İşğal olunmuş Krımda qanunsuz arxeoloji qazıntılar apardığı üçünUkrayna tərəfindən axtarılan məşhur rusiyalı alim Polşada ələ keçib.

Reyting.az xarici KİV-lərə istinadla xəbər verir ki, məşhur alim və Ermitaj Muzeyinin nümayəndəsi Aleksandr B. Daxili Təhlükəsizlik Agentliyinin əməkdaşları tərəfindən saxlanılıb.

O, Krımda mədəni irs obyektlərini məhv etməkdə ittiham olunur: dəyən ziyan 200 milyon qrivnadan çox qiymətləndirilir. Məlumata görə, bu, çox güman ki, 2024-cü ilin noyabr ayında Ukrayna Təhlükəsizlik Xidməti tərəfindən qiyabi olaraq şübhə bildirişi alan Aleksandr Butyagindir.

Bildirilir ki, rusiyalı arxeoloq Avropada bir sıra mühazirələr oxuyub. O, Hollandiyadan Balkanlara gedərkən Varşavadan keçməli olub və onu ötən həftə saxlayıblar.

Polşa hüquq-mühafizə orqanlarının əməkdaşları onu Varşavadakı Rayon Prokurorluğunda dindirsələr də, ifadə verməkdən imtina edib.

Dindirmədən sonra prokuror ekstradisiya qaydalarına və Polşa-Ukrayna hüquqi yardım müqaviləsinə uyğun olaraq, axtarışda olan Rusiya vətəndaşının müvəqqəti saxlanması üçün məhkəməyə vəsatət təqdim edib. Məhkəmə vəsatəti təmin edib və Rusiya vətəndaşının 40 gün müddətinə həbsdə saxlanılması barədə qərar verilib.

Ukraynanın indi Polşaya rəsmi ekstradisiya tələbi təqdim etməsi gözlənilir. Bu sənədlər alındıqdan sonra məhkəmə onları nəzərdən keçirəcək və şübhəlinin Ukraynaya ekstradisiyası üçün əsasların olub-olmadığına qərar verəcək.

Alimin şübhəli bilindiyi cinayət bir ildən 10 ilə qədər müddətə azadlıqdan məhrumetmə ilə cəzalandırılır.

V. QULİYEV