"Güzəran" Sosial Araşdırmalar Mərkəzinin sədri, iqtisadçı Qadir İbrahimli hökumətə anti-böhran təklifləri verib.

İqtisadçı öz təkliflərində qeyd edir ki, artıq böhran dövründəyik. 00 faizlik devalvasiya iqtisadiyyatın bütün sahələrinə və zümrələrə dağıdıcı təsir göstərib və proses getdikcə güclənməkdədir. Belə bir vəziyyətdə əhalinin, xüsusi ilə də kasıb zümrənin xeyrinə qərar vermək hökumətin borcudur:

"Təəssüf ki, hökumət hələ ki qərar verə bilmir - ölkəni isə etiraz aksiyaları bürüməkdədir. Sosial etirazlar getdikcə intensivləşməyə başlayır. Güc vasitəsi ilə bu etirazları boğmaq olar, ancaq əhalinin real gəliri yoxdursa, bu etirazlar səngiməyəcək.

O biri tərəfdənsə, əhalinin alıcılıq qabiliyyətinin zəifləməsi biznes strukturlarını da çökdürüb və çökdürməkdədir. Bu isə vergi daxilolmalarının kəskin azalmasına və vəziyyətin daha da pisləşməsinə gətirib çıxaracaq”.

Əhalinin, xüsusilə də kasıb zümrənin vəziyyətini nisbətən yaxşılaşdırmaq üçün iqtisadçı hökumətə təklif edir:

1. Minimum istehlak səbətinin tərkibinə daxil olan un və un məhsulları, kartof, ət və ət məhsulları, yağlar və şəkərin idxalı keçid dövründə ƏDV və gömrük rüsumlarından tam azad edilsin.
2. Bu məsullar üzrə yerli istehsalçılar mənfəət, torpaq və əmlak vergisindən azad edilsin.
3. Bu məhsulların istehsalı və idxalında tam rəqabət mühiti təmin edilsin ki, qiymətlər inzibati müdaxilə olmadan minimuma ensin.
4. Regonlarda vəziyyətin daha ağır olmasını nəzərə alaraq Dövlət Taxıl Fondu ilkin 3 ayda əhaliyə güzəştli qiymətlərlə taxıl satışını təşkil etsin.

Bu təkliflər reallaşsa, yaxın gələcəkdə zəruri qida növləri üzrə qiymətlər ucuzlaşa, əhalinin alıcılıq qabiliyyəti qismən də olsa, bərpa edilir bilər. Bu məsulllar üzrə vergilərin azalmasını isə hökumət başqa mənbələr, məsələn, dövlət büdcəsinin ehtiyat fondu və ya Neft Fondunun resursları hesabına kompensaiya edə bilər.