Cavid Qurbanovun hesabatı birmənalı qarşılanmadı: “Rəqəmlər şişirdilir” - Foto
Tarix: 14-11-2019 19:16 | Bölmə: Slayd
Cavid Qurbanovun hesabatı birmənalı qarşılanmadı: “Rəqəmlər şişirdilir”

“Azərbaycan Dəmir Yolları” QSC-nin sədri Cavid Qurbanov ölkə başçısına qeyri-dəqiq, təhrif olunmuş və şişirdilmiş rəqəmlərlə hesabat verir.

Bunu Reyting.az-a açıqlamasında Azərbaycan Dəmir Yolları İdarəsinin keçmiş rəis müavini Bayram Abbasov dünən QSC sədri Cavid Qurbanovun Prezident İlham Əliyevin qəbulunda olarkən verdiyi hesabatı şərh edərkən deyib.

Onun sözlərinə görə, həmin qəbulla bağlı reportajı və C. Qurbanovun çıxışını diqqətlə izləyib. B. Abbasov iddia edir ki, hesabat zamanı dövlət başçısına bir neçə məsələdə şişirdilmiş rəqəmlər söylənilib: “Bu, əsasən Bakı-Sumqayıt elektrik qatarlarında gün ərzində 12 min sərnişinin daşınması və Bakı-Gəncə marşrutu üzrə qatarların məsafəni dörd saata qət etməsi ilə bağlı deyilənlərdir”.

B. Abbasov bildirib ki, illərlə dəmir yolunda çalışıb: “Hətta Bakı-Sumqayıt istiqamətində qatar maşinisti də olmuş, sonralar sərnişindaşıma idarəsinə rəhbərlik etmiş mütəxəssis kimi bildirirəm ki, Cavid Qurbanovun hesabat zamanı səsləndirdiyi rəqəmlər reallığı əks etdirmir. Mən dediklərimı isbat edə bilərəm”.

Cavid Qurbanovun hesabatı birmənalı qarşılanmadı: “Rəqəmlər şişirdilir”

Keçmiş rəis müavini hesabat zamanı rəqəmlərin şişirdildiyini isbat etmək üçün cox sadə bir xronometraja da istinad edir: “Bu xronometraj nəticəsində bəlli olur ki, gün ərzində 12 min sərnişinin daşınması həqiqətə uyğun deyil. Baxın: Bakı-Sumqayıt marşrutunda “Stadler Rail”EŞ tipli 4 vaqondan, iki mərtəbədən ibarət qatarlar çalışır. Bu qatarların sərnişin üçün hesablanmış oturacağının sayı 396-dır. Deməli, qatar maksimum bilet satışı ilə 396 nəfər daşıya bilir.

Bakı-Sumqayıt və Sumqayıt-Bakı qatarlarının hərəkət cədvəlinə baxsaq, görərik ki, gün ərzində 11 tək istiqamətə, yəni Bakıdan, bir o qədər də cüt qatar, yəni əks istiqamətə hərəkət olur.

Yeri gəlmişkən onu da qeyd edim ki, hərəkət cədvəli də vaxt bölgüsünə görə düzgün hesablanmayıb. Səhər Bakıdan saat 8-də, Sumqayıtdan isə saat 7-də hərəkət başlayır. Bu vaxt azı bir saat önə çəkilməli idi. Gününün orta saatlarında hərəkətdə texminən 6 saatdan çox fasilə də düzgün deyildir.

Qatarlarda yerlərin 396 olduğunu və satışı da nəzərə alsaq - hərcənd, praktika göstərir ki, heç bir zaman qatarlarda 100 faiz bilet satılmır – olsa-olsa ancaq, səhər Sumqayıtdan Bakı istiqaməti, pik vaxtlarda, yəni axşam da Bakıdan Sumqayıt istiqamətinə maksimum bilet satıla bilər. Hətta hesab etsək ki, bütün qatarlar sərnişinlə maksimum dolur və yerlərin hamısı tutulur, yenə gün ərzində 12 min sərnişinin daşınması mümkünsüzdür. Yəni, sadə hesablama apardıqda bəlli olur ki: 396x10=3960x2=7920 sərnişin gün ərzində daşına bilər”.

Bu səbəbdən də B. Abbasov QSC sədri C. Qurbanovun səsləndirdiyi rəqəmləri real saymır: “Bu, arzuolunanı həqiqət kimi göstərməkdən və düzgün olmayan məlumatdan başqa bir şey deyildir”.

Bakı-Gəncə qatarı ilə bağlı məsələyə gəldikdə B. Abbasov deyib ki, cənab Qurbanov qatarların hərəkət cədvəlinə baxsın: “Onun təsdiq etdiyi hərəkət cədvəlində qatar Bakıdan Gəncəyə olan məsafəni 4 saat 15 dəqiqəyə qət etməlidir. Amma qatar məsafəni nəzərdə tutulan 4 saat 15 dəqiqəyə qət edə bilmir. Çünki hər gün plana uyğun, yolun müxtəlif sahələrində təmir işləri ilə əlaqəli məhdudiyyətlər olur. Bu məhdudiyyətlər müxtəlif mənzillərdə müxtəlif vaxtlarda tətbiq edilir. Belə hallarda maşinistə sürət məhdudiyyətləri haqqında xəbərdarlıq blankı verilir ki, həmin kilometrdə sürət həddi blankda göstərilən həddə qədər endirilsin. Bu da həm vaxt itkisi, həm də sürət itkisi ilə nəticələnir. Bunları nəzərə alaraq hörmətli sədrin diqqətinə çatdırmaq istəyirəm ki, Bakı-Gəncə qatarı, real olaraq 4 saat 30 dəqiqədən, yaxud 5 saatdan tez mənzil başına çatmır”.

Sabiq rəis müavini sonda deyib:

“Təəccüb doğuran odur ki, dövlət başçısına həqiqəti əks etdirməyən hesabat tipli məlumatı böyük bir təşkilatın sədri söyləyir.

Hörmətli Qurbanov, sizin bu işlərə təhkim olunmuş məmurlar hesablamaları düzgün aparmırlar! Əgər sadə bir məsələdə hesabat bu qədər təhrif olunursa, böyük tutumlu işlərdə nələrin baş verdiyini təsəvvür eləmək çətin deyildir”.

Reyting.az həm “Azərbaycan Dəmir Yolları” QSC-nin, həm də C. Qurbanovun məsələyə münasibətinə hörmətlə yanaşır və onların da fikirlərinə yer ayırmağa hazırdır.
скачать dle 10.5фильмы бесплатно




Bölməyə aid digər xəbərlər
{sape_links}{sape_article}