17:38 / 28-03-2024
Əməkdar artist vəfat edib
Tahir Kərimli: "Əslində, cavab verməyim yaxşıdır, amma istəyirəm susum”
Tarix: 04-08-2021 12:27 | Bölmə: Siyasət
Tahir Kərimli: "Əslində, cavab verməyim yaxşıdır, amma istəyirəm susum”

Eldəniz Səlimovun deputat toxunulmazlığının ləğv olunması haqda məsələ Milli Məclisdə müzakirə olunan zaman Tahir Kərimlinin çıxışı etirazla qarşılandı. Buna cavab olaraq Sahibə Qafarova bildirdi ki, ona 10 dəqiqəlik səs yazısını dinlədəcək.

İndi hər kəsi düşündürən sual budur ki, T. Kərimli həmin səs yazısını dinləyibmi?

Reyting.az xəbər verir ki, məsələ ilə bağlı “Yeni Sabah”a açıqlamasında T. Kərimli həmin səs yazısına qulaq asıb-asmaması haqda konkret cavab verməyib:

“İcazə verin, bu məsələ ilə bağlı mən öz ziyanıma susum. Əslində, cavab verməyim yaxşıdır, amma istəyirəm susum”.

Tahir Kərimli dünən baş verənlərlə əlaqədar təəssüf hissi keçirdiyini vurğulayıb: “Mən çox təəssüf edirəm ki, yüzlərlə insan mənim o çıxışımdan sonra əleyhimə nəsə axtarmağa başlayıb. 

Bəziləri “Tahir qanunsuz barışıq təklif edir”,-deyir. Axı xəsarət yetirmə maddəsində də qanun barışığı nəzərdə tutur. Əgər, həqiqətən də, Eldəniz Səlimov şəxsi döyübsə, onların qanun baxımından da barışmaq imkanı var. Sən birinci bu barışığı təklif etməlisən”.

Xatırladaq ki, dünən MM-in iclasında Tahir Kərimli ilə spiker arasında narazılıq olub.

Belə ki, Tahir Kərimlinin “Bu gün hər birimizin içində kədər var. Bu, onunla bağlı deyil ki, öz həmkarımızın qələmini qırırıq. Burda hər bir deputatı nüfuzu üçün zərbə görürük. Mən də hiss edirəm ki, xalqımızın gözündə kiçildik. İntizam Komissiyasının qərarını alqışlayıram. Çünki o iclasda ancaq xəsarət yetirmədən danışılıb. Niyə polis gedib öz rəhbərinə məlumat vermədi? Deməli, polisin yiyəsi var, ancaq deputatın yiyəsi yoxdur. İndi biz neyləyək rayonlara gedəndə polis bizə hərbi salam verdirdi, indi bizmi onlara verək? Hər gün bizə polis orqanlarından dəfələrlə şikayətlər gəlir. Mən bilirəm ki, Eldəniz Səlimov mənə heç nə edə bilməz. Amma digər rəsmi qurumlar haqqımda axtarıb nəsə tapa bilər. Hərəmizi bir adla götürüb deputat səlahiyyətindən məhrum edək. Onda camaat da düz deyir ki, parlamenti buraxaq", - sözləri spikerin sərt iradı ilə qarşılaşıb.

Sahibə Qafarova deputata deyib ki, deputatın yiyəsi xalqdır: “Şəxsən mən sizi iclasdan sonra kabinetimə dəvət edəcəm. Siz 10 dəqiqəlik səsə qulaq asmağa məcbur edəcəm. Mən özüm kabinetdən çıxacam, siz ona qulaq asarsınız. Sizin çıxışınız məni məyus etdi”.

Reyting.az




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}