17:38 / 28-03-2024
Əməkdar artist vəfat edib
Azərbaycanın Avropa Şurasına üzvlüyünün 20 ili tamam olub - Fotolar
Tarix: 26-01-2021 08:48 | Bölmə: Siyasət
Azərbaycanın Avropa Şurasına üzvlüyünün 20 ili tamam olub

2021-ci il 25 yanvar tarixində Azərbaycan Respublikasının Avropa Şurasına üzvlüyünün 20 ilinin tamam olması münasibətilə Strasburqda, ölkəmizin bu təşkilat yanında daimi nümayəndəliyində tədbir keçirilib.

Azərbaycanın Avropa Şurası Parlament Assambleyasındakı (AŞPA) nümayəndəliyindən verilən məlumata görə, nümayəndə heyəti üzvlərinin iştirakı ilə baş tutan tədbiri Azərbaycanın Avropa Şurası yanında daimi nümayəndəliyinin rəhbəri Fəxrəddin İsmayılov açıb. O, əvvəlcə iştirakçıları 44 günlük Vətən müharibəsi və eləcə də Birinci Qarabağ müharibəsində canlarını fəda etmiş qəhrəman şəhidlərimiz, habelə 20 Yanvar qurbanlarının əziz xatirəsini bir dəqiqəlik sükutla yad etməyə dəvət edib.

Çıxışında ölkəmizi Avropa Şurasına aparan yolun qısa tarixçəsinə toxunan F. İsmayılov bu yolda üzləşdiyi maneələrə rəğmən, Ulu öndər Heydər Əliyevin müdrik və qətiyyətli mövqeyi sayəsində Respublikamızın 2001-ci ildə Avropa Şurasına qəbul edilməsinə nail olunduğunu bildirib.

Daimi nümayəndə vaxtaşırı olaraq ikili standartlarla üzləşən Azərbaycanın Avropa Şurası daxilindəki münasibətlərin qarşılıqlı hörmət və dialoq üzərində qurulmasının vacibliyinə inandığını ifadə edib. O, 2001-ci ildə Ermənistanla birgə Avropa Şurasına qəbul edilən zaman Azərbaycanın Avropa qitəsinin bu mötəbər təşkilatının işğal altında olan torpaqlarımızın azad edilməsinə yardımçı olacağına dair böyük ümidlər bəsləndiyini xatırladıb, lakin bu ümidlərin özünü doğrultmadığını qeyd edib. F. İsmayılov sonunda müzəffər Ali Baş komandan İlham Əliyevin rəhbərliyi altında Azərbaycanın rəşadətli silahlı qüvvələri tərəfindən haqq-ədalətin bərpa edildiyini vurğulayıb və artıq Azərbaycan üçün beynəlxalq aləmdə, o cümlədən Avropa Şurası çərçivəsində yeni bir dönəmin başlandığını bildirib.



Daha sonra AŞPA-da nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsi sədri Səməd Seyidov çıxış edərək, Avropa Şurasına üzvlüyümüzün 20 ili ərzində formalaşmış münasibətlərdən danışıb. Ümummilli lider Heydər Əliyevin iştirakı ilə 2001-ci ildə təşkilatın mənzil-qərargahı qarşısında Azərbaycan bayrağının qaldırılması ilə bağlı tarixi mərasimin canlı şahidi olduğunu xatırladan S. Seyidov deyib ki, 20 il öncə Ermənistanın işğalı ilə əlaqədar Azərbaycan Avropa Şurasına ağrı ilə, amma ümidlərlə gəlib. Buna baxmayaraq, ölkəmiz illər boyu qeyri-obyektiv mövqe və ikili standartlarla qarşılaşıb. O qeyd edib ki, Azərbaycanın ərazi bütövlüyünün bərpası hər birimizin böyük arzusu olub və bu arzu millətin iradəsini əks etdirən və onu bir yumruqda birləşdirən, milli maraqları ən ali maraq kimi müdafiə edən lider, Azərbaycan Respublikası Prezidenti İlham Əliyevin sayəsində reallaşıb. S. Seyidov ərazi bütövlüyünü bərpa etmiş bir ölkənin nümayəndə heyəti üzvləri olaraq, AŞPA-nın qış sessiyasına gəlməkdən böyük qürur və fəxr hissi keçirdiklərini vurğulayıb.

Avropa Şurasına üzvlüyümüzün ilk günlərindən AŞPA-da nümayəndə heyətimizin tərkibində olmuş millət vəkili Rafael Hüseynov çıxışında ötən dövrlə bağlı xatirələrini bölüşüb və xüsusilə üzvlüyə qəbul edilməyimiz ərəfəsində Ümummilli lider Heydər Əliyevin Avropa Şurası rəsmiləri ilə görüş və müzakirələrindən bir sıra tarixi məqamlara diqqət yetirib. O, vaxtilə AŞPA-da nümayəndə heyətimizin başçısı olmuş, Prezident İlham Əliyevin rəhbərliyi altında görülən işlər və əldə olunan nailiyyətlərə nəzər salıb və hazırkı heyətin də məhz onun müəyyən etdiyi xətt üzrə fəaliyyətini davam etdirdiyini söyləyib. Millət vəkili Avropa Şurasına üzvlüyün 20 illiyini önəmli bir tarix kimi xarakterizə edib və bu illər ərzində ölkəmizin əldə etdiyi tərəqqini çox yüksək qiymətləndirib.





Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}