17:38 / 28-03-2024
Əməkdar artist vəfat edib
Vətən müharibəsinin birinci ildönümü ilə bağlı bəyanat qəbul olunub
Tarix: 24-09-2021 13:39 | Bölmə: Siyasət
Vətən müharibəsinin birinci ildönümü ilə bağlı bəyanat qəbul olunub

Sentyabrın 27-də Ermənistanın işğal altında saxladığı Azərbaycan torpaqlarından cəbhəboyu atəşkəsi pozması nəticəsində ölkəmizin əks-hücum əməliyyatına məcbur olmasının - Vətən müharibəsinin başlamasının I-ci ildönümü tamam olur.

Reyting.az
xəbər verir ki, Böyük Quruluş Partiyası (BQP) bununla bağlı bəyanat imzalayıb.

BQP-nin bəyanatında xatırlanır ki, Vətən müharibəsinin başladığı gün Ermənistan Silahlı Qüvvələri arsenalında olan bütün növ silahlardan Azərbaycan Ordusunun mövqelərini və yaşayış məntəqələrini genişmiqyaslı intensiv atəşə tutması ilə mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən əks-həmlə əməliyyatı başlaması barədə qərar verilib. Qarşıdurmalar qısa müddətdə genişlənərək İkinci Qarabağ müharibəsi ilə nəticələnib.

Bəyanatda daha sonra qeyd olunur:

“Azərbaycan Vətən müharibəsinədək - bütün bu illər ərzində hərbi qarşıdurmadan yayınmaq üçün üzərinə düşən bütün fədakarlığı göstərərək, işğal faktının danışıqlar yolu ilə aradan qaldırılmasına ciddi səy göstərib. Birinci Qarabağ müharibəsi nəticəsində öz torpaqlarının böyük bir hisssəsini itirən Azərbaycan Respublikası BMT Təhlükəsizlik Şurasının işğalçı qüvvələrin qeyd-şərtsiz Azərbaycan torpaqlarından çıxarılmasını nəzərdə tutan qərarlarının icra olunması üçün müxtəlif beynəlxalq qurumlar çərçivəsində Ermənistan Respublikası ilə 30 ilə yaxın müddətdə diplomatik danışıqları davam etdirib. Sülh danışıqları prosesi 2018-ci ildə Ermənistanın rəhbəri Nikol Paşinyanın "Qarabağ Ermənistandır və nöqtə" kimi populist bəyənatı ilə ciddi ölçüdə sarsıldı. Təxribatçı əməllərin davamı qismində, 2019-cu ilin mart ayında Ermənistanın müdafiə naziri David Tonoyan "yeni torpaqlar üçün yeni müharibə", Ermənistan Silahlı Qüvvələrinin bölmələrinin 2020-ci ilin iyul ayında Azərbaycan-Ermənistan dövlət sərhədinin Tovuz rayonu istiqamətində, avqust ayında, təmas xəttinin Goranboy rayonu istiqamətində diversiyaya cəhdləri, eyni zamanda Ermənistan tərəfdən beynəlxalq hüquqi prinsiplərə zidd olaraq Azərbaycan Respublikasının işğal altındakı ərazilərinə çox sayda PKK, YPG terrorçularının, o cümlədən, Livan ermənilərinin köçürülməsi, avqust ayının sonlarında Ermənistanın Baş nazirinin həyat yoldaşı Anna Hakopyanın Azərbaycanın işğal altındakı ərazilərində qeyri-leqal olaraq təşkil olunmuş hərbi təlimdə iştirakını ictimailəşdirməsi gərginliyi son həddə çatdırdı.

Ermənistan tərəfinin bu qəbildən olan təhrikedici bəyanatları və hərəkətləri onun danışıqlar prosesindən tamamilə imtina etməsi demək idi.

Azərbaycan uğurlu hərbi əmiliyyatlar nəticəsində cəmi 44 gün ərzində işğal altında olan torpaqların böyük bir qismini azad etməyə və Ermənistanı təslimçi sülhə imza atmasına nail oldu.

