Rusiya prezidenti Vladimir Putinin Kremldə ABŞ prezidentinin xüsusi nümayəndəsi Stiv Uitkoff ilə söhbəti beş saat davam edib.

Reyting.az xəbər verir ki, bunu Rusiya prezidentinin beynəlxalq məsələlər üzrə köməkçisi Yuri Uşakov da təsdiqləyib.

Kremldəki danışıqların yekunu ilə bağlı brifinqdə danışan Uşakov Rusiya və ABŞ-ın Putin və Uitkoffun Kremldə apardığı danışıqların mahiyyətini açıqlamamaq barədə razılığa gəldiklərini söyləyib.

Kreml rəsmisi tərəflərin sülhdən uzaq olmadığını qeyd edib.

Uşakov deyib ki, Putinin Uitkoffla söhbəti konstruktiv, çox faydalı və məzmunlu olub.

O hələ görüləcək çox işin olduğunu vurğulayaraq sözlərinə belə davam edib:

"Hələlik heç bir kompromis əldə edilməyib. Hazırda Rusiya və ABŞ liderləri arasında görüş planlaşdırılmır. Biz konkret ifadələr və həll yolları deyil, mahiyyəti müzakirə etdik. Tərəflər əməkdaşlıq üçün böyük perspektivlər görürlər".

Uşakov ABŞ-ın Ukrayna ilə bağlı sülh təklifi haqqında da danışıb. Bildirib ki, Rusiya bu təklifdə hansısa məqamla razılaşmağa hazırdır:

"Təklifdə nələrsə tənqidə səbəb olub. Lakin faydalı müzakirə baş tutdu".

O əlavə edib ki, Ukrayna böhranının həlli ilə bağlı ABŞ tərəfindən işlənmiş bəzi materiallar müzakirə edilə bilər.

Uşakovun sözlərinə görə, Rusiya prezidenti ilə Uitkoff arasındakı görüşdə konkret ifadələr deyil, ABŞ sənədlərində qeyd olunanların mahiyyəti müzakirə olunub.

E. KAMAL