Rusiyaya qarşı mübarizədə Ukraynaya dəstək verən Avropa İttifaqı (Aİ) yenidən korrupsiya qalmaqalı ilə üzləşib. Bir neçə gün əvvəl Belçika hüquq-mühafizə orqanları korrupsiya və rüşvət işi çərçivəsində apardıqları araşdırma nəticəsində Aİ-nin sabiq ali nümayəndəsi Federika Mogerini saxlayıblar.

Reyting.az xatırladır ki, Belçika polisi Avropa Xarici Fəaliyyət Xidməti (EEAS) və onunla əlaqəli bir neçə qurumda genişmiqyaslı axtarışlar aparıb. Axtarışlar zamanı sənədlər, elektron məlumat daşıyıcıları və istintaq üçün əhəmiyyət kəsb edən digər materiallar götürülüb.

İlkin məlumata görə, Mogerini ilə yanaşı iş üzrə daha iki nəfər də saxlanılıb. Onlar maliyyə və idarəetmə sahəsində vəzifə səlahiyyətlərindən sui-istifadədə ittiham olunurlar.

İstintaqın əsas diqqət mərkəzi müxtəlif layihələrə ayrılan vəsaitlərin mənimsənilməsi ehtimalıdır. Belçika prokurorluğu bildirib ki, hazırda toplanan materiallar araşdırılır və yeni faktların üzə çıxması istisna edilmir.

Digər tərəfdən, xanım Mogerinin saxlanılması Aİ-nin digər sabiq ali nümayəndəsi Josep Borreli də diqqət mərkəzinə gətirib. Düzdür, hazırda Borrelə qarşı yetərli ittiham olmasa da, davam edən korrupsiya qalmaqalları onun da adını gündəmdə saxlayır.

Qeyd edək ki, Aİ özünü nümunəvi təşkilat və dəyərlərüstü təsisat kimi təqdim etsə də, burada korrupsiya və rüşvət hallarının baş verməsi ilk dəfə deyil. Son hadisə göstərir ki, Aİ-də struktur və idarəetmə problemləri köklüdür və bu qurum getdikcə daha çox etibar itkisi ilə üzləşir. Aİ-nin bu vəziyyətə nə qədər davam gətirəcəyini isə zaman göstərəcək. Böyük ehtimalla gələcəkdə də bu kimi analoji qalmaqallar baş verəcək, çünki keçmiş təcrübə bunu deməyə əsas verir. Məsələn, Avropa Parlamentinin sədr müavini Eva Kayli ilə bağlı 2022-ci ildə aparılan araşdırma zamanı onun evində böyük məbləğdə nağd pul aşkarlanmışdı. Həmin prosesdə bəzi Avropa Parlamenti deputatlarının da adının hallanması qurumun imicinə ciddi zərbə vurmuşdu.

Digər vacib məqam ondan ibarətdir ki, Brüsseldə polis tərəfindən Aİ ofis və qərargahlarında mütəmadi keçirilən reydlər göstərir: problem köklü və struktur xarakter daşıyır və bunu artıq gizlətmək mümkün deyil. İslahatlar isə ləng aparılır və bəzən əsas məqsəd mövcud nöqsanları aradan qaldırmaqdan çox, onları ört-basdır etmək olur. Şübhəsiz ki, korrupsiya, rüşvət və “çürük” idarəetmə strukturları ilə müasir, sürətlə dəyişən dünyada ciddi rol oynamaq və mövqe tutmaq mümkünsüzdür.

Demokratik İslahatlar Partiyasının sədri, deputat Asim Mollazadə “Reytinq” qəzetinə bildirib ki, Avropa İttifaqında əvvəllər də rüşvət qalmaqalları olub və bir sıra vəzifəli şəxslər ifşa ediliblər.

A. Mollazadə əlavə edib ki, bəzi halların isə ümumiyyətlə üstü açılmır:

“Bu kimi hallar korrupsiyanın universal olduğunu və hər yerə sızdığını göstərir. Bəli, Avropa İttifaqında belə hadisələrin baş verməsi və üzə çıxması bir çoxları üçün şok ola bilər. Amma bu, ilk fakt deyil. Avropa İttifaqında, Avropa Parlamentində, Avropa Şurasında korrupsiya qalmaqalları dəfələrlə olub. Ona görə də korrupsiyaya qarşı mübarizə gücləndirilməlidir. Əks halda, rüşvət və korrupsiya halları daha da artacaq”.

A. Mollazadə sonda qeyd edib ki, rüşvət və korrupsiya Aİ-də kök salıb və qurumun nüfuzuna, həmçinin strukturlarına ciddi zərbə vurub.

N. ORUCOV

Reyting.az