11:29 / 07-12-2021
Azərbaycan nefti bahalaşır
Paşinyan yenidən təhlükəli oyuna başlayıb - Politoloq
Tarix: 24-11-2021 16:31 | Bölmə: Slayd
Paşinyan yenidən təhlükəli oyuna başlayıb

“10 noyabr anlaşmasının 9-cu maddəsinin konkret şərti var. Bu şərtə görə Mehri üzərindən Naxçıvanı Azərbaycanın qərb rayonları ilə birləşdirən yol açılmalıdır. Bu yolda vətəndaşların və nəqliyyat vasitələrinin sərbəst hərəkətinə şərait yaradılmalı, Ermənistan bunun təhlükəsizliyinə təminat verməlidir. Yolun tənzimlənməsini isə Rusiya Sərhəd Qoşunlarının müvafiq hərbçiləri həyata keçirməlidir. Konkret öhdəlik budur. Fikrimcə, Paşinyanın son çıxışında səsləndirdiyi fikirlərə söz oyunu kimi baxmaq lazımdır”.

Bu sözləri Reyting.az-a politoloq Oqtay Qasımov Ermənistan Baş naziri Nikol Paşinyanın son çıxışını şərh edərkən deyib.

O. Qasımov bildirib ki, N. Paşinyanın “10 noyabr anlaşmasında dəhliz ifadəsi yoxur”,- deməsi əsassızdır: “10 noyabr razılaşmasında iki dəhlizdən söhbət gedir. Bunlardan biri Laçın dəhlizidir - hansıki Azərbaycan bu günə qədər həmin dəhlizlə bağlı üzərinə götürdüyü öhdəlikləri yerinə yetirir. Başqa sözlə, Qarabağdakı ermənilərin Ermənistana sərbəst hərəkətinə imkan yaradır, təhlükəsizliklərinə təminat verir. Burada da nəzarəti rus sülhməramlıları həyata keçirir.

İkinci dəhliz Mehridən keçən yolla bağlıdır. Burada “dəhliz” ifadəsi olmasa da, ən azından “yol” ifadəsi var. Odur ki, Ermənistan üzərinə düşəni etməlidir. Yoxsa söz oyununa, “Ermənistan istəsə bunu edər, istəsə etməz...”,- kimi fikirlər səsləndirməyə ehtiyac yoxdur”.

Politoloq əlavə edib ki, 10 noyabr üçtərəfli razılaşması beynəlxalq sənəd olduğundan Ermənistan üzərinə götürdüyü öhdəlikləri yerinə yetirməyə borcludur.

O. Qasımovun fikrincə, Laçın dəhlizi ilə Zəngəzur dəhlizinin statusu eyni olmalıdır: “Azərbaycan cəmiyyətinin istək və tələbləri bundan ibarətdir. Əslində üçtərəfli razılaşmanın tələblərinə görə, Laçın və Mehri ərazisindən keçən yolların statusu eyni olmalıdır. Əgər Laçın yoluna “dəhliz” ifadəsi şamil edilirsə, bu, Mehridən keçəcək yola da şamil edilməlidir. Yox, əgər Mehridən keçən yola bu status verilmirsə, Laçından keçən yolun dəhliz statusu da adi səviyyəyə endirilməlidir. Azərbaycanın bu məsələdə tutduğu mövqe reallığa əsaslanır. Bu mənada düşünürəm ki, Paşinyan sadəcə oyun oynayır”.

Politoloq əlavə edib ki, Ermənistanın hökumət başçısının Azərbaycanın “Zəngəzur” və “Şərqi Zəngəzur” ifadələrini işlətməsinə qarşı çıxması da əsassızdır: “Ümumiyyətlə, Paşinyan söz oyunbazıdır, hər an dəyişə və bir-birinin əksinə fikirlər səsləndirə bilər.

Əvvəla Zəngəzur tarixi Azərbaycan torpağıdır. Hazırda onun qərb hissəsi Ermənistan ərazisində qaldığı üçün Şəqi Zəngəzur ifadəsi işlədilir. Azərbaycan dövlət başçısı da öz çıxışlarından dəfələrlə bildirib ki, Zəngəzur tarixi Azərbaycan torpağı olsa da, iddialar irəli sürmür. Əksinə, Ermənistandan bu gün əsas tələb odur ki, sərhədlərin müəyyən edilməsi üçün demarkasiya prosesinə başlasın, kommunikasiyaların blokdan çıxarılması üçün addımlar atsın və sülh müqaviləsinin imzalanması üçün qarşılıqlı şəkildə ərazi bütövlüyünü tanısın. Hadisələr göstərir ki, Ermənistan tərəfi bundan yayınmaq bir yana, Azərbaycana qarşı ərazi iddiaları sürməkdə də davam edir. Həm Paşinyanın, həm də digər erməni rəsmilərinin dilindən Qarabağdakı ermənilərə status verilməsi kimi cəfəngiyyat fikirlər səsləndirilir. Bu gün də Qarabağda Ermənistanın ordu qalıqlarının olması göstərir ki, bu ölkə işğalçılıq siyasətini davam etdirir və yenə də əsassız ərazi iddiaları irəli sürür”.

O. Qasımov sonda qeyd edib ki, N. Paşinyan səsləndirdiyi bəyanatlarla daxildəki narazı erməniləri ələ almağa çalışır.




Bölməyə aid digər xəbərlər
bütün xəbərlər
{sape_links}{sape_article}