10:24 / 06-04-2020
Keçmiş deputat vəfat edib
Politoloq: “Dərbənddə azərbaycanlıların etirazına səbəb olmuş məsələyə dərhal müdaxilə edilsin”
Tarix: 22-03-2020 21:22 | Bölmə: Siyasət
Politoloq: “Dərbənddə azərbaycanlıların etirazına səbəb olmuş məsələyə dərhal müdaxilə edilsin”

Dünyanın və ölkəmizin gündəmi koronavirusa qarşı mübarizəyə kökləndiyi bir vaxtda Rusiyanın Dərbənd şəhərində yerli azərbaycanlılarla ruslar arasında münaqişə baş verib. Dərbənddə yaşayan soydaşımız Şəhriyar Səmədov bununla bağlı facebook profilində paylaşdığı statusunda bildirib:

"Dərbənd şəhərindəki Muzey-Qoruq Kompleksinin yeni təyin edilən direktoru Viktor Çesnakov elan edib ki, şəhərin azərbaycanlılar yaşayan qədim hissəsi hərraca çıxarılaraq satılacaq. Bundan hiddətlənən soydaşlarımız bu il martın 16-da, günorta saatlarında qədim Cümə məscidinin qarşısında etiraz aksiyası keçirərək, Viktor Çesnakovdan hansı əsasla onların ata-baba yurdlarının satışa çıxarılmasının hesabını tələb ediblər. Aksiya zamanı toqquşma baş verib. Dərbənddə yaşayan əzizlərimiz bizdən hadisəni ictimailəşdirməyi xahiş edir. Biganə qalmayaq. Dərbənd, Narın Qala Azərbaycan tarixinin ən şərəfli səhifələrindən biridir”.

Mövzu ilə bağlı GÜNpress.az saytına açıqlama verən Azərbaycan Vətəndaş Hərəkatı İdarə Heyətinin üzvü, şərqşünas-politoloq Vüsal Hətəmov deyib ki, məsələ siyasi çalar almamış həllini tapmalıdır.

V. Hətəmov qeyd edib ki, sosial şəbəkələrdən və bəzi xəbər portallarından izlədikləri məlumatlar Azərbaycan Vətəndaş Hərəkatını narahat edir:

“Tarixi abidələrə, özündə tarix yaşadan məskənlərə qarşı istənilən soyuq münasibət milliyyətindən, dinindən asılı olmayaraq, hər bir insanı narahat etməlidir. Dərbənddə baş verən son hadisələr isə həm də bir azərbaycanlı kimi bizə haqq verir ki, bu məsələdə münasibətimizi nümayiş etdirək. Ümumiyyətlə, acı da olsa, reallıqdır ki, Azərbaycan, bəlkə də, yeganə dövlətdir ki, öz tarixi torpaqları ilə həmsərhəddir. Hansı qonşu dövlətə ayaq basırıqsa, öncə tarixi Azərbaycan torpaqları ilə, öz azərbaycanlılarımızla qarşılaşırıq. Buna görə də həmsərhəd olan ölkələrdə baş verən hadisələr birmənalı şəkildə Azərbaycan ictimaiyyətini narahat edir”.

Bu hadisələrdə təxribat elementlərinin olmasını da istisna etməyən V. Hətəmov bildirib ki, Rusiya-Azərbaycan münasibətlərinin müsbət fazada inkişafı erməni lobbisini qıcıqlandırır:

“Düşünürəm ki, son zamanlar Azərbaycan-Rusiya münasibətləri artan xətt üzrə inkişaf etməkdədir. Ola bilsin ki, Rusiyanın özündə belə, ermənipərəst qüvvələr bu isti münasibətlərdən narahatdır. Bilirsinizmi, Rusiya azərbaycanlılar üçün həm böyük iqtisadi bazardır, həm də Azərbaycan Rusiya üçün tranzit əhəmiyyət daşıyır. Bütün bunlar iki qonşu dövlətin sülh şəraitində yaşaması, bir-birinin tarixi dəyərlərinə hörmət etməsi üçün əsas amillərdəndir”.

Qeyd edək ki, Azərbaycan Vətəndaş Hərəkatının üzvləri 2019-cu ildə Dərbəndə səfər edərək, Azərbaycan-Dağıstan Dostluq Cəmiyyətinin üzvlərilə görüşüblər. Hərəkat olaraq həmin Cəmiyyətlə əlaqə saxlayacaqlarını bildirən politoloq, bununla bağlı hazırda hərəkatın idarə heyətində müzakirə aparıldığını deyib.

“Azərbaycan XİN, Diasporla İş üzrə Dövlət Komitəsindən hansı addımların atılmasını gözləyirsiniz?” sualına cavablandırarkən V. Hətəmov bildirib ki, Azərbaycan rəsmiləri məsələni dəqiqləşdirməli və gündəmdə saxlmalıdır:

“Düşünürük ki, bu məsələ Rusiya dövlətinin qərarı deyil, lokal inzibati qərar xarakteri daşıyır. Və inanırıq ki, bu məsələ siyasi çalar almamış öz müsbət həllini tapacaq. Bunun üçün Azərbaycan rəsmiləri məsələni gündəmdə saxlamalıdır. İnanırıq ki, bugünkü Rusiya qonşuluq cəhətdən 25 il öncənin Rusiyası, yəni Qarabağ müharibəsində Ermənistana havadarlıq edən Rusiya deyil. Artıq Azərbaycan da həmin dövrün Azərbaycanı deyil, kifayət qədər dünya və regional məsələlərə təsir edə biləcək bir dövlətə çevrilmişik. Və sevindirici haldır ki, bizim dünya və region məsələlərində təsirimiz, əsasən, hərbi deyil, mədəni istiqamətlərdədir. Bir sıra ölkələrdə mədəni-idman-təhsil proqramlarına verdiyimiz əsaslı dəstək bunun bariz nümunəsidir. Odur ki, Azərbaycanın tarixi torpaqlarında tarixi dəyərlərimizin itirilməsinə, dəyişdirilməsinə, aşınmasına imkan verməyəcəyik. Və UNESCO-nun bəşəriyyətin maddi irsi siyahısına daxil edilmiş qədim Dərbənddə tarixi dəyərlərimizin itirilməsinə, yaxud dəyişdirilməsinə yönəlmiş hər hansı bir hərəkəti qeyri-sivil və qanunazidd hesab edir, aidiyyəti qurumları buna imkan verməməyə çağırırıq".

Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}