Lukaşenko çətin seçim qarşısında - Belarus prezidenti hakimiyyətini davam etdirə biləcəkmi?
Tarix: 26-09-2020 17:44 | Bölmə: Slayd
Lukaşenko çətin seçim qarşısında - Belarus prezidenti hakimiyyətini davam etdirə biləcəkmi?

Avqustun 9-da Belarusda keçirilən prezident seçkilərindən sonra vəziyyət gərgin olaraq qalır. Aleksandr Lukaşenko özünü prezident elan etsə də, xalq tərəfindən qəbul edilmədi və ölkədə böyük etiraz aksiyaları başladı. Artıq Lukaşenko özünün inaqurasiya mərasimini də keçirib və həmin gün ölkədə etiraz etdiyi üçün daha 364 nəfər saxlanılıb.

Rusiya tərəfindən dəstək almağı bacaran Lukaşenkonun prezidentliyini demək olar ki, Qərb ölkələri tanımadı. 27 dövləti özündə birləşdirən Avropa Birliyi də Lukaşenkonun legitimliyini qəbul etmədi. ABŞ da Belarus xalqının yanında olduğunu bildirdi. Böyük Britaniya hökuməti də Lukaşenkonu legitim prezident kimi tanımır. Buna paralel olaraq ölkə daxilində yüz minlərlə insan Lukaşenkoya etiraz edir. Müxalifətin əksər tanınmış simaları isə ya həbsə atılıb, ya da ölkəni tərk etmək məcburiyyətində qalıb.

Görəsən, Qərb tərəfindən legitimliyi tanınmayan və sanksiyalara məruz qalacağı bildirilən Aleksandr Lukaşenkonun və Belarusun gələcəyi necə olacaq?

Milli Məclisin deputatı, politoloq Rasim Musabəyov Reyting.az-a açıqlamasında deyib ki, Qərb Belarusun özünə deyil, Lukaşenkoya sanksiya tətbiq etməyi planlaşdırır: “Bunun hansı nəticələrə gətirib çıxaracağı belarus xalqının iradəsindən asılı olacaq. Lukaşenko özünü xalqa qəbul etdirməyi bacarsa ölkəni idarə edəcək. Yox, əgər xalq hər yerdə səndən imtina edirsə, bu halda arxanda Rusiya deyil, lap Çin də dursa, faydası yoxdur. Bu halda daima zor tətbiq etməklə ölkəni uzun müddət idarə etmək olmaz.

O ki qaldı sanksiyalara, bu, əsasən Lukaşenko və onun güc strukturlarına şamil olunacaq”.


R. Musabəyov

R. Musabəyov əlavə edib ki, Belarusa dövlət kimi Qərb ölkələri tərəfindən sanksiya tətbiq edilməsə də, amma buna qədər də Lukaşenko hökumətinə beynəlxalq maliyyə qurumları və Avropa Birliyi çox çətinliklə maliyyə ayırırdı: “Düşünürəm ki, indi Qərbdən Lukaşenkoya 1 avro da verən olmayacaq. Lukaşenko hökuməti Rusiyadan nə qədər ala bilərsə, pul alacaq. İş ondadır ki, hazırda daha ciddi proseslər Belarusun yüksək texnologiyalarla bağlı şirkətlərində müşahidə edilir. Bu şirkətlər ölkəni kütləvi şəkildə tərk edir. Hansı ki, bu şirkətlər ölkə üçün ildə 2 milyard avro gətirə bilirdi. Bu baxımdan Lukaşenko hökumətinin imkanları çətinləşəcək.

Digər tərəfdən, son günlər Belarus əhalisi banklara qoyduğu 1,5 milyard dolları geri götürüb. Bu, faktiki ölkədə xarici valyuta ehtiyacını gücləndirir. Yəni Belarus rubluna ciddi təzyiqlər yarana və devalvasiyaya məruz qala bilər. Bununla da, ölkənin iqtisadi vəziyyəti çətinləşər”.

R. Musabəyov xatırladıb ki, Rusiya Belarusa 1,5 milyard dollar kredit ayırsa da, bu pullar Rusiyadan çıxmayacaq: “Nəzərə alın ki, Belarus qaza və əvvəlki borclara görə Rusiyaya 1 milyard 600 milyon ödəməlidir. Tutaq ki, Rusiya bu krediti sağ cibindən sol cibinə qoymaqla Belarusun əvvəlki borclarını qaytarmağını bir il müddətinə uzatdı, bəs sonra nə olacaq? Axı Belarusa heç yerdən pul gəlməyəcək. Odur ki, Belarusu qarşıda ciddi sınaqlar gözləyir”.

Lukaşenkonun Çin tərəfindən də dəstəkləndiyini xatırladan politoloq hesab edir ki, hər şey belarus xalqının iradəsindən asılı olacaq: “Əslində bizim üçün də Lukaşenko məqbul dövlət başçısıdır. Bizim onunla heç vaxt problemimiz olmayıb. İndiki vəziyyətə görə də təəssüflənə bilərik. O mənadakı Azərbaycanla yaxşı münasibətlər saxlayan dövlət başçısı belə çətin duruma düşüb”.

Politoloq sonda əlavə edib ki, bəzən deyirlər ki, Belarusda vəziyyəti Qərbdən qızışdırırlar. Amma heç bir ölkədən vəziyyəti bu səviyyədə qızışdırmaq mümkün deyil.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}