Osman Gündüz: “Ümid edirəm ki, qərar qəbul edənlərimiz düşmən ölkənin statistikasını izləyir”
Tarix: 11-03-2023 23:41 | Bölmə: İqtisadiyyat
Osman Gündüz: “Ümid edirəm ki, qərar qəbul edənlərimiz düşmən ölkənin statistikasını izləyir”

“Ermənistan son onilliklərdə ilk dəfə olaraq informasiya texnologiyaları sahəsində illik 49 fazi artım əldə edib. Əgər açıqladıqları doğrudursa, düşünürəm ki, çox böyük rəqəmdir. Qeyd edim ki, bu açıqlamanı Ermənistanın iqtisadiyyat naziri Vaan Kerobyan İrəvanda keçirilən “Digitec-2022” tədbirində açıqlayıb”.

Bunu Reyting.az-a Azərbaycan İnternet Forumunun prezidenti Osman Gündüz deyib.

O. Gündüz xatırladıb ki, açıqlanan statistikaya görə, Rusiya-Ukrayna müharibəsi başlayandan sonra Ermənistana 2000-dən çox şirkət , 50 min rus və 50 min də erməni işçi qüvvəsi relokasiya edib.

Onun sözlərinə görə, güman etmək olar ki, artıq relokasiyadan sonrakı biznes mühiti də informasiya texnologiyaları (İT) sektorunda belə bir artıma səbəb olub. Çünki müharibə səbəbindən Rusiyadan mütəxəssislər qaçıb.

O. Gündüz əlavə edib ki, məğlub Ermənistanın İT sektorunu müşahidə edəndə bu sahənin prioritet bir istiqamət olaraq seçildiyi, bu sektora böyük xarici investisiyalar yatırıldığı, qlobal İT şəbəkələşməsinin gücləndirildiyi və sektora böyük güzəştlərin edildiyi görünür. Düşünmək olar ki, erməni diaspor şəbəkəsinin də rolu burada çox böyükdür.

O. Gündüz sonda diqqətə çatdırıb ki, Ermənistanda revanşist əhval-ruhiyyədə olanlar həm də texnoloji sahənin inkişafından əldə edəcəkləri üstünlüyə ümid bəsləyirlər. “Ümid edirəm ki, bizim qərar qəbul edənlərimiz də düşmən ölkənin rəsmi və qeyri-rəsmi statistikalarını izləyirlər”, - deyə O. Gündüz əlavə edib.





Bölməyə aid digər xəbərlər
{sape_links}{sape_article}