Etibar Məmmədov: “Ukraynadakı məğlubiyyətdən sonra Rusiyanın dağılma prosesi başlamalıdır”
Tarix: 19-09-2022 17:21 | Bölmə: Slayd
Etibar Məmmədov: “Ukraynadakı məğlubiyyətdən sonra Rusiyanın dağılma prosesi başlamalıdır”

“Mən öncədən bildirmişdim ki, Rusiya Ukrayna ilə müharibədə məğlub olacaq. Hazırda bu proses baş verir. Rusiya bütün sahələr üzrə məğlubdur. Məncə, bu məğlubiyyət fəlakət həddinə çatır. Ukraynanın əks-hücumu effektivdir. Tədricən Rusiya müharibə dövründə əldə etdiyi ərazilərdən çıxmağa məcbur olur. Çox güman ki, Donetsk və Luqanksdən də çıxacaqlar”.

Bunu Reyting.az-a Azərbaycan Milli İstiqlal Partiyasının (AMİP) lideri Etibar Məmmədov deyib.

E. Məmmədovun qənaətincə, hadisələrin bu formada inkişafı dünyada yeni situasiya yaradacaq: “Azərbaycan buna hazır olmalıdır. Bu baxımdan bizimkilər də Ukraynanın təbliğat aparatrının necə işləməsindən dərs götürməli, öyrənməlidirlər ki, necə işləmək lazımdır. Bir-birindən asılı olmayaraq təbliğat istiqamətlərində eyni nöqtəyə vura bilirlər. Bunun heç mərkəzləşməsinə də ehtiyac yoxdur. Əslində ideoloji baxımdan istiqamətlər müəyyənləşir və bütün strukturlar həmin təbliğatda iştirak edir”.

E. Məmmədov deyir ki, Ukraynadakı məğlubiyyətdən sonra Rusiyanın dağılma prosesi başlamalıdır: “Məntiq bunu deyir. Rusiya federasiyadır, onun subyektləri var. Putin həkimiyyətə gəldikdən sonra onların sərbəstliyini əlindən alaraq təyinatla idarə edirdi. Məncə, subyektlər yenidən yarımüstəqilliklərini tələb edə bilərlər: həm vergi baxımdan, həm iqtisadiyyat, həm də idarəçilik baxımından. Bununla mərkəzdənqaçma prosesi də başlayacaq.

İndi amerikalılar deyirlər ki, biz Rusiyanın dağılmasına hazır olmalıyıq. Mən, 1991-ci ildə Amerikada səfərdə olanda mənə demişdilər ki, SSRİ-nin dağılmasına hazır deyildik. İndi də deyirlər ki, biz səhvi təkrar etməməli, Rusiyanın dağılmasına hazlır olmalıyıq”.

AMİP lideri əlavə edib ki, Ukrayna prosesi prezident Putini hakimiyyətdən aparır: “Məncə, artıq Putinin hakimiyyətdən getmək prosesi başlayır. Amma Rusiyada hakimiyyətə kimin gəlməsindən asılı olmayaraq, imperiya şürunun təmizlənməsi üçün uzun illər lazım gələcək. Bəlkə də bu, heç vaxt mümkün olmayacaq. Əlbəttə, bu ağır proses olacaq. Rusiyanın dağılmasının altında qalmaq kimi təhlükələr də var. Bu səbəbdən bizim də ciddi hazırlığımız olmalıdır”.

E. Məmmədov hesab edir ki, belə proses Azərbaycan suverenliyinin Xankəndində bərpa olunmasına kömək edə bilər: “Əslində Xankəndi zaman məsələsidir. Demək olar ki, həll edilmiş məsələdir. Sadəcə, vaxta ehtiyac var”.

Reyting.az




Bölməyə aid digər xəbərlər
21-09-2022, 15:10 Putinə təzyiqlər artır

{sape_links}{sape_article}