Səddamın qəbri hardadır? - Eks-nazirin qaldırdığı küy
Tarix: 22-03-2023 10:47 | Bölmə: Siyasət
Səddamın qəbri hardadır? - Eks-nazirin qaldırdığı küy

Ölümündən 17 il sonra İraqda keçmiş prezident Səddam Hüseynin cənazəsinin harada olduğu ilə bağlı mübahisələr başlayıb. Onun nəşinin xaricə köçürüldüyünə işarə edən qızı Rəqad Səddam bir gün “İraqa qayıdacaqlarına” söz verib. Bu, keçmiş baş nazir Mustafa Əl-Kazıminin (2020-22) keçmiş prezidentin 2006-cı ildə edamından sonra cəsədinin Bağdaddakı evinin yaxınlığında atıldığını gördüyünü iddia etməsindən bir neçə gün sonra baş verir.

Reyting.az
xəbər verir ki, bu barədə “Amwaj.media” yazıb.

Analitik portalın təhlilində qeyd olunur:

S. Hüseyn 2003-cü ilin dekabrında, Amerikanın İraqı işğal etməsindən 9 ay sonra ABŞ qüvvələri tərəfindən əsir götürülüb. 2006-cı ildə xüsusi tribunal onu insanlığa qarşı cinayət törətməkdə təqsirli bildikdən sonra asılmışdı. Keçmiş baş nazir Nuri Əl-Maliki (2006-14) ölüm hökmünü imzalayıb.

Səddamın nəşinin harada olması ilə bağlı mübahisələrə ilkin olaraq martın 12-də mərhum prezidentin edamından sonra cəsədinin küçəyə atıldığını bildirən Kazimi səbəb olub. Cəsədin dövlət idarələrinin yerləşdiyi “Yaşıl Zona”da Kazimi və Malikinin evləri arasında atıldığı bildirilir.

Kazimi Səudiyyə Ərəbistanı tərəfindən maliyyələşdirilən “Asharq Al-Awsat”-a bildirib ki, Malikinin əmri ilə Hüseynin cənazəsi daha sonra ailəsinə təhvil verilib və onu Tikritdə dəfn ediblər.

Mustafa Kazimi, həmçinin iddia edib ki, Səddam Hüseynin qəbri 2014-cü ildə İŞİD qruplaşmasının Tikrit bölgəsinə hücumundan əvvəl “açılıb” və “naməlum yerə” köçürülüb.

Martın 18-də İraqın işğalının ildönümü ilə əlaqədar Dubayda yerləşən “Əl-Məşhəd” telekanalına müsahibəsində S. Hüseynin İordaniyada yaşayan qızına atasının qalıqlarının indiki yeri barədə sual verilib.

O, Hüseynin cənazəsinin harada olduğunu açıq şəkildə bildirmədən, “Atamın cənazəsi İraqa qayıdanda... onu böyük hərbi ehtiram və xalq ziyarəti qarşılayacaq”, - deyə cavab verib.

Yeri gəlmişkən, adının açıqlanmasını istəməyən, Tikritdə fəaliyyət göstərən şiə silahlı qruplaşmalarına bağlı mənbə “Amwaj.media”-ya bildirib ki, Hüseynin qalıqları hələ də İraqdadır.

Mənbə iddia edir ki, “Hüseynin qəbrinin onun qəbiləsinin üzvləri tərəfindən qazıldığı doğru olsa da, cənazə beton və metaldan yüksək möhkəmləndirilmiş qəbirə qoyulub və yerin dərinliklərindədir”.

Rəqad Hüseynin bu sözlərini “xalqın dəstəyini toplamaq üçün təbliğat işi” kimi xarakterizə edən mənbə bildirib ki, Qusay və Uday Səddamın cənazəsi toxunulmaz qalıb.

Mərhum prezidentin qalıqları ilə bağlı mübahisə İraq sosial mediasında qızğın müzakirələrə səbəb olub.

“Twitter” istifadəçisi Vaki əl-Tamimi martın 12-də yazıb ki, “hörmətlilər” Hüseynin yeri və ya “bədəni” ilə o qədər də maraqlanmırlar, çünki “o, onların qəlbində qalır”.

İraqlı tədqiqatçı Samir Obeid martın 12-də “Səddamın cəsədinin şikəst edilməsini” tənqid edərək, belə iddia edilən hərəkətlərin İslam əxlaqına və ənənələrinə zidd olduğunu bildirib.

Digər fəal Əbdül Salam Əl-Nahavi isə Kaziminin açıqlamaları ilə bağlı suallar qaldırıb. Bu mənada livanlı jurnalist Əli Çendeb İraqın keçmiş baş nazirinin diqqəti ona qarşı son vaxtlar korrupsiya ittihamlarından yayındırmağa çalışdığını iddia edib.

S. Hüseynin ölümü uzun müddətdir, xüsusən də müsəlmanların Qurban bayramı səhəri edam edildiyi vaxtdan bəri mübahisələrlə əhatə olunub.
Edamın vaxtı İraqda və onun hüdudlarından kənarda bir çox sünni ərəblər tərəfindən pislənib. Bəziləri bu addımı ərəb qəbilə namusuna qarşı təhqir kimi səciyyələndirib və onu “şəhid” mərtəbəsinə qaldırıblar.

Tikritdə dəfn edildikdən sonra, əlaqəli tikili İraqın sünni ərəb icmasından olan bəzi şairlər və tələbələrlə yanaşı onun sadiqləri üçün ziyarət yeri olub.

2019-cu ildə Səudiyyənin maliyyələşdirdiyi “Əl-Ərəbiyyə” telekanalı Səddam Hüseynin ailəsinə yaxın mənbələrə istinadla bildirmişdi ki, onun cəsədi və oğullarının cəsədi 2014-cü ildə İŞİD-in əraziyə hücumundan əvvəl mərhum prezidentin qəbiləsi Tikrit üzvləri tərəfindən köçürülüb.

Hüseynin qızı 2000-ci illərin əvvəllərindən ərəb mediasında, xüsusən də “Arabiya” TV-də çıxış edərək atasının irsini İraqın siyasi səhnəsində davam etdirmək arzusunu ifadə edir. 2021-ci ilin fevralında “Arabiya” televiziyası tərəfindən yayımlanmağa başlayan altı hissəli müsahibədə Rəqad Səddam İraq siyasətinə qayıtmaqdan danışıb və açıq şəkildə İranın İraqdakı təsirini sıxışdırmağa çağırıb.

Xanım-Səddam sosial mediada aktivdir və tez-tez Ordu Günü və İraqın idman nailiyyətləri ilə bağlı verdiyi mesajlarda mərhum atasının ticarət nişanı ifadələrindən istifadə edir. Rəqad Səddamın İraq sosial mediasında mövcudluğunu davam etdirməsi gözlənilsə də, onun İraqın siyasi səhnəsinə qayıtması çox çətin olaraq qalır - ən azı yaxın gələcək üçün. Səddam Hüseynin bəşəriyyətə qarşı cinayətlərdə birbaşa iştirakı onun irsini siyasi mübahisəli edib və qızının geri qayıtması böyük bir siyasi narazılığa səbəb ola bilər. İraq hakimiyyəti uzun müddətdir onun ekstradisiyasını istəsə də, İordaniyanın müqaviməti ilə üzləşib.

ELÇİN




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}