Ferma, avtomobillər, taxıl sahəsi yandırılıb, çoban intihar edib, polis isə... - Fotolar
Tarix: 31-01-2023 09:33 | Bölmə: Slayd
Ferma, avtomobillər, taxıl sahəsi yandırılıb, çoban intihar edib, polis isə...

Füzuli rayonunda Rza Kazım oğlu İbişova məxsus "Yaşa” fermer təsərrüfatı qəsdən yandırılıb. Nəticədə fermadakı 137 baş qoyun, 40 baş hind quşu tələf olub. Bundan bir müddət sonra Rza İbişovun qardaşına və özünə məsus avtomobillər və mağaza yandırılıb. Bu cinayətlərin üstündən xeyli vaxt keçsə də, Füzuli Rayon Polis Şöbəsi təqsirkarları hələ də məsuliyyətə cəlb etməyib.

Rza İbişov (ünvan: Füzuli rayon Fin qəbəsi) Reyting.az vasitəsi ilə Azərbaycan Respublikasının Prezidenti İlham Əliyevə şikayət mətubunda yazır ki, ona qarşı törədilmiş beş cinayət işi kimlərinsə tapşırığı əsasında ört-basdır edilir.

Özünün və ailəsinin də həyatına təhlükə yarandığını bildirən R. İbişov, surəti Birinci vitse-prezidentə, daxili işlər nazirinə, baş prokurora, Dövlət Təhlükəsizliyi Xidmətinin rəisinə və İnsan Hüquqları üzrə müvəkkilə ünvanlandığı şikayət məktubunda yazır:

“Cənab prezident!

Mənə qarşı törədilmiş beş cinayət işi tapşırıq əsasında ört-basdır edilir. Mənə və ailə üzvlərimə qarşı törədilmiş cinayət hadisələri ilə bağlı 102 xidmətinə, Füzuli Rayon Polis Şöbəsinə və digər aidiyyatı qurumlara yazılı surətdə və video-disklə müraciət etsəm də, nəticəsi olmayıb”.

Şikayətçi iddia edir ki, bu cinayətləri törətmiş şəxslər bəllidir:

“Bu cinayətləri Maarif Həsənov ilə Elçin Mehtiyev törədib. Bununla bağlı səs yazısını və video-görüntünü də sizə göndərirəm. Maarif adlı şəxs deyir ki, bu hadisələri Elçin törədib, Elçin isə Maarifin törətdiyini bildirir”.

R. İbişov fotolar və video-görüntü də əlavə etdiyi şikayət məktubunda yazır ki, 2014-cü ildə ona məxsus "Yaşa” fermer təsərrüfatı qəsdən yandırılıb. Nəticədə fermadakı 137 baş qoyun, 40 baş hind quşu tələf olub, qış üçün yığdıqları ot da yanıb. Bu hadisədən sonra isə çoban intihar edib.

Şikayətçi bildirir ki, 2018-ci ildə növbəti cinayətlə üzləşib: “Bu dəfə mənə məxsus hektarlarla taxıl sahəsi yandırıldı. Yandırılmış ərazinin ətrafında su qabında benzin də aşkarlandı”.

Düşmənləri 2019-cu ildə R. İbişova məxsus “Mercedec-190” markalı avtomobili də həyətində yandırıblar, amma yenə əsəbləri soyumayıb. 2021-ci il 16 dekabr tarixində R. İbişovun qardaşına məxsus “Opel” markalı avtomobili qəsdən yandırıblar. Yanğın zamanı R. İbişova məxsus “Azsamand” markalı avtomobilə də od düşüb. Avtomobillər yanarkən yanğın onun evinə də keçib.

2021-ci il dekabr ayının 29-dan 30-na keçən gecə isə R. İbişova məxsus "Zəfər 44" ət dükanına od vurublar:

“Yoldan keçən 2 şəxs qəssabxananın yandığını görüb, mənim telefonuma zəng etmişdilər. Mən həmin vaxt Bakıda idim və onlardan xahiş etdim ki, qəssabxananın qarşısındakı su motorunu işə salmaqla yanğını söndürsünlər. Onların sayəsində qəssabxananın tam yanmasının qarşısı alındı. Qəssabxanaya daxil olduqda isə məlum oldu ki, pəncərəsi sındırılaraq benzin tökməklə qəsdən yandırılıb. Bu zaman qəssabxanadakı bütün ləvazimatlar yanmışdı. Eyni zamanda 137 kq ət də yararsız ala düşmüşdü. Bu hadisədən bir neçə ay sonra mənə məxsus "Zəfər 44" dükanının su motorunu qəsdən sındıran Maarif Həsənov ilə Elçin Mehtiyev etmişdi. 2022-ci il mart ayının 23-dən 24-nə keçən gecə Maarif və ya Elçin su motorunu sındırıblar ki, ət dükanını təkrar yandırsınlar”.

R. İbişov şikayət məktubunda qeyd edib ki, M. Həsənov və E. Mehtiyevlə yaxın qonşudur. O, güman edir ki, ona və ailəsinə qarşı cinayətləri də bu iki şəxs törədib.

Şikayətçi daha sonra yazır:

“Dəfələrlə Füzuli Rayon Polis Şöbəsinə və rayon prokurorluğuna müraciət etsəm də, mənə və ailəmə qarşı törədilmiş cinayətin üstü bu günə kimi açılmayıb. Səbəb isə kimlərinsə bu cinayətlərin açılmasına mane olmasıdır. Yuxarı səviyyədən bu işin açılması üçün ciddi tapşırıq verilməsə, çətin ki, kimlərsə məsuliyyətə cəlb edilsin. Mənə qarşı bu qədər cinayəti törətmiş şəxslər bir gün məni və ailəmi də öldürəcəklər. Lakin səsimi heç bir yerə çatdıra bilmirəm.

Daxili İşlər Nazirliyinin bu məsələlərlə bağlı Füzuli rayonuna ezam olunmuş nümayəndəsi isə hansısa səbəbdən cinayət işinin araşdırılmasını dayandırıb. Təsəvvür edin, mən cinayətkarların izinə düşüb tapıram, amma polis bu işi görmək istəmir”.

Qardaşı Tariyel İbişovun l və ll Qarabağ döyüşlərinin iştirakçısı olduğunu yazan Rza İbişov Azərbaycan prezidentindən və müraciət ünvanladığı digər şəxslərdən xahiş edir ki, baş vermiş cinayətin araşdırılmasını Füzuli Rayon Polis Şöbəsi deyil, DİN-nin xüsusi araşdırma qrupunun yerinə yetirməsini təmin etsinlər.

Onu da qeyd edək ki, 44 günlük Vətən müharibəsində göstərdiyi şücaətə görə Heydər Əliyev Fondunun dəstəyi və Bakı Media Mərkəzinin təşkilatçılığl ilə 31 nəfər qəhrəmandan bəhs edən "Biz" tarixi zəfər filmində çəkilmiş Rza İbişov Füzuli rayonunun keçmiş icra başçısı Kazım İbişovun oğludur.

E. KAMAL
Reyting.az


P.S. Reyting.az Daxili İşlər Nazirliyinin, Füzuli RPŞ-nın məsələyə münasibətinə və şikayətçinin ittiham etdiyi şəxslərin fikirlərinə yer ayırmağa hazırdır.

Şikayətçinin göndərdiyi fotolar:










Bölməyə aid digər xəbərlər
{sape_links}{sape_article}