ABŞ-da aparılan araşdırmalara görə, ölkədə hər üç yeniyetmədən biri mütəmadi süni intellekt texnologiyalarından, eləcə də çatbotlardan istifadə edir.

Reyting.az-ın məlumatına görə, araşdırmaya əsaslanaraq "TechCrunch" saytında yazılan məqalədə qeyd olunur ki, amerikalı yeniyetmələrin əksəriyyətinin süni intellekt asılılığı var.

"Pew Research Center" sosial araşdırmalar mərkəzinin hazırladığı statistik hesabata görə, sanki ABŞ yeniyetmələrinin əsas hədəfi real zamandan önə çıxmaqdır. Onlar gündəlik rəqəmsal həyatlarını getdikcə gücləndirir ki, bu da çox böyük təşvişə səbəb olur, həmçinin təhlükəsizliklə bağlı narahatlıqları artırır.

Aparılan yeni sorğu zamanı məlum olub ki, yeniyetmələrin 97 faizi hər gün internetə daxil olur, 40 faizi isə "demək olar ki, daim" internetdədir.

İA-çatbotlar da onların rutininə daxil olub: hər üç yeniyetmədən biri gündəlik istifadə edir, 4 faizi isə demək olar ki, fasiləyə çıxmır. Hazırda ABŞ-da ən populyar, gündəlik istifadə edilən xidmətlər "ChatGPT" (59%), "Google Gemini" (23%) və "Meta AI" (20%) məhsullarıdır.

İstifadə göstəriciləri irqi, yaş, həmçinin ailə gəlirlərinə görə dəyişir. Afroamerikalı və latın yeniyetmələr çatbotlardan daha aktiv istifadə edirlər. Lakin yüksək gəlirli ailələrdə "ChatGPT" daha populyardır, aşağı gəlirli ailələrdə isə ancaq "Character.AI" proqramına üstünlük verirlər.

Mütəxəssislər bildiriblər ki, get-gedə artan istifadə fonunda risklər də gündəmə gəlir. Xüsusi vurğulanır ki, dəfələrlə "OpenAI" ilə "Character.AI" yeniyetmələrin intihar halları ilə əlaqəli məhkəmə iddialarına və tənqidlərə cavab verməyə məcbur olub.

Məlumata görə, zərərli təsirlər səbəbindən "Character.AI" artıq öz xidmətini azyaşlılar üçün məhdudlaşdırmaq məcburiyyətində qalıb.

Oqtay QORÇU