“Aqrolizinq” fermerlərə kələk gəlir Şikayət
Tarix: 12-03-2018 20:17 | Bölmə: Xəbər lenti
“Aqrolizinq” fermerlərə kələk gəlir

“Aqrolizinq” Açıq Səhmdar Cəmiyyətinin Saatlıdakı bölməsi fermerlərə çatacaq azot gübrəsini açıq bazarda satdırır.


Azot gübrəsinin bir kisəsinin fermerlərə dövlət tərəfindən satışı 9 manat 10 qəpikdir. 9 manat azot gübrəsi üçün, 10 qəpik isə fəhlənin əlmuzdusu kimi hesablanır. Sözügedən gübrənin pərakəndə satışı isə 12 manatdır.

Reyting.az saytı yenicag.az-a istinadla xəbər verir ki, “Aqrolizinq” ASC-nin Saatlı rayonundakı bölməsi fermerlərə çatacaq gübrəni müxtəlif bəhanələrlə satmayıb, pərakəndə bazara çıxarır.

Saatlı rayon Azadkənd kəndinin sakini Babək Hacıyevin sözlərinə görə, azot gübrəsi onlar üçün əlçatmaz arzuya çevrilib. Deyilənə görə, “Aqrolizinq”dən gübrə almaq üçün növbəyə duran fermerlərə sonda “yoxdur, qurtarıb”,- cavab verilir:

“Ancaq həmin xammal mağazalarda 12 manata satılır. Mənə dövlətin 9 manata verdiyi bir maddəni niyə 12 manata almalıyam? “Aqrolizinq” Açıq Səhmdar Cəmiyyətinin Saatlıdakı bölməsi fermerləri süründürməklə məşğuldur. Fermerləri o qədər bezdiriblər ki, bəziləri hətta gedib mağazalardan həmin gübrəni 3 manat artığına alır. Kiçik fermerlər də əlacsızlıqdan, taxılları batmasın deyə, gedib 15-20 manat artıq pul ödəyirlər. Ancaq mən 40 kisə azot gübrəsi almalıyam. 40 kisədə 120 manat pul itirirəm. Kənddən “Aqrolizinq” Açıq Səhmdar Cəmiyyətinin Saatlıdakı bölməsinə hər dəfə gedəndə yük maşınına 30 manat pul verirəm, ancaq əliboş qayıdıram”.

Fermerin iddiasına görə, “Aqrolizinq” ASC-nin Saatlıdakı bölməsi dövlətin fermerlərə verəcəyi azot gübrəsini pərakəndə bazarda satdırır:

“Azot gübrəsini satırlar; ondan qazandıqlarının heç xeyrini görməsinlər. Bunların əlavə qazanc hərisliyinə görə belə getsə taxıl qıtlığı yaranacaq. Azot gübrəsinin vaxtı var, bir müddət sonra onu taxıla vermək mümkün olmayacaq. Onlar qəsdlə belə edirlər ki, gübrəni onların qoyduğu qiymətə gedib mağazalardan alaq. Bu məsələ ilə bağlı çoxlu sayda şikayətçi var”.

Sonda dövlət rəsmilərinə müraciət edən Babək Hacıyev qeyd edib ki, yerli idarələr fermerlərin işini yüngülləşdirmək əvəzinə, ağırlaşdırır, dövlətin cibinə girirlər. Fermer bununla bağlı tədbir görülməsini xahiş edir.




Bölməyə aid digər xəbərlər