Amerikalı milyarder İlon Mask yenidən Avropa İttifaqı (Aİ) ilə bağlı qalmaqallı fikirləri ilə gündəmə gəlib. “SpaceX” və “Tesla Motors” şirkətlərinin yaradıcısı və rəhbəri Avropa Komissiyası tərəfindən kəsilmiş 120 milyon avroluq cərimədən sonra bildirib ki, Aİ ləğv edilməli və idarəetmə yenidən ayrı-ayrı ölkələrin nəzarətinə qaytarılmalıdır.

Reyting.az xəbər verir ki, milyarder “X” platformasında Aİ-ni “Avropanı boğan bürokratiya” adlandırıb və “AbolishTheEU” (“Avropa İttifaqını ləğv et!”) şüarı ilə bir neçə paylaşım edib.

Qeyd edək ki, Aİ tərəfindən rəqəmsal xidmətlərlə bağlı qəbul edilmiş xüsusi qərara əsasən, “X” platforması qanunvericiliyi pozduğu üçün üç istiqamət üzrə cərimələnib: 45 milyon avro verifikasiya nişanları ilə bağlı pozuntulara görə, 40 milyon avro tədqiqatçılar üçün vacib məlumatların əlçatan olmaması səbəbindən, 35 milyon avro isə platformadakı reklam şəffaflığının aşağı olması ilə əlaqədar tətbiq edilib.

Bu cərimə, 2024-cü ilin fevralında qüvvəyə minən yeni Avropa rəqəmsal tənzimləmə qanunu çərçivəsində indiyədək verilmiş ilk və ən böyük maliyyə sanksiyasıdır.

Oqtay QORÇU