Partiya sədrləri əsas məsələni müzakirə etmək istəməyib
Tarix: 13-09-2021 12:44 | Bölmə: Slayd
Partiya sədrləri əsas məsələni müzakirə etmək istəməyib

“Ölkəmizdə fəaliyyət göstərən siyasi partiyalar sentyabrın 9-da Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin rəhbəri Ədalət Vəliyevlə videokonfrans formatında müzakirələr apardı. Həmin toplantıda siyasi dialoq, gələcək siyasi vəziyyət və s. ətrafında müzakirələr oldu.

Xatırladım ki, Azərbaycan-Türkiyə birliyinin əsası 1918-ci ildə Nuru Paşanın komandanlığında 11 min Türk Ordusunun ölkəmizə gəlməsi ilə qoyulub. Sentyabrın 15-də isə Bakı işğaldan azad edilib. Çox təəssüflər olsun ki, ölkəmizdəki 45 siyasi partiyadan 25-i sentyabrın 9-da tədbir keçirib, amma Türkiyə-Azərbaycan əlaqələri, Bakının 15 sentyabrda işğaldan azad edilməsi ilə bağlı məsələdən danışılmayıb”.

Bunu Reyting.az-a Azərbaycan Cümhuriyyət Xalq Partiyasının sədri Bədrəddin Quliyev deyib.

Onun sözlərinə görə, Tovuz hadisələrindən sonra Türkiyə yenidən Azərbaycanın yanında olub və nəticə etibarı ilə ölkəmizin imkanları daha da artıb: “Üstəlik, işğal altında olan torpaqlarımızdan işğalçı Ermənistanı vurub çıxardıq. Amma təəssüflər olsun ki, partiya sədrləri yuxarıda qeyd etdiyim məsələləri gündəmə gətirmir. Bir-birinə “bəytərifi” deməklə iş getməz”.



Partiya sədri bildirib ki, ölkədə siyasi partiyaların dövlət qeydiyyatı ilə bağlı problemlər olub, amma 2019-cu ildən sonra bu məsələ həllini tapıb: “Bu yaxşı haldır. Amma biz çalışmalıyıq ki, ölkəmizdə normal hüquq sistemi qurulsun”.

B. Quliyev diqqətə çatdırıb ki, 1991-ci ildə “QKÇP” hadisəsindən sonra 5 ölkə Müstəqillik Bəyannaməsi elan edib: “Onlardan biri də Azərbaycan idi. Avqustun 30-da Müstəqillik Bəyannaməsi elan edilsə də, konkret olaraq ən sonda müstəqilliyini elan edən ölkələrdən biri Azərbaycan oldu. Fakt ondan ibarətdir ki, bölgəmizdə dəyişikliklər gedir. Rusiya da islahatlar var. Dumanın, gələcəkdə Federasiya Şurasının tərkibi dəyişilir.

Belarusda da müəyyən islahatlar aparılır. Ermənistan və Gürcüstanda da vəziyyət dəyişir. Biz də dəyişikliklər ərəfəsindəyik. Amma bu prosesdə süründürməçilik olmaz. Nəzərə almaq lazımdır ki, Xankəndi və bəzi məntəqələrimizdə hələ də separatçılar var, orada süverenliyimizi təmin edə bilməmişik. Əlbəttə, müttəfiqlərimizlə daha geniş əlaqələrə sahib olmalıyıq. Bunun kökünü də Şuşa Bəyannaməsi təşkil edir”.


B. Quliyev

Partiya sədri hesab edir ki, 15 Sentyabr - Bakının işğaldan azad edilməsi məsələsi gündəmə gətirməlidir: “Bu, gələcəkdə türk dövlətləri arasında əlaqələrin inkişafında əsas rol oynamalıdır. Eyni zamanda biz, Türkiyədə olduğu kimi, aşağıdan yuxarıya doğru müəyyən addımlar atmalıyıq. Çalışmalıyıq ki, bələdiyyə seçkiləri, böyük şəhərlərdə mer seçkiləri keçirilsin. Yerli idarəetmə bələdiyyələrə verilməlidir”.

Müsahimiz seçki komissiyaları məsələsinə baxmağı da vacib sayır: “Bu prosesi “Beşinci kolon”un və “KQB millətçilərinin” nəzarətindən çıxarmaq lazımdır. Yəni imicimizi düzəltməli, seçkilərə getməliyik”.

B. Quliyevin fikrincə, Azərbaycan daha güclənmək üçün Ümumdünya Ticarət Təşkilatı ilə əlaqələrini genişləndirməli, Avropa Birliyi ilə münasibətləri inkişaf etdirməli, Avropa ilə əlaqələri ilə elə səviyyəyə gətirməlidir ki, insanlarımız ucuz bazarlara gedə bilsin: “Eyni zamanda inhisarçılığa yer olmamalıdır. Azərbaycan dünya ilə ayaqlaşan proseslərə getməlidir. Bunun üçün demokratik, hüquqi islahatların bazasını yaratmalıyıq”.

Reyting.az




Bölməyə aid digər xəbərlər
{sape_links}{sape_article}