini də aparmışam”.

Video:

Şikayətçi qeyd edir ki, Ucar suvarma sistemləri idarəsinin Yuxarı Şilyan kəndində olan əməkdaşı suvarma arxının qarşısını bəndləyib, suyu yalnız əlbə-əl pul aldıqları şəxslərin əkin sahələrinə verir.

B. Əhmədov yazır ki, 1 ay 18 gündür taxıl əksə də, onun sahəsinə su verilməyib, ancaq 4 gün əvvəl əkin işi aparanların sahəsi su ilə təmin olunub.

Yuxarı Şilyan sakini şikayət məktubunda qeyd edir ki, müqavilə əsasında suya görə ödənən vəsait dövlət büdcəsinə keçirilsə də, əlbə-əl alınan pul M. Məmmədova çatır.

Şikayətçi üzləşdiyi problemlə əlaqədar Ucar Rayon İcra Hakimiyyətinin şöbə müdiri Vaqif Mehdiyevin və Dövlət Aqrar İnkişaf Mərkəzinin rəhbəri Rəhman Səfərovun dəfələrlə qəbulunda olsa da, tədbir görülməyib. “Çünki icra başçısı olan qardaşına güvənən Müşfiq Məmmədov Ucar suvarma sistemləri idarəsini şəxsi təsərrüfatı kimi idarə edir. O, həftənin 6 gününü Bakıdakı evində olur, bir gün isə yığılan pulları aparmaq üçün idarəyə gəlir”, - B. Əhmədov yazır.

Hazırda Beyput Əhmədovun ümidi “Meliorasiya və Su Təsərrüfatı” ASC-nin sədri Zaur Mikayılovun Ucar rayonuna gözlənilən səfərinədir: “Deyilənə görə, Zaur Mikayılov 09 dekabr 2022-ci il tarixdə Ucara gələrək vətəndaş qəbulu keçirəcək. Bu xəbər Ucar sakinlərini çox sevindirir. Mən də həmin qəbula yazılmışam və inanıram ki, Z. Mikayılov işinin öhdəsindən gələ bilməyən korrupsiyaya qurşanmış Müşfiq Məmmədov barəsində tədbir görəcək”.



Oğlu Rafiqin Vətən müharibəsi veteranı olduğunu yazan B. Əhmədov iddia edir ki, Ucar suvarma sistemləri idarəsində “ölü canlar” da var: “Yəni adı işdə olub, Bakı şəhərində yaşayan çoxlu sayda həmin işçilər bunun müqabilində M. Məmmədova aylıq haqq verirlər. Hətta staj xatirinə adları həmin idarənin əməkdaşı kimi göstərilən şəxslərdən bəzilərinin maaş kartı Müşfiq Məmmədovun cibindədir”.

Sonda təəssüflə bildiririk ki, “Meliorasiya və Su Təsərrüfatı” Açıq Səhmdar Cəmiyyətindən (ASC) məsələyə münasibət öyrənmək cəhdlərimiz alınmadı. ASC-nin aidiyyəti şəxsi nə artıq üç gündür elektron formada göndərdiyimiz sorğumuza cavab verdi, nə də telefon zənglərimizə.

P. S. Redaksiya B. Əhmədovun ittihamları ilə razılaşmır, M. Məmmədovun da mövqeyinə hörmətlə yanaşır və məsələyə münasibətinə yer ayırmağa hazırdır.




Bölməyə aid digər xəbərlər
{sape_links}{sape_article}