17:38 / 28-03-2024
Əməkdar artist vəfat edib
Prezidentə müraciət: “Arif Alışanov və onun dəstəsi AzTV-nin büdcəsini talan edib…”
Tarix: 17-08-2019 18:02 | Bölmə: Slayd
Prezidentə müraciət: “Arif Alışanov və onun dəstəsi AzTV-nin büdcəsini talan edib…”

“Mən və ailə üzvlərimiz "Azərbaycan Televiziya və Radio Verilişləri” Qapalı Səhmdar Cəmiyyətinin İdarə Heyətinin sabiq sədri Arif Alışanovun törətdiyi qanunsuzluqlar, atamın şərlənərək həbs olunması barədə ölkə rəhbərliyinə etdiyimiz müraciətlər hələ də cavabsız qalır”.

Reyting.az
Azpolitika.info-ya istinadla xəbər verir ki, bunu AzTV-nin sabiq sədri Arif Alışanovun şikayəti əsasında həbs edilərək 16 il müddətinə azadlıqdan məhrum edilmiş Şücayət Əsgərovun qızı Cəmilə Tağıyevanın ölkə rəhbərliyinə, hüquq-mühafizə orqanlarına və ictimaiyyətə növbəti müraciətində bildirir.

C. Tağıyeva müraciətində yazır ki, hüquq-mühafizə orqanları ortalıqda olan mənimsəmə, korrupsiya cinayətləri ilə bağlı heç bir araşdırma aparmaq istəmirlər. “Bu vəziyyət bizi çox üzür, səhhətində ciddi problemlər olan atamın vəziyyətini daha da ağırlaşdırır”.

C. Tağıyeva qeyd edir ki, A. Alışanovun vəzifədə işlədiyi dövrdə əldə etdiyi dəyəri on milyon manatlarla ölçülən sərvətin mənbəyi araşdırılmalıydı: “Faktlar, Alışanovun istintaqa verdiyi ifadələr ortalıqdadır. Dövlət teleşirkətinə rəhbərlik etmiş, bəlli maaş almış, bizneslə məşğul olması qanunla yasaqlanmış bir məmur qısa müddətdə hansı yollarla milyonçuya çevrilə bilərdi?

Bu var-dövlətin mənbəyi prokurorluq orqanlarını niyə təəccübləndirmədi? Atama heç bir sübut olmadan ağır cəza kəsən hakimlərin tükünü niyə tərpətmədi? Bu ölkədə korrupsioner məmurlarla toqquşan sadə vətəndaşı qanunlar niyə müdafiə edə bilmir? Niyə dövlətin bütün inzibati orqanları, məhkəmələr haqsızın, pullunun, korrupsionerlərin tərəfində durur? Bu cür hallar cəmiyyətdə dövlətə, onun təsisatlarına, məhkəmə hakimiyyətinə inamı yerə vurur axı!…”.

C. Tağıyeva müraciətində daha sonra vurğulayır:

“Cəmiyyətin gözü qarşısında sübut olunur ki, “Korrupsiyaya qarşı mübarizə haqqında” Qanun işləmir, prokurorluq üzərinə düşən vəzifəni yerinə yetirmək istəmir. Arif Alışanov və onun başının dəstəsi AzTV-nin büdcəsini talan edib, özlərinə var-dövlət yığıb, vəzəfədən çıxandan sonra isə əldə etdikləri nəhəng sərvəti sağa-sola xərcləyib, harın həyat tərzi sürürlər. Bəs biz nə etməliyik? Bəs biz yoxsulları və kimsəsizləri kim müdafiə etməlidir? Axı biz də Azərbaycan Respublikasının tam hüquqlu vətəndaşlarıq!”, - deyə C. Tağıyeva qeyd edir.

Onun sözlərinə görə, bu cinayət işinin gedişində elə qanunsuzluqlar baş verib ki, bunun başqa hər hansı bir ölkədə üzə çıxması böyük qalmaqala səbəb olardı: “Atamın həbsindən bir həftə sonra anamın bütün əmlakı müstəntiqin iştirakı ilə, polisin təzyiqi altında məcburi qaydada notariusa aparılaraq A. Alışanovun mülkiyyətinə keçirildi.

İstintaq yekunlaşmadan, həmin əmlakların ehtimal edilən cinayət yolu ilə əldə edilib-edilməməsini müəyyən etmədən həbsdə olan şəxsin yanına notariusu gətirərək ona və anama məxsus əmlakların A. Alışanovun mülkiyyətinə keçirilməsi dəhşətli qanun pozuntusudur.

Konstitusiyanın, CPM-nin 248-ci maddəsinin, CM-nin 99-1-ci maddəsinin və “Fiziki şəxs barəsində icra sənədi icra olunarkən tələbin yönəldilməsinə yol verilməyən əmlak növlərinin dəqiq siyahısının təsdiq edilməsi barədə” Azərbaycan Respublikası Nazirlər Kabinetinin 2002-ci il 5 iyul tarixli 89 saylı qərarının tələblərinə tam zidd olaraq, qərəzli şəkildə cinayət törətməmiş bir şəxsi 18 il müddətinə azadlıqdan məhrum etməklə kifayətlənməyib, onun, keçmiş arvadının, qızının və yaxın qohumlarının bütün əmlaklarını, hətta qadının gündəlik istifadə etdiyi ziynət əşyalarını, azuqə pullarını belə zərərin ödənilməsinə yönəldiblər.

İstintaq başa çatmadan, məhkəmə hökmü olmadan polisin iştirakı ilə mülkiyyətimizin qəsb olunması, bütün müraciətlərimizin cavabsız qalması dəhşətli haldır.

Bu qanunsuzluq davam edə bilməz, dövlət, nəhayət, müdaxilə edib haqq-ədalətin bərpa olunmasını təmin etməlidir. Arif Alışanovun, onun sifarişi ilə hərəkət edən hüquq-mühafizə orqanı əməkdaşlarının, məhkəmə hakimlərinin cəmiyyətin gözü qarşısında cəzalandırılmasına nail olunmalıdır. Biz haqıszlığın ən pis nümunələrini yaşamış vətəndaşlar kimi, ölkə rəhbərliyindən ümidimizi kəsməmişik”.

Şikayətçi sonda yazıb: “Ümid edirik ki, bu cinayət işi üzrə həqiqətlər tam araşdırılacaq və günahkarlar cəzalandırılacaq”.




Bölməyə aid digər xəbərlər
{sape_links}{sape_article}