23:11 / 18-03-2024
Ukrayna ordusu geri çəkilir
20:16 / 18-03-2024
Borrell ikibaşlı danışır
Deputat: “ABŞ-da seçkilər bitməyənə qədər Qarabağda müəmmalı vəziyyət davam edəcək”
Tarix: 26-10-2020 16:45 | Bölmə: Slayd
Deputat: “ABŞ-da seçkilər bitməyənə qədər Qarabağda müəmmalı vəziyyət davam edəcək”

“ABŞ prezidenti Donald Tramp administrasiyasının konkret məqsədi bəllidir. ABŞ-da noyabrın 3-də prezident seçkiləri keçiriləcək. Tramp göstərmək istəyir ki, heç kəs bacarmırdı, amma mən Qarabağ konfliktinə dair alovlanan münaqişəni dayandıra bildim. Yəni atəşkəsi mən təmin etdim, ermənilər gəlib mənə səs versinlər”.

Bunu Reyting.az-a Milli Məclisin deputatı, politoloq Rasim Musabəyov ABŞ-ın təşəbbüsü ilə əldə olunan humanitar atəşkəs rejimindən danışarkən deyib.

R. Musabəyov diqqətə çatdırıb ki, əslində atəşkəsin əldə edilməsi sadəcə istəkdir: “Ancaq erməni tərəfi elə atəşkəsdən az sonra onu pozmağa başladı. Ermənilərin məqsədi ayrıdır. Onlar çalışırlar ki, bölgəyə sülhməramlı adı altında rus qoşunlarının gəlməsinə nail olsunlar. Beləcə, ermənilər rus əsgərlərinin arxasında gizlənməklə torpaqlarımızı işğal altında saxlamaqda davam etmək istəyirlər. Onlar görürlər ki, Rusiya qoşunları Moldovada var. Orada 30 ildir müharibə getmir, atəşkəs pozulmur, hərbi cəhdlər yoxdur. Amma Rusiya sülhməramlılarının orada olması ona gətirib çıxarıb ki, münaqişənin həlli üçün bir addım da irəliləmək mümkün deyil. Baxmayaraq ki, yollar açıqdır, insanlar gedib-gələ bilirlər. Amma faktiki olaraq Moldovada sülhün əldə edilməsinin qarşısını Rusiya “sülhməramlıları” alır”.

Politoloq əlavə edib ki, Rusiyanın Abxaziyada da sülhməramlıları var: “Gürcülər onlara inandı. Sonra Rusiya hərbçiləri Şimali Qafqaz qurumlarını qabağa buraxaraq gürcü əhalisini etnik təmizləməyə məruz qoydu. Rus sülhməramlıların arxasından hansısa separatçı quldurlar gürcü kəndlərinə atəş açırdılar. Gürcülər sülhməramlılara deyəndə ki, bu zibillərinizi yığışdırın, cavabları “biz bunlarla bacarmırıq”, - olurdu. Gürcüstan həmin quldurlara zərbə vuranda ruslar vay-şüvən qaldırdılar ki, bizim sülhməramlılara atəş açılıb, az qala Tiflisi tutmaq istədilər. Bunlar reallıqdır və Azərbaycan bunu görərək heç vaxt öz ərazilərinə sülhməramlı adı altında rus qoşunlarının gəlməsini arzu etmir. ABŞ və Britaniya da bunun əleyhinədir. Əslində Rusiya nə Azərbaycandan, nə də BMT Təhlükəsizlik Şurasından mandat ala bilmədi. Amma ermənilər bunun üçün sona qədər çalışacaq. Çünki onlara görə, sülhməramlılar gəlməsə atəşkəs mümkün deyil”.

R. Musabəyovun fikrincə, atəşkəslə bağlı çətinliklərin olması hər zaman özünü göstərib: “Məsələn, 1994-cü ilin mayında atəşkəs əldə edildi. Amma atəşkəs mayda elan edilsə də, real atəşkəs həmin il payızın sonunda təmin edildi. Bu o qədər də asan məsələ deyil. Söhbət ondan getmir ki, tərəflər vaxtaşırı avtomat və digər silahlardan bir-birinə atəş açırlar. Ən azı ağır texnika-artilleriya, raket kompleksləri və digər avadanlıqlardan istifadə etməmək onu tələb edir ki, bu qurğular geri çəkilsin. Bunun üçün müəyyən öhdəliklər götürülməli, müşahidələr aparılmalıdır. Mən inanmıram - hətta tərəflər istədiyi halda - atəşkəs elan edildikdən dərhal sonra ona əməl edilsin. Onu da istisna etmirəm ki, Paşinyan və Ermənistanın siyasi rəhbərliyi hərbi bölgədə nəzarəti təmin edə bilmirlər. Onlar Yerevanda oturub qərar verirlər, ancaq səngərdə oturanlara atəşkəs xəbəri gəlib çatacaqmı, onları xəbərdar edəcəklərmi? Fərz edirəm, bütün bu amillər gətirib ona çıxara bilər ki, atəşkəsə əməl etmək istədikləri halda bu proses uzanacaq və mövcud vəziyyəti qoruyub saxlamaq mümkün olmayacaq. Sözsüz ki, erməni tərəfi atəşkəsi süni pozmaq niyyətində olsa, Azərbaycan elə zərbə vuracaq ki, bunun altından çıxa bilməyəcəklər. Zənnimcə, ABŞ-da seçkilər bitməyənə qədər Qarabağda müəmmalı vəziyyət davam edəcək”.

Reyting.az




Bölməyə aid digər xəbərlər
{sape_links}{sape_article}