12:10 / 25-06-2022
Sabah yağışlı hava olacaq
Vətən savaşına həsr olunan fond açılıb - Fotolar
Tarix: 26-06-2021 16:32 | Bölmə: Mədəniyyət / Xəbər lenti
Vətən savaşına həsr olunan fond açılıb

Azərbaycan Milli Elmlər Akademiyasının (AMEA) Mərkəzi Elmi Kitabxanasında “Qarabağ müharibəsi qəhrəmanları” fondunun rəsmi açılış mərasimi keçirilib. Tədbir İkinci Fəxri Xiyabanda uyuyan şəhidlərimizin ziyarəti ilə başlayıb. Torpaqlarımızın azadlığı və ərazi bütövlüyümüzün bərpası yolunda canlarından keçən qəhrəmanlar ehtiramla yad edilib.

AMEA-nın Mərkəzi Elmi Kitabxanasının Baş direktoru, professor Məmməd Əliyev açılış mərasiminə toplaşanları salamlayıb və bildirib ki, tədbirin Azərbaycan Silahlı Qüvvələrinin 103-cü ildönümü ərəfəsində keçirilməsinin rəmzi mənası var: “Kollektivimiz Azərbaycan kitabxana sistemində bir ilkə imza ataraq “Qarabağ müharibəsi qəhrəmanları” fondu yaradıb. Silahlı Qüvvələrimizin yaranmasının 103 illiyi qeyd olunduğu bu günlərdə belə bir mühüm əhəmiyyət kəsb edən fondun açılması rəmzi məna daşıyır. 44 gün davam edən Vətən müharibəsində rəşadətli ordumuz Ali Baş Komandanının rəhbərliyi altında şanlı bir tarix yazdı. Ərazilərimizin erməni işğalından azad edilməsində dünyaya qəhrəmanlıq nümunəsi göstərən şəhid və qazilərin, əsgər və zabitlərin borcu ödənilməzdir. 30 ilə yaxın müddətdə erməni vandallarının əsarətində qalan şəhər və kəndlərimizdə Azərbaycan bayrağını dalğalandırmaq 3 minə yaxın şəhidimizin qanı bahasına başa gəlib. Onların ruhu qarşısında mənəvi borcumuzu yerinə yetirmək üçün Azərbaycanın elm məbədinin - Milli Elmlər Akademiyasının Mərkəzi Elmi Kitabxanasında “Qarabağ müharibəsi qəhrəmanları” fondu yaratdıq. Fonda əməkdaşımız Röqsanə Səfərzadə rəhbərlik edəcək. Bu ailənin üzvləri həm birinci, həm də ikinci Qarabağ savaşında qəhrəmanlıq göstəriblər, “Zəfər” ordenli şəhid polkovnik Babək Səmidli Röqsanə xanımın qardaşıdır”.



Baş direktor professor Məmməd Əliyev Azərbaycanın ərazi bütövlüyünü bərpa etməklə ata vəsiyyətini yerinə yetirən Ali Baş Komandan İlham Əliyevə kollektiv adından minnətdarlığını bildirib.

AMEA-nın vitse-prezidenti, akademik İradə Hüseynova mərasimdə çıxış edərək “Qarabağ müharibəsi qəhrəmanları” fondunun yaradılmasının nəcib təşəbbüs olduğunu qeyd edib, Vətən savaşında tarix yazan insanlar haqqında yazılan əsərlərin bu fondda saxlanılaraq gələcək nəsillərə çatdırılmasının vacibliyini vurğulayıb.

Türkiyə Cümhuriyyətinin ölkəmizdəki fövqəladə və səlahiyyətli səfiri Cahit Baxçı çıxış edərək iki ölkə arasında tarixi qardaşlığın İkinci Qarabağ savaşında özünü bir daha sübut etdiyini bildirib. Xalqımızı böyük zəfər münasibəti ilə təbrik edən səfir ölkəsinin siyasi və mənəvi cəhətdən hər zaman qardaş Azərbaycanın yanında olacağını deyib. Cahit Baxçı bu günlərdə iki dövlət başçısının Şuşa şəhərində imza atdıqları Şuşa Bəyannaməsini bu baxımdan tarixi bir sənəd adlandırıb. Səfir qeyd edib ki, Vətən müharibəsi şəhidlərinin ailələrinə, qazilərə Türkiyə Cümhuriyyəti maddi və mənəvi dəstəyini əsirgəməyək.

Milli Məclisin deputatı, professor Anar İsgəndərov Azərbaycan-Türkiyə dostluğunun tarixi köklərə söykəndiyini, iki dost və qardaş ölkənin ağır günlərdə hər zaman bir-birlərinə dayaq durduğunu, Vətən müharibəsində bunun bir daha sübuta yetirildiyini diqqətə çatdırıb.

Millət vəkili, dosent Tamam Cəfərova çıxış edərək bildirib ki, iqtidar-xalq birliyi sahəsində 44 günlük Vətən savaşı tarixi qələbəmizlə başa çatdı. Doğma torpaqlarımızı erməni işğalından azad edərkən şəhidlik məqamına yüksələn hər bir qəhrəmanın ailəsi, qazilərimiz hər zaman dövlətimizin diqqət və qayğısı ilə əhatə olunacaq.

Bakı Slavyan Universitetinin prorektoru, dosent Xanım Sultanova ədalətli qələbəmizlə başa çatan 44 günlük Vətən savaşında qəhrəmanlıq göstərən hər bir əsgər və zabitin ehtirama layiq olduğunu qeyd edib. Vətən müharibəsi qəhrəmanlarını gələcək nəsillər üçün örnək adlandırıb, kitabxanada yaradılan yeni fondun bu baxımdan əhəmiyyətini vurğulayıb.

Şəhid polkovnik Babək Səmidlinin qardaşı, I Qarabağ savaşının iştirakçısı, polkovnik-leytenant Müşfiq Səmidli, Vətən müharibəsinin şəhidi Vüsal Kazımovun atası, Lənkəran Dövlət Universitetinin prorektoru, dosent Kamran Kazımov, 44 günlük savaşda iştirak etmiş qazi Ceyhun Məmmədov, Xocalı sakini Mürvət Məmmədov, “Yaşat” Fondunun əməkdaşı, Milli Qəhrəman, şəhid İlqar Mirzəyevin oğlu Elvin Mirzəyev çıxış edərək şəhid ailələrinə, qazilərə göstərilən diqqət və qayğıya görə ölkə rəhbərliyinə minnətdarlıqlarını bildiriblər.



Röqsanə Səfərzadə rəhbərlik etdiyi “Qarabağ müharibəsi qəhrəmanları” fondu barədə tədbir iştirakçılarına ətraflı məlumat verərək bildirib ki, hər iki Qarabağ savaşının qəhrəmanları, şəhid və qazilər barədə elektron məlumat bazası yaradılıb. Azərbaycan Respublikasının xəritəsi üzərində 3 minə yaxın şəhidin adları həkk edilən “Zəfər memarları” guşəsi təşkil olunub.

Tədbirdə gənc xanəndələr Almaxanım Əhmədli və Anar Məmmədovun ifa etdikləri muğam və təsniflər maraqla qarşılanıb. Təqdimat mərasiminə gələn qonaqlar sonda “Qarabağ müharibəsinin qəhrəmanları” fondu ilə yaxından tanış olublar.

E. CƏBRAYILOĞLU
Reyting.az





Bölməyə aid digər xəbərlər
{sape_links}{sape_article}