Professor: “İran bu terrora görə cavab verməlidir”
Tarix: 27-01-2023 18:38 | Bölmə: Slayd
Professor: “İran bu terrora görə cavab verməlidir”
Cümşüd Nuriyev

“İran tərəfinin müxtəlif ölkələrin səfirliklərinə hücumları həmişə olub. Vaxtilə Amerika səfirliyinə, eləcə də Səudiyyə Ərəbistanı səfirliyinə qarşı da terror aktları törədilib. Amma Azərbaycanı bu ölkələrlə eyni səviyyəyə qoymaq İran üçün biabırçılıqdır. İran səfirliyimizi qorumaq məsələsində məsuliyyət daşısa da, Vyana Konvensiyasını kobud şəkildə pozub”.

Bunu Reyting.az-a professor Cümşüd Nuriyev Azərbaycanın Tehrandakı səfirliyinə terror hücumundan danışarkən deyib.

C. Nuriyev Tehranın polis rəisinin Azərbaycan səfirliyinə hücumla bağlı dediklərinə də münasibət bildirib:

“Polis rəisi deyib ki, adamın ailə problemi olub, bu səbəbdən səfirliyə gəlib. Ailə problemi olan səfirliyə niyə avtomatla gəlsin? Həm də ailə problemi varsa, niyə xanımını, övladlarını deyil, səfirliyin təhlükəsizlik xidmətinin əməkdaşını öldürüb?

Polis rəisi deyir ki, səfirliyə iki uşaqla gəlib. Bizim nümayəndəmiz şəhid olub, amma terrorçunun özünə və uşaqlarına atəş açılmayıb. Bu da xüsusi qeyd edilməlidir”.

Professor iddia edir ki, səfirliyə hücum əvvəlcədən planlaşdırılıb: “İran bunu əvvəlcədən hazırlamışdı. Əvvəl dedilər terroru törədən ermənidir, sonra bildirdilər ki, ailə problemi olub və s. Qısası, İran bu terror hadisəsinə görə məsuliyyət daşıyır”.

C. Nuriyevin sözlərinə görə, Azərbaycan beynəlxalq məhkəmədə İrana qarşı iddia qaldıra bilər: “İran buna görə konpensasiya ödəməli, bunun cəzası olmalıdr”.

Müsahibimiz əlavə edib ki, cinayətin baş verməsini əks etdirən kadrlara baxdıqda bir çox məsələlər üzə çıxır:

“Mühafizəçilər terrorçunun qarşısını almasaydı səfirlikdə bütün əməkdaşlarımız qətlə yetirilərdi.

Düşünürəm ki, hücum edən peşəkar olub, buna öncədən hazırlaşıb. Mən ehtimal edirəm ki, bu terroru “Əl-Qüdsi”, SEPAH və ya Bəsicilər edə bilər. “Əl-Qüdsi” dünyada terrorla məşğul olur, əsasən İranın tapşırıqlarını icra edir. Onlar uzun müddət Azərbaycanı hədələyirdilər. Bir sözlə, bunun ssenarisi əvvəlcədən hazırlanıb. İran dövləti buna görə cavab verməlidir”.

E. KAMAL
Reyting.az




Bölməyə aid digər xəbərlər
{sape_links}{sape_article}