17:38 / 28-03-2024
Əməkdar artist vəfat edib
Diplomatlar Kiyevi tərk edir - Ukraynada müharibə təhlükəsi artır
Tarix: 24-01-2022 12:34 | Bölmə: Slayd
Diplomatlar Kiyevi tərk edir - Ukraynada müharibə təhlükəsi artır

ABŞ-ın ardınca İngiltərə də Ukraynadakı diplomatlarını çıxarmağa başlayıb.

Reyting.az
xəbər verir ki, bu barədə BBC məlumat yayıb.

Telekanal bildirib ki, Rusiyanın Ukraynanı işğal etmək narahatlığı artdığı üçün İngiltərə Kiyevdəki diplomatlarının sayını 50 faiz azaltmaq istəyir.

Bundan əlavə, “CNN International” və “New York Times” yazır ki, ABŞ prezidenti Co Bayden Şərqi Avropa və Baltikyanı ölkələrə minlərlə Amerika hərbçisi yerləşdirməyi düşünür. Bayden həmçinin NATO-dakı müttəfiq ölkələrə döyüş gəmiləri və reaktiv təyyarələr göndərməyi düşünür.

CNN-nin iddiasına görə, Bayden ABŞ qoşunlarının Ukrayna ətrafında yerləşdirilməsi variantlarını da dinləyir. Şənbə günü Kemp Deviddə Pentaqonun yüksək səviyyəli rəsmiləri ilə görüşən prezident Baydenə bir neçə variant təqdim edilib.

NATO bu gün günorta saatlarında “Nyu York Tayms” və “CNN İnternational”da dərc olunan xəbəri rəsmi bəyanatla təsdiqləyib. Şimal Alyansına üzv dövlətlər Şərqi Avropanı müdafiə etmək üçün əlavə döyüş gəmiləri və döyüş təyyarələri göndərəcək. NATO-nun baş katibi Yens Stoltenberq bildirib ki, alyans üzvləri əlavə döyüş gəmisi və reaktiv yerləşdirmə addımından məmnundurlar.

Rusiya isə ABŞ və NATO-nun əlavə hərbçi göndərmək addımına sərt reaksiya verir. Rusiya parlamentinin müdafiə komitəsinin rəhbəri Andrey Kartapolov deyib ki, Moskva NATO-nun bu addımına layiqli cavab verəcək.

Keçən həftə İsveçrənin Cenevrə şəhərində rusiyalı həmkarı Sergey Lavrovla görüşən ABŞ dövlət katibi Antoni Blinken bu gün Avropa İttifaqına (AB) üzv ölkələrin xarici işlər nazirləri ilə videokonfrans vasitəsilə görüş keçirəcək və Lavrovla müzakirələri haqda ətraflı məlumat verəcək.

Qeyd edək ki, bir çox ölkələr, o cümlədən ABŞ və Böyük Britaniya da Ukraynaya sursat və hərbi birləşmələr göndərir. ABŞ-ın Ukraynaya hərbi sursat yardımının ilk partiyası bazar günü Kiyevə gətirilib. Birləşmiş Krallıq da həftənin əvvəlində müdafiə silahları və təlimlər üçün əlavə qoşun göndərəcəyini açıqlayıb. Bir çox NATO müttəfiqləri də Ukraynaya hərbi sursat və ya qoşun göndərir.

Onu da diqqətə çatdıraq ki, ABŞ və Böyük Britaniya ilə yanaşı Avstriya da diplomatlarını Ukraynadan çıxarmaq istəyir. Avstriyanın xarici işlər naziri Aleksander Şallenberq bildirib ki, səfirlik işçilərinin Ukraynadan çıxarılması planı olsa da, hələlik yekun qərar verilməyib.

Bundan əlavə, Yaponiya hökuməti öz vətəndaşlarının, o cümlədən səfirliyin əməkdaşlarının Ukrayna ərazisindən təxliyə edilməsi zərurətini nəzərdən keçirir.

Reyting.az




Bölməyə aid digər xəbərlər
{sape_links}{sape_article}