15:17 / 28-05-2024
KTN-də yeni təyinat olub
Professor: “Ermənistan böyük vədlər alıb və Qərbə doğru gedir”
Tarix: 16-09-2023 18:27 | Bölmə: Slayd
Professor: “Ermənistan böyük vədlər alıb və Qərbə doğru gedir”

“Bir zamanlar çox yaxın müttəfiq olan Ermənistan ilə Rusiyanın münasibətlərində indi ziddiyyətlər yaranıb. Əlbəttə, müttəfiqlər arasında yaranan ziddiyyətlərə görə kimisə birbaşa ittiham etmək doğru olmazdı. Nəzərə almaq lazımdır ki, Rusiya-Ermənistan münasibətlərində tərəflərin maraqları olub. Məsələn, imperalist siyasətinə sadiq qalan Rusiya Ermənistanı öz təsir dairəsində saxlamaq, onun vasitəsilə regionda hökmranlıq etmək və özünün strateji maraqlarının təminatını istəyir. Əvvəllər bu, Ermənistana sərf edib. Çünki Azərbaycan ərazilərinin işğalı da daxil olmaqla, Rusiyadan hər cür dəstək alıb”.

Bunu Reyting.az-a professor Qabil Hüseynli hazırda Moskva-İrəvan münasibətlərində yaranan ziddiyyətlərdən danışarkən bildirib.

Qabil Hüseynli qeyd edib ki, indi vəziyyət dəyişib və Ermənistan Qərbə inteqrasiya xəttini seçir.

Professor deyib ki, Qərbdən rəsmi İrəvana həm də şirnikləşdirici vədlər verilir:

“Təsəvvür edin ki, perspektivdə Ermənistanı NATO-ya dəvət etməkdən, Avropa Birliyinə üzvü olmasına qədər vədlər verirlər. Hətta Qarabağın dağlıq hissəsində yaşayan bir neçə min erməni ilə bağlı da vədlərin verilməsi mümkündür. Ermənistan hazırda bu vədlərin tam ortasındadır”.

Q. Hüseynli əlavə edib ki, Ermənistan reallığı anlayaraq Rusiyadan qopmaq və Qərbə doğru getmək istəyir: “Bunun üçün də müxtəlif səbəblər səsləndirir. Məsələn deyir ki, II Qarabağ savaşında Rusiya Ermənistanı dəstəkləməyib. Həmçinin müttəfiqi olduğu Kollektivn Təhlükəsizlik Müqaviləsi Təşkilatı müharibədə Ermənistana dəstək verməyib, onun tərəfində duraraq Azərbaycanla vuruşmayıb.

Əlbəttə, müharibənin Azərbaycan ərazisində getdiyini nəzərə alsaq görərik ki, Kollektivn Təhlükəsizlik Müqaviləsi Təşkilatı buna getməzdi. Yəni Paşinyan tərəfindən sadalanan bu fikirlərin hüquqi əsası yoxdur”.

Professorun qeyd edib ki, əvvəl Rusiya Ermənistana silah da daxil olmaqla, hər cür dəstək verirdi və bu, erməniləri razı salırdı. İndi isə Rusiyanın imkanları zəifləyib. “Ermənilərə də bunu edəcək ağalar lazımdır. Qərb də bunu etməyə söz verib, ola bilsin ki, edir də. Odur ki, Ermənistan indi oriyentasiyasını Qərbə doğru dəyişmək istəyir”,- deyə professor bildirib.

Q. Hüseynli onu da əlavə edib ki, belə bir ssenarinin qarşısını almaq üçün Rusiyanın Paşinyan hökumətini devirmək niyyəti ola bilər, amma bunun baş tutması real görünmür: “Mən, belə bir ehtimal görmürəm. Paşinyan hökumətini indi kollektiv Qərb qoruyur və Rusiyanın da davranışlarını yəqin ki, proqnoz edə bilirlər. Üstəlik, hazırda Ermənistanda iki mindən çox Qərb müşahidəçisi var və onlar keçmiş hərbçilərdir. Onların bir qrupu Ermənistana müşahidəçi adı altında daxil olub, digər qrupu isə böyük ehtimalla elit dəstələrdir və Nikol Paşinyanı qorumaqla məşğuldur”.

Y. QACAR




Bölməyə aid digər xəbərlər
21-05-2024, 11:26 Rəisinin varisi kimdir?

{sape_links}{sape_article}