Ər-Riyad görüşündən əvvəl Rusiya ilə ABŞ arasında gizli danışıqlar olub
Tarix: 21-02-2025 13:24 | Bölmə: Slayd
Ər-Riyad görüşündən əvvəl Rusiya ilə ABŞ arasında gizli danışıqlar olub

Rusiya və ABŞ rəsmiləri son aylar Rusiya-Ukrayna müharibəsini gizli müzakirə etmək üçün qeyri-rəsmi şəraitdə dəfələrlə İsveçrədə görüşüblər.

Reyting.az
"Reuters"-ə istinadla bildirir ki, Ər-Riyaddakı rəsmi danışıqlardan əvvəl keçirilən bu görüşlərdə diplomatik və təhlükəsizlik sahəsində təcrübəli şəxslər iştirak etsələr də, onlar dövlət rəsmisi statusu daşımayıblar. Üstəlik, onların Rusiya və ABŞ hökumətləri tərəfindən göndərilib-göndərilmədiyi də dəqiq bəlli deyil.

İştirakçıların adları açıqlanmasa da, mənbələrdən biri qeyd edib ki, İsveçrədəki görüşlərdən yalnız az sayda Tramp müşavirlərinin xəbəri olub.

Görüşlərdə konkret nəyin müzakirə edildiyi, ukraynalıların iştirak edib-etmədiyi, danışıqların nə vaxt başlandığı və bir çox detallar hələ də qaranlıq qalır.

Məlumdur ki, görüşlərin bəziləri ABŞ-da keçid dövründə, 2024-cü il 5 noyabrında keçirilən prezident seçkilərində Donald Tramp qalib gəlsə də, vəzifəsinin icrasına başlamamış baş tutub. Son görüşlərdən biri fevralın 14-dən 16-dək Almaniyada keçirilən Münhen Təhlükəsizlik Konfransı ilə eyni vaxtda Cenevrədə reallaşıb.

Agentliyin həmsöhbətləri İsveçrədə uzun aylar davam etmiş görüşləri danışıqların yan kanalı kimi qiymətləndiriblər. Digər bir mənbə danışıqları ümidverici "ikinci yol" adlandırıb. Mənbələrdən biri isə deyib ki, ABŞ və Rusiya rəsmilərinin son həftələr rəsmi təmaslar qurması səbəbindən artıq "Track II" məxfi sövdələşməsi öz əhəmiyyətini itirə bilər.

Ağ evlə yanaşı, Rusiya Xarici İşlər Nazirliyi, eyni zamanda Ukrayna hökuməti "Reuters"-in gizli danışıqlarla bağlı şərh sorğusuna cavab verməyiblər.

Oqtay QORÇU




Bölməyə aid digər xəbərlər