Asim Mollazadə: “Azərbaycan tarixi həqiqəti bərpa edir”
Tarix: 23-07-2021 14:42 | Bölmə: Slayd
Asim Mollazadə: “Azərbaycan tarixi həqiqəti bərpa edir”

44 günlük Vətən savaşından sonra Azərbaycanın leksikonuna Zəngəzur dəhlizi ilə yanaşı Şərqi Zəgəzur iqtisadi rayonu da daxil olub. Eyni zamanda vaxtilə bolşeviklərin diqqtəsi ilə yaradılmış “Dağlıq Qarabağ” ifadəsi və separatçıların bu bölgə üçün əsası olmayan status tələbləri gündəlikdən çıxarılıb. Azərbaycan prezidenti İlham Əliyev dəfələrlə bəyan edib ki, erməni separatçılarının və onların havadarlarının bu haqsız tələbinin yerinə yetirilməsi mümkünsüzdür.

Milli Məclisin üzvü, Demokratik İslahatlar Partiyasının sədri Asim Mollazadə isə Reyting.az-a deyib ki, Azərbaycan dövləti və prezidenti bununla tarixi həqiqəti bərpa edir.

Şərqi Zəngəzur və Qarabağ iqtisadi rayonları ilə bağlı məsələyə gəldikdə, A. Mollazadə əlavə edib ki, bu məsələlərin siyasi müstəviyə gətirilməsi haqda fikirlər var: “Ancaq mən burada hansısa siyasi terminologiya görmürəm. Bu ərazilər Azərbaycanın tarixi və coğrafiyası ilə bağlıdır. Məncə, burada siyasi çalarlar axtarmaq o qədər də cəlbedici deyil. Şəxsən mən burada siyasət görmürəm. Gördüyüm odur ki, Azərbaycan dövləti beynəlxalq hüquq əsasında tarixi həqiqətləri bərpa edir. Məncə, bunun özü mühüm prosesdir. İllər boyu qədim Azərbaycan bölgələrinin adlarının rus imperiyası, sovet rejimi tərəfindən dəyişdirilməsi, bunun ardınca azərbaycanlıların etnik təmizlənmə siyasəti uzun illər bir millətə və dövlətə qarşı həyata keçirilən cinayətin nəticəsidir”.

A.Mollazadə xatırladıb ki, BMT Təhlükəsizlik Şurasının uzun illər icra olunmayan dörd qətnaməsini, habelə bir sıra beynəlxalq qurumların sənədlərini Azərbaycan dövləti özü icra edib: “Bu da tarixi ədalətin bərpası ilə həyata keçirildi. Zəngəzur və Qarabağ iqtisadi rayonları da bu ədalətin bir parçasıdır”.

Deputat bildirib ki, Qarabağ siyasi deyil, coğrafi termindir: “Həm də Azərbaycanın dilbər guşəsinin adıdır. Mən burada siyasət görmürəm. Bəli, əvvəl siyasiləşmiş işğal var idi, indi onun qarşısı alınıb”.




Bölməyə aid digər xəbərlər
{sape_links}{sape_article}