Doha görüşünün nəticəsiz qalması, neft ixrac edən ölkələrin hasilatı dondurmaq barədə razılıq əldə etməməsi birjalarda "qara qızıl”ın qiymətinə mənfi təsir edib.

Reyting.az APA TV-yə istinadən xəbər verir ki, bu gün səhərdən başlayaraq birjalarda neft sürətlə ucuzlaşır. Cümə günü birjaların son hərraclarında "Brent” markalı neftin qiyməti 43,11 dollar olub, bu səhər isə qiymətlər 40,88 dollaradək düşüb.

Qərbi Texas nefti də dəyər itirib. Hazırda WTI neftinin bir bareli 39,84 dollara satılır.

Ekspertlər həftə ərzində qiymətlərin Doha görüşünün təsiri altında daha da ucuzlaşacağını ehtimal edirlər. Neftin bir barelinin 35 dollaradək ucuzlaşması ehtimalı daha böyükdür. Doha görüşündən sonra neft ölkələrinin bazarda paylarını qorumaq üçün hasilatı artıracağı gözlənilir ki, bu da qiymətlərə mənfi təsir edir.