Ukrayna Təhlükəsizlik Xidmətinin “Alfa” Xüsusi Əməliyyatlar Mərkəzinin qüvvələri “Lukoil–Nijnevoljskneft” şirkətinə məxsus Filanovski neft platformasını dronlarla vurub. Zərbələr nəticəsində Rusiya onlarla quyuda neft hasilatını dayandırmaq məcburiyyətində qalıb.

Reyting.az xəbər verir ki, bunu Ukrayna Təhlükəsizlik Xidmətindəki mənbə UNIAN-a bildirib.

Məlumata görə, bu, Ukraynanın Xəzər dənizində Rusiya neft hasilatı infrastrukturuna endirdiyi ilk zərbədir.

“Mərmilərin dəniz platformasına ən azı dörd dəfə dəydiyi qeydə alınıb. Hücum nəticəsində platformanın xidmət göstərdiyi 20-dən çox quyuda neft və qaz hasilatı dayandırılıb”, - mənbə qeyd edib.

Xatırladaq ki, Filanovski yatağı Rusiyanın Xəzər dənizi sektorunda kəşf edilmiş ən böyük yataqlardan biridir. Onun ehtiyatları 129 milyon ton neft və 30 milyard kubmetr qazla qiymətləndirilir.

Kəşfiyyat xidmətindəki mənbə qeyd edib ki, Xəzər dənizində Rusiyanın müharibə üçün çalışan bütün obyektləri qanuni hədəf sayılır.

E. KAMAL