Ölkəmizə dini zəmində təhlükə var - Ekspert
Tarix: 14-10-2019 17:26 | Bölmə: Slayd
Ölkəmizə dini zəmində təhlükə var

Azərbaycanın Dövlət Təhlükəsizliyi Xidmətinin (DTX) terror təşkilatı ilə əlaqəli şəxslərə qarşı kompleks mübarizə tədbirləri davam edir. Bu günlərdə “Abu İbrahim Dağıstani” dini ləqəbi ilə tanınan, beynəlxalq terror təşkilatlarında partlayıcı qurğular üzrə mütəxəssis kimi fəaliyyət göstərən Azərbaycan vətəndaşı, Əfqanıstan və Pakistanın sərhəd bölgələrində terror təlimlərində və silahlı münaqişələrdə iştirak etmiş, daha sonra tərkibində olduğu dəstənin digər üzvləri ilə birlikdə Suriya ərazisinə keçərək orada dini düşmənçilik zəminində aparılan döyüşlərin iştirakçısına çevrilmiş Azərbaycan vətəndaşı, 1988-ci il təvəllüdlü Telman Çərkəz oğlu Süleymanov, habelə onunla eyni vaxtda həmin terror qruplaşmalarının tərkibində Suriyanın Atma və digər şəhərlərində silahlı münaqişələrdə iştirak etmiş Azərbaycan vətəndaşı, 1986-cı il təvəllüdlü Elçin Tofiq oğlu Qasımov ifşa olunaraq saxlanılıblar.

Həmçinin beynəlxalq terror təşkilatlarına qoşulduğuna görə hazırda Azərbaycan Respublikası vətəndaşlığından məhrum edilmiş, 1982-ci il təvəllüdlü Rasi Yaşar oğlu Abbasovun bir sıra ölkələrdə dini düşmənçilik zəminində aparılan silahlı münaqişələrdə iştirakı müəyyən edilib. Bəhram Güləliyev, Telman Süleymanov, Elçin Qasımov və Rasi Abbasov cinayət məsuliyyətinə cəlb edilərək barələrində məhkəmə tərəfindən həbs qətimkan tədbiri seçilib.

Mövzu ilə bağlı Reyting.az-a açıqlama verən şərqşünas-politoloq Vüsal Hətəmov bildirib ki, Azərbaycanın terrorla bağlı ciddi problemləri bundan sonra başlaya bilər. Onun fikrincə, Yaxın Şərqdə terror mərkəzlərindən idarə olunan bir sıra şəbəkələrin planları sonda uğursuz olub: "Əfqanıstan, Çeçenistan, Suriya və İraqda demək olar ki, onların məhv edilmələri və ya fəaliyyət çərçivələrinin daralması, bunun nəticəsində sözügedən ölkələrdən sıxışdırılaraq çıxarılması və ya qovulması həmin terrorçuların digər müsəlman ölkələrinə qaçmaq təhlükəsi yarada bilər. Odur ki, hüquq-mühafizə orqanlarımızın bu cür ayıq-sayıqlığı, profilaktik tədbirləri vəzifəsindən və sosial işindən asılı olmayaraq bütün vətəndaşlarımız tərəfindən dəstəklənməlidir. Erməni terrorçuları ilə məsələmizi bitirməmiş yeni terrorçu şəbəkələrin – dini radikal terror şəbəkələrinin ölkəmizə təsiri və nüfuzuna imkan verilməməlidir”.

Ölkəmizdə beynəlxalq terror şəbəkələrinin sosial dəstək tapmasının səbəblərinə gəlincə, V. Hətəmov qeyd edib ki, vaxtilə Dini Qurumlarla İş üzrə Dövlət Komitəsi (DQİDK) və Qafqaz Müsəlmanları İdarəsinin (QMİ) yarıtmaz fəaliyyəti nəticəsində ölkədə qeyri-ənənəvi, radikal dini cərəyanlara şərait yaranıb. V. Hətəmovun qənaətincə, indi beynəlxalq terror şəbəkələri həmin təsirə düşmüş vətəndaşlarımızı bir çox yollarla öz mənfur əməllərinə qurban verirlər: "DQİDK və QMİ-nin nümayəndələri hər il deyirlər ki, bu sahədə problem yoxdur. Amma hər il də hüquq-mühafizə orqanlarımız tərəfindən əməliyyat zamanı terror şəbəkələri ifşa olunur. Cəmiyyətdə də çaşqınlıq yaranır ki, niyə DQİDK və QMİ-nin bəyanatları ilə güc strukturlarının əməliyyat məlumatları üst-üstə düşmür?”

Ölkəmizə dini zəmində təhlükə var
V. Hətəmov


Onu da qeyd edək ki, DTX Azərbaycan Respublikasının vətəndaşlarını hər hansı formada qanunsuz silahlı birləşmələrə cəlb eildən şəxslərin müəyyən olunaraq məsuliyyətə cəlb ediləcəkləri barədə bir daha xəbərdarlıq edib. Radikal dini ideoloji təsir altına düşmüş vətəndaşlar belə qanunsuz silahlı birləşmələrə qoşulmamağa çağrılır. DTX-nın bu xəbərdarlığı isə ölkədə hələ də terrorçuların olmasından xəbər verir.

V. Hətəmov isə deyir ki, dünənin sadə vətəndaşı bu gün terrorçuya çevrilə bilir. Çünki terror şəbəkələrinin çox incə fəndləri var: “Ona görə də, terrorçu şəbəkələrin bu yöndə fəaliyyətini önləmək, kimlərinsə terrorçulara qoşulmasının qarşısını azaltmaq üçün maarifləndirmə işləri gücləndirilməli, telekanallarda analitik, sənədli verilişlərə yer verilməli, bayağı, məzmunsuz verilişlərin əvəzinə elmi-maarifçi, intellektual verilişlərin sayı artırılmalıdır”.

Şərqşünas-politoloq vurğulayıb ki, terrorçunun dini, milliyyəti olmur. Əgər beynəlxalq terror şəbəkələrinin son 30 ildə ölkəmizdə törətdiyi terror hadisələrinə baxsaq, görərik ki, Azərbaycan ərazisində, xüsusilə də Qarabağ bölgəsində yaşayan ermənilərin xalqımızın başına gətirdikləri terror hadisələri beynəlxalq terror şəbəkələrinin planıdır: “Ona görə də, bu məsələyə çox həssas yanaşmalıyıq. Yəni dini radikalizm nəticəsində baş verən dini məzmunlu terror şəbəkələri məhv olduqdan sonra yeni məzmunda terror hadisələri ortaya çıxa bilər. Düşünürəm ki, ziyalıların, araşdırmaçı-jurnalistlərin bu sahədə görəcəkləri işlər hələ çoxdur”.

Z. ƏHMƏD
Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}