23:11 / 18-03-2024
Ukrayna ordusu geri çəkilir
20:16 / 18-03-2024
Borrell ikibaşlı danışır
Azərbaycanla bağlı təhlükəli plan var
Tarix: 23-03-2023 16:42 | Bölmə: Slayd
Azərbaycanla bağlı təhlükəli plan var

"Xarici və daxili siyasət bir-birinin davamı olduğu üçün, Azərbaycan hakimiyyətinin müharibədən sonra daxili siyasətdə yol verdiyi ciddi yanlışlıqlar gec-tez onun xarici siyasət imkanlarını məhdudlaşdırmalı idi və belə də oldu. Haaqada Putinin həbsinə verilən tapşırıqdan sonra Ermənistanda rusiyapərəst qüvvələrin dinc yolla hakimiyyətə gəlməsi ehtimalı demək olar sıfıra endi. Rusiya tərəfdarları hansı adla ölkəni təzədən Moskvaya meyllənməyə çağıra bilərlər? Heç bir adla. Bu çağırışlar lazımi ictimai dəstək qazanmayacaq".

Bunu Reyting.az-a Real Partiyasının sədri İlqar Məmmədov deyib.

Onun fikrincə, hazırda Azərbaycan və Ermənistan arasında yeganə mümkün vasitəçi Qərbdir: "Haaqadakı qərardan bir neçə gün sonra Moskvada Ermənistan xarici işlər nazirini qəbul edən Lavrov qəzəbini gizlətmədən şikayətlənirdi ki, Qərb Bakı-İrəvan danışıqlarını qapıb oğurlamaq istəyir.

İndi sual olunur: bunun fonunda rus durub qəzəbli-qəzəbli, mat-mat baxacaq? Xeyr, o əməli tədbirlər görəcək ki, təşəbbüsü Qərbin əlindən qoparsın və regionda mövcudluğunu qorusun. Bəs bunun üçün Moskvanın hansı imkanları var? Dediyim kimi, Ermənistanda dinc hakimiyyət dəyişikliyi nəticəsində Rusiyaya meyilli qüvvələrin iqtidara gəlişi artıq mümkün deyil. Hətta Azərbaycan hücuma keçib yeni əraziləri azad etsə, bu, qərbmeylli hökumətin Ermənistanda yazdığı “Gördünüzmü, rus bizi qorumur!” hekayəsini daha da etibarlı edəcək. Rusların İrəvanda hərbi çevrilişə güc çatarmı? Çətin".

Məmmədov əlavə edib ki, Rusiya üçün öz tərəfdarlarını Azərbaycanda hakimiyyətə gətirmək də eyni qədər çətin işdir. Bu səbəbdən də, qalır Azərbaycanla Qərbin arasını vurmaq. Bunun isə mümkün üç yolu var:

Birincisi, Bakıya demokratik davranış qaydalarına qarşı səsli-küylü addımlar atdırmaq istəyərlər: siyasi həbslər, zorakılıq, mürtəce qanunların qəbulu və s.

İkincisi, Qarabağda gərginliyi artırıb dava salmaq, erməniləri oradan tamamən köçürüb Azərbaycanı soyqırımda ittiham etdirmək.

Üçüncüsü, hər iki yanlışı Azərbaycan hakimiyyətinə eyni vaxtda etdirməkdir.


İ. Məmmədov

Partiya sədri diqqətə çatdırıb ki, birinci yolda görüləsi iş çox deyil: “Media haqqında” və “Siyasi partiyalar haqqında” qanun ölkəmizin imicinə zərər vurdu. Avropa Parlamentinin, Avropa Komissiyasının, Ağ evin, ABŞ Dövlət Departamentinin bizi qınayan bəyanatları onsuz da son zamanlar su kimi durmadan axır.

İkinci yol daha səmərəli olsa da, çətindir, çünki münaqişə mövzusunda Bakının Qərblə dialoqu ayrıdır və hadisələr istənilən anda durdurula bilər. Lakin Azərbaycanda hakimiyyətdən “qətiyyət” tələb edən səslər yetərincə güclü olsa, Qərblə dialoq boşuna çıxar və saxta “soyqırım” ssenarisi tam həcmdə icra olunar. Ermənilər özləri sülhməramlıların müşayiəti ilə Qarabağdan həvəslə köçər, təki bu ssenari gerçəkləşsin. Çünki sonra təntənə ilə, qalib kimi ora dönəcəklər. Üstəlik, arada kimlərinsə Azərbaycan əsgəri formasını yalandan geyinib kamera qarşısında qəsdən hərbi cinayətlər törətməsini demirəm. Dünya hərb tarixi bu cür “geyimdəyişmə şouları” ilə doludur.

Bəs çıxış yolumuz nədədir? Azərbaycan hakimiyyəti müharibədən sonra demokratik açılıma başlamalı idi. Dərhal yeni və dürüst parlament seçkiləri keçirib ölkəmizin beynəlxalq imicini təzələməli, söz və toplaşmaq azadlığını özünə beynəlxalq bayraq etməli idi. Bunun üçün resursu çox idi, amma bir xeylisi xərcləndi. Hökumət lazım olanın tam tərsini etdi deyə, indi həlledici məqam yetişəndə xarici siyasət imkanları tükənib. Yenə də gec deyil. Bu istiqamətdə təcili addımlar atmaq gərəkdir - müxalifətlə siyasi dialoq çərçivəsində”.

İ. Məmmədov sonda qeyd edib ki, Qərbi Azərbaycan mövzusunda illərdir edilən yanlışlığa son qoyulmalıdır: “İddiamız Zəngəzurla məhdudlaşmalı və bu iddia İrəvanın Qarabağ iddiasına gündəlik güzgü rolunu oynamalıdır. Bununla belə, iddiadan doğa biləcək əməllərlə dövlətimizin nəinki heç bir əlaqəsi olmamalıdır, hətta bu əməldə bulunanlar hakimiyyətə açıq-aşkar müxalif mövqedə dursalara yaxşı olar, Qarabağ erməniləri İrəvanı indi tanımadığı kimi".

E. KAMAL
Reyting.az




Bölməyə aid digər xəbərlər
{sape_links}{sape_article}