“ABŞ vitse-prezidenti Ceyms Devid Vensin Azərbaycana və Ermənistana səfəri təkcə regional deyil, eyni zamanda qlobal xarakter daşıyır. Məncə, bu səfər Amerikanın Cənubi Qafqazda təsirini nümayiş etdirməsi kimi dəyərləndirilə bilər və bu istiqamətdə açıq mesaj verilir. Çünki istər ABŞ prezidenti, istərsə də vitse-prezidenti olsun, onlar adətən böyük dövlətlərə səfər etməyi üstün tuturlar. Lakin Azərbaycan və Ermənistan kimi nisbətən kiçik dövlətlərə səfər etmələri burada konkret siyasi mesajların verildiyini göstərir. Sözsüz ki, buna Cənubi Qafqazın Amerikanın təsir dairəsində olduğunun dünyaya elan edilməsi kimi baxmaq olar. Təsadüfi deyil ki, Vensin səfərindən dərhal sonra Rusiyada Cənubi Qafqazda təsir uğrunda mübarizənin güclənəcəyi ilə bağlı ard-arda radikal mövqelər səsləndirildi”.

Bu fikirləri “Reytinq” qəzetinə açıqlamasında Azərbaycan Demokrat Partiyasının (ADP) sədri Sərdar Cəlaloğlu bildirib.

S. Cəlaloğlu əlavə edib ki, Vensin və ya digər Amerika rəsmilərinin atdığı addımlar ilk növbədə ABŞ xalqının və dövlətinin maraqlarına xidmət edir:

“Əlbəttə, onlar məsələlərə Amerika maraqları prizmasından yanaşırlar. Biz də eyni şəkildə hadisələri Azərbaycan maraqları baxımından qiymətləndirməliyik. Bu tamamilə normaldır, çünki hər bir dövlətin öz məqsədləri və milli maraqları mövcuddur”.

ADP sədrinin fikrincə, Vensin səfəri Cənubi Qafqaz ölkələri arasında müəyyən balansdan xəbər verir:

“Düzdür, hələlik Gürcüstan bu prosesdə iştirak etmir. ABŞ-nın gələcəkdə bölgədə hansı ölkəyə daha çox üstünlük verəcəyi məsələsi də gündəmdə ola bilər. Ermənistanın hərbiləşdirilməsi ilə bağlı Vensin səsləndirdiyi fikirlər də diqqətçəkicidir. Məncə, bununla Amerika Rusiyanın boşaltdığı rolu, yəni Ermənistanın hərbi təchizatı məsələsini öz üzərinə götürmək niyyətini ortaya qoyur. Eyni zamanda Ermənistanın xristian ölkə olması ona müəyyən üstünlük yarada bilər. Bu, sözsüz ki, bizə də bir mesajdır və Azərbaycan üçün hər zaman öz milli maraqları daha vacibdir”.

Müsahibimizin sözlərinə görə, Vens səfər zamanı Azərbaycanda investisiyalardan bəhs etməyib və Qarabağın yenidən qurulması prosesində iştirakla bağlı fikir səsləndirməyib. Ola bilsin ki, bunu Azərbaycanın iqtisadi imkanlarının daha geniş olması ilə əlaqələndirirlər.

S. Cəlaloğlu vurğulayıb ki, Azərbaycan Amerika üçün strateji müttəfiq kimi mühüm əhəmiyyət kəsb edir:

“Bəli, müəyyən hərbi gəmilərin alınması və hərbi sahədə əməkdaşlıq məsələləri gündəmdədir. Eyni zamanda 907-ci düzəlişin ləğvi də baş verib. Digər tərəfdən, Azərbaycan paralel şəkildə Rusiya və Çinlə də strateji əməkdaşlıq üzrə sazişlər imzalayıb. Bunlar bir-biri ilə rəqabət aparan ölkələrdir və gələcəkdə aralarında qarşıdurma ehtimalı da istisna deyil. Ümumilikdə isə bu səfər göstərdi ki, ABŞ Azərbaycana dəyər verir və onu özündən uzaqlaşdırmaq niyyətində deyil”.

Nemət ORUCOV

Reyting.az