"OpenAI" şirkətinin rəhbəri Sem Altman süni intellektin çox sürətlə inkişaf etdiyini və bunun cəmiyyət üçün risklər yaratdığını bildirib. Milyarder deyib ki, indiyədək heç bir texnologiya bu qədər qısa zamanda dünyada sürətlə, həm də çox geniş yayılmayıb.

Reyting.az-ın məlumatına görə, Altman qeyd edib ki, hazırda "ChatGPT" mükəmməl proqram kimi tibb sahəsində də mürəkkəb xəstəliklər üçün dərmanların hazırlanmasına kömək edə bilən bir gücə çevrilib, lakin onun zərərli məqsədlər üçün də istifadəsi mümkündür.

Mütəxəssislər isə "ChatGPT"-yə həddindən artıq bağlılığın insanların idrak qabiliyyətini zəiflətməsi, psixoloji təhlükələr yaratması barədə xəbərdarlıq edirlər.

Sem Altman deyib ki, dünyada baş verən dəyişikliklərin sürət tempindən narahatdır. Onun sözlərinə görə, yeni texnologiya cəmi üç ildir yaranıb: “Üstəlik, heç bir başqa texnologiya dünyada bu sürətlə tətbiq olunmayıb. Ümumiyyətlə, biz, eyni zamanda, tam əmin olmalıyıq ki, bütün bunları, yəni süni intellekt texnologiyalarını dünyaya məsuliyyətlə təqdim edirik, eləcə də insanlara uyğunlaşmağa və fikirlərini bildirmək, bunu necə etmək barədə başa düşmək üçün vaxt veririk. Bəlkə biz artıq çox böyük yanlışa yol vermişik?".

Xatırladaq ki, dünyada istifadə sayına görə lider olan bu tətbiqin artıq 1,36 milyard yüklənməsi var.

Oqtay QORÇU