Torpaqların işğaldan azad edilməsi ilə meydana çıxan mənzərə - məqsədli şəkildə törədilən geniş miqyaslı dağıntılar, tarixi-mədəni irsin məhv edilməsi, ətraf mühitə böyük zərərin vurulması erməni işğalçılarının vəhşiliklərini bütün çılpaqlığı ilə ortaya çıxardı. Ermənilər hərbi əməliyyatlardan kənar vaxtlarda, Respublika Prezidentinin dediyi kimi, sanki həmin yerlərdən vəhşi qəbilə keçmiş kimi evləri, dini və mədəniyyət abidələrini, qəbirləri dağıtmaqla dünya tarixində görünməmiş vəhşiliklər törətmişlər. Vəhşi düşmən hər yeri xarabazara çevirib. Ağaclar kəsilib, meşələr məhv edilib, torpaqlar yararsız hala salınıb. Zəbt olunmuş Azərbaycan ərazilərində soydaşlarımızın məzarlarını, mərmər daşları, qəbirüstü abidələrini qarət ediblər. 67 məsciddən 65-i yerlə-yeksan edilib, qalan ikisi isə ciddi zərər görüb və təhqir edilib, onlardan donuz və inək tövləsi kimi istifadə edilib. Füzuli, Cəbrayıl, Zəngilan, Qubadlı və digər yüzlərlə yaşayış məntəqələri viran olmuş səhranı, Ağdam ruhlar şəhərini xatırladır. Ermənistanın müharibə cinayətləri bununla da bitmir. Gəncə iki dəfə ballistik raketlə, Bərdə kasetli mərmilərlə atəşə tutulub. Tərtərə, Ağdama,

Goranboya atılan mərmilərin sayı minlərlədir. Ermənistan hərbi əməliyyatlar zamanı “Skad” və “İsgəndər-M” tipli ballistik raketlərdən, habelə qadağan olunmuş ağ fosforlu və kaset tipli sursatlardan istifadə edirdi. Yüzədək mülki şəxs - uşaqlar, qadınlar, qocalar erməni faşizminin qurbanı oldu, minlərlə ev, yaşayış binası, infrastruktur obyekti dağıdıldı. Ermənistan işğal altında saxladığı Azərbaycan ərazilərində uzun müddət talançılıqla məşğul olmuş, təbbi sərvətlərimizi acgözlüklə qanunsuz şəkildə istismar etmişdir. 1977-ci ildə Cenevrə Konvensiyasının bir nömrəli Protokolunun 54-cü maddəsi ilə "Yandırılmış torpaq" taktikası qadağan olunub və belə əməllər müharibə cinayəti sayılır. Erməni işğalçılarının özbaşınalığı tarix və mədəniyyət abidələrimizin dağıdılması və qəsdən korlanması “Silahlı münaqişə baş verdikdə mədəni dəyərlərin qorunması haqqında” 1954-cü il Haaqa, “Ümumdünya mədəni və təbii irsin mühafizəsi haqqında” UNESKO-nun 1972-ci il, “Arxeoloji irsin mühafizəsi haqqında” 1992-ci il Avropa Konvensiyalarına ziddir.

30 illik münaqişəni hərbi-siyasi yollarla həll etməklə Azərbaycan, ərazi bütövlüyünü və tarixi ədaləti bərpa etdi. Dağlıq Qarabağ münaqişəsi keçmişdə qaldı. Azərbaycanın ərazilərinin işğaldan azad edilməsi ilə bölgədə yeni vəziyyət formalaşıb və regional əməkdaşlığın həyata keçirilməsi üçün unikal imkanlar yaranıb. Bu imkanları dərk edərək, iki ölkə arasında delimitasiya və demarkasiya işlərinin sona çatdırılması, bir-birinn suverenliyinə, ərazi bütövlüyünə və sərhəd toxunlmazlığına hörmət edilməsi əsasında sülh müqviləsinin bağlanması ilə əməkdaşlıqdan faydalanmaq və ya bunun əksini etmək artıq Ermənistanın verəcəyi qərardır.

Böyük Quruluş Partiyası xalqımızın gücünün, iradəsinin və birliyinin nümayişinə çevrilən 44 günlük Vətən müharibəsində olduğu kimi müharibədən sonrakı mərhələdə də Azərbaycanın beynəlxalq hüququn prinsip və normalarına, o cümlədən də Birləşmiş Millətlər Təşkilatının Nizamnaməsinə uyğun olaraq qlobal və regional sülh, sabitlik və təhlükəsizliyin təmin edilməsi istiqamətindəki səylərini yüksək qiymətləndirir və dəstəkləyir. Eyni zamanda nüfuzlu beynəlxalq təşkilatları, dünya ölkələrini, beynəlxalq ictimaiyyəti haqqın, ədalətin, beynəlxalq hüququn yanında yer almaqla Azərbaycanın ərazi bütövlüyü uğrunda apardığı haqlı mübarizəsinə dəstək olmağa çağırırıq.

Vətən müharibəsinin birinci ildönümündə - 27 Sentyabr - Anım Günündə torpaqlarımızn azadlığı uğrunda qazanılan qələbədə ən böyük paya sahib olan əziz şəhidlərimizin və qəhrəman qazilərimizin misilsiz qəhrəmanlıq və fədakarlıqlarını bir daha sayğı və minnətdarlıqla anır, qanlarının son damlasına qədər vuruşub həyatını qurban verən bütün şəhidlərin ruhları qarşısında baş əyir, onlara Uca Allahdan rəhmət diləyirik”.




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